(បាត់ដំបង)៖ រដ្ឋបាលខេត្តបាត់ដំបង នៅថ្ងៃទី៥ ខែសីហា ឆ្នាំ២០២៦ បានចេញសេចក្តីបំភ្លឺព័ត៌មានជាសាធារណៈ បន្ទាប់ពីមានការចោទសួរនៅលើបណ្តាញសង្គមហ្វេសប៊ុក អំពីការសាងសង់អគារពាណិជ្ជកម្មលើដីសួនច្បារមាត់ស្ទឹងសង្កែ ជាប់វិមានឯករាជ្យ។

រដ្ឋបាលខេត្តបានបញ្ជាក់ថា ទីតាំងទាំងនេះជាសំណង់របស់រដ្ឋ ដែលមានគោលបំណងទាក់ទាញអ្នកវិនិយោគ និងភ្ញៀវទេសចរជាតិ-អន្តរជាតិ។

យោងតាមសេចក្តីបំភ្លឺរបស់រដ្ឋបាលខេត្តបានឱ្យដឹងថា ក្រសួងសេដ្ឋកិច្ច និងហិរញ្ញវត្ថុ បានអនុញ្ញាតជាគោលការណ៍វិនិយោគធ្វើអាជីវកម្មចំណត និងទូកទេសចរណ៍ នៅស្ទឹងសង្កែ ក្រុងបាត់ដំបង តាមរយៈលិខិតលេខ ៥៣៩ សហវ.លស.អទច ចុះថ្ងៃទី២៧ ខែមករា ឆ្នាំ២០២៥។ គម្រោងនេះរួមមានការសាងសង់ចំណតទូកចំនួន ២ទីតាំង។ ទីតាំងទី១ គឺនៅជិតវេទិកាអុំទូក ដែលមានកន្លែងលក់ដូរ កន្លែងលក់សំបុត្រ និងកន្លែងរង់ចាំ ព្រមទាំងជណ្តើរបេតុងចុះស្ទឹង។ ចំណែកទីតាំងទី២ គឺនៅមាត់ស្ទឹងសង្កែ ចន្លោះពីបន្ទប់ទឹកសាធារណៈ និងស្ថានីយ៍បូមទឹកឆៅ ដែលមានកន្លែងលក់ដូរ កន្លែងរង់ចាំ និងជណ្តើរបេតុងចុះស្ទឹងដូចគ្នា។

ការសាងសង់អគារទាំងពីរទីតាំងនេះ ត្រូវបានពិនិត្យ និងវាយតម្លៃយ៉ាងល្អិតល្អន់ដោយគណៈកម្មការចម្រុះ ដែលមានការចូលរួមពីក្រសួងសេដ្ឋកិច្ច និងហិរញ្ញវត្ថុ រដ្ឋបាលខេត្ត និងមន្ទីរ អង្គភាពជំនាញពាក់ព័ន្ធ ដើម្បីធានាថាមិនប៉ះពាល់ដល់សោភ័ណភាពទីសាធារណៈឡើយ។ រដ្ឋបាលខេត្តបានសង្កត់ធ្ងន់ថា ការសាងសង់អគារលើដីរដ្ឋទាំងពីរនេះ គឺមានគោលការណ៍អនុញ្ញាតត្រឹមត្រូវពីក្រសួងសេដ្ឋកិច្ច និងហិរញ្ញវត្ថុ ហើយនៅពេលចប់អាណត្តិកិច្ចសន្យា អ្នកវិនិយោគត្រូវប្រគល់ទីតាំង និងសំណង់ទាំងអស់ជូនរដ្ឋគ្រប់គ្រងទុកជាទ្រព្យសម្បត្តិរដ្ឋវិញ ដោយគ្មានលក្ខខណ្ឌអ្វីឡើយ។ ដូច្នេះ សូមបងប្អូនប្រជាពលរដ្ឋ និងសាធារណជន មេត្តាជ្រាបជាព័ត៌មាន។