(បាត់ដំបង)៖ លោក សុខ លូ អភិបាលខេត្តបាត់ដំបង និងទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានហត្ថលេខាលើកិច្ចព្រមព្រៀងផ្ដល់ហិរញ្ញប្បទានឥតសំណងសម្រាប់គាំទ្រការអភិវឌ្ឍភូមិ ជំហាន២របស់គម្រោងការកសាងភូមិសន្តិភាពតាមរយៈការអភិវឌ្ឍសហគមន៍ជនបទចម្រុះ

ពិធីនេះក្រោមអធិបតីភាពលោក ឆាយ ឫទ្ធីសែន រដ្ឋមន្រ្តីក្រសួងអភិវឌ្ឍន៍ជនបទ និងលោក គីម ចាងយុង ឯកអគ្គរដ្ឋទូតកូរ៉េប្រចាំនៅកម្ពុជា ដោយមានការចូលរួមពីលោក សុខ លូ អភិបាលខេត្តបាត់ដំបង។

ក្នុងឱកាសនោះ លោក សុខ លូ បានបញ្ជាក់ថា គម្រោងភូមិសន្តិភាពបានចូលរួមយ៉ាងសំខាន់ក្នុងការអភិវឌ្ឍសហគមន៍ជនបទចម្រុះ ដោយផ្តោតលើអភិបាលកិច្ចល្អ ការអភិវឌ្ឍហេដ្ឋារចនាសម្ព័ន្ធជនបទ ការបង្កើនប្រាក់ចំណូលគ្រួសារ និងការធ្វើឱ្យប្រសើរឡើងនូវសុខភាព និងអនាម័យជនបទ។លោកបន្តថា សមិទ្ធផលទាំងនេះរួមមានការសាងសង់មណ្ឌលសុខភាព មជ្ឈមណ្ឌលសិក្សា ការជីក និងស្តារស្រះសហគមន៍ ការសាងសង់ស្ថានីយផលិតទឹកស្អាត និងរោងផ្ទះសំណាញ់ជាដើម។

លោកអភិបាលខេត្តបានចាត់ទុកសមិទ្ធផលទាំងនេះជាកិច្ចសហការដ៏រឹងមាំរវាងរដ្ឋបាលខេត្ត ក្រសួងអភិវឌ្ឍន៍ជនបទ និងអាជ្ញាធរមូលដ្ឋាន ក្រោមហិរញ្ញប្បទានដោយ KOICA ដែលបង្ហាញពីការកាត់បន្ថយភាពក្រីក្រ និងបង្កើនសកម្មភាពសេដ្ឋកិច្ចគ្រួសារ។ សមិទ្ធផលទាំងនេះមិនត្រឹមតែជាសំណង់រូបវន្តប៉ុណ្ណោះទេ ប៉ុន្តែក៏ជានិមិត្តរូបនៃកិច្ចសហប្រតិបត្តិការ មិត្តភាព សាមគ្គីភាព និងទំនុកចិត្តរវាងភាគីពាក់ព័ន្ធទាំងអស់។
គម្រោង «ការកសាងភូមិសន្តិភាពតាមរយៈការអភិវឌ្ឍសហគមន៍ជនបទចម្រុះ» គឺជាគំនិតផ្តួចផ្តើមរួមគ្នាផ្ដល់ហិរញ្ញប្បទានឥតសំណងដោយរដ្ឋាភិបាលនៃសាធារណរដ្ឋកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (KOICA) ក្រោមកិច្ចសហការសម្របសម្រួលអនុវត្តផ្ទាល់ដោយក្រសួងអភិវឌ្ឍន៍ជនបទ។ គម្រោងរយៈពេល៥ឆ្នាំនេះផ្តោតលើការអភិវឌ្ឍភូមិចំនួន៣០ នៅក្នុងខេត្តជាប់ព្រំដែនចំនួន៣ គឺខេត្តបាត់ដំបង បន្ទាយមានជ័យ និងប៉ៃលិន ដើម្បីកែលម្អលក្ខខណ្ឌរស់នៅរបស់ប្រជាពលរដ្ឋ និងលើកកម្ពស់បរិស្ថានរស់នៅប្រកបដោយសុវត្ថិភាព សន្តិភាព និងចីរភាព។

លោក សង្កត់ធ្ងន់ថា រដ្ឋបាលខេត្តបាត់ដំបង នឹងបន្តសហការយ៉ាងជិតស្និទ្ធជាមួយក្រសួងអភិវឌ្ឍន៍ជនបទ ដៃគូអភិវឌ្ឍន៍អាជ្ញាធរពាក់ព័ន្ធក្នុងការថែរក្សាគ្រប់គ្រង និងប្រើប្រាស់សមិទ្ធផលទាំងនេះឱ្យមានប្រសិទ្ធភាព និងនិរន្តរភាព ដើម្បីផ្ដល់ ផលប្រយោជន៍យូរអង្វែងដល់ប្រជាពលរដ្ឋ៕