(ព្រះវិហារ)៖ អនុវត្តតាមការណែនាំរបស់លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ ក្រុមការងារប្រយុទ្ធនឹងជំងឺគ្រុនឈាម នៃមន្ទីរសុខាភិបាលខេត្ត នៅថ្ងៃទី៥ ខែសីហា ឆ្នាំ២០២៦នេះ បានចុះអនុវត្តសកម្មភាពបាញ់ថ្នាំសម្លាប់មូសខ្លា ដែលជាភ្នាក់ងារចម្លងជំងឺគ្រុនឈាម នៅតាមសហគមន៍ ក្នុងភូមិស្លែង និងភូមិខ្យង ឃុំខ្យង ស្រុកជ័យសែន ខេត្តព្រះវិហារ។

ប្រតិបត្តិការនេះធ្វើឡើងក្នុងគោលបំណងកាត់បន្ថយចំនួនមូសខ្លា និងទប់ស្កាត់ការឆ្លងរាលដាលនៃជំងឺគ្រុនឈាម ជាពិសេសការពារសុខភាពប្រជាពលរដ្ឋនៅតាមមូលដ្ឋាន ក្នុងរដូវវស្សាដែលជាពេលវេលាមូសបង្កើតពូជបានច្រើន។

តាមរបាយការណ៍បានឱ្យដឹងថា ក្រុមការងារបានចុះបាញ់ថ្នាំសម្លាប់មូសនៅតាមខ្នងផ្ទះប្រជាពលរដ្ឋសរុបចំនួន ៦៨២ខ្នងផ្ទះ ក្នុងភូមិស្លែង និងភូមិខ្យង ដើម្បីបង្ការ និងទប់ស្កាត់ហានិភ័យនៃការកើនឡើងជំងឺគ្រុនឈាមក្នុងតំបន់។

ជាមួយគ្នានេះ មន្ទីរសុខាភិបាលខេត្តព្រះវិហារ បានអំពាវនាវដល់ប្រជាពលរដ្ឋបន្តចូលរួមអនុវត្តវិធានការការពារជំងឺគ្រុនឈាម ដោយត្រូវលុបបំបាត់ជម្រកមូស ដូចជា ការគ្រប់គ្រងធុងទឹក កំប៉ុង កង់ចាស់ ឬវត្ថុដែលអាចដក់ទឹកជុំវិញផ្ទះ និងត្រូវប្រញាប់ទៅកាន់មណ្ឌលសុខភាព ឬមន្ទីរពេទ្យនៅពេលមានរោគសញ្ញាសង្ស័យ។

សកម្មភាពនេះ ជាផ្នែកមួយនៃការអនុវត្តផែនការប្រយុទ្ធនឹងជំងឺគ្រុនឈាមរបស់មន្ទីរសុខាភិបាលខេត្តព្រះវិហារ ដើម្បីការពារសុខភាពប្រជាពលរដ្ឋ និងរួមចំណែកកាត់បន្ថយការរីករាលដាលជំងឺគ្រុនឈាមនៅក្នុងសហគមន៍៕