(បរទេស)៖ លោក Gianni Infantino បានចេញមកសុំទោសចំពោះ «កំហុសបច្ចេកទេស» ដែលលោកបានបង្កើតឡើង ពីគោលបំណងលក់ភាគហ៊ុនទៅឱ្យឯកជន ក្នុងប្រកួតសំខាន់ៗដែលត្រូវបានរំសាយចោលវិញនាពេលថ្មីៗនេះ ជាមួយនឹងការភ្ជាប់ក្នុងនាមជាប្រធាន FIFA ដដែលទៀតផង។

ការថ្លែងប្រកបដោយជំនឿជាក់ដែលត្រូវបានដកស្រង់ចេញផ្សាយដោយ BBC ថា បុរសវ័យ ៥៦ឆ្នាំសញ្ជាតិស្វីសរូបនេះ បានចាត់ទុក វាជាកំហុសបច្ចេកទេស និងគូសបញ្ជាក់ពីជំហរបន្តដឹកនាំ FIFA ថែមទៀត នៅក្នុងកិច្ចប្រជុំប្រតិបត្តិរបស់សហព័ន្ធ ស្ថិតក្នុងទីក្រុង Rabat ប្រទេសម៉ារ៉ុកកាលពីថ្ងៃពុធម្សិលមិញ។

កិច្ចប្រជុំថ្នាក់មន្រ្តីជាន់ខ្ពស់ FIFA ប្រចាំតំបន់អាហ្រ្វិកនេះដែរត្រូវបានរៀបចំឡើង ដើម្បីស្វែងរកការគាំទ្រក្នុងអាណត្តិទី៤ របស់លោកជាបន្តទៀត ក្រោយរងរលករិះគន់ជាខ្លាំង ជុំវិញគម្រោងលក់ភាគហ៊ុនព្រឹត្តិការណ៍បាល់ទាត់ពិភពលោក World Cup។

ទោះជាយ៉ាងណា ក្រោយពីកិច្ចប្រជុំដែលអូសបន្លាយដល់ទៅជាង ៤ម៉ោង សេចក្តីថ្លែងការណ៍រួមពីលោក Grafstrom និងក្រុមប្រឹក្សាភិបាលបានរំលេចថា «នៅតែបន្តគាំទ្រលោក Infantino ធ្វើជាប្រធាន FIFA យ៉ាងពេញទំហឹងដដែល»។

ទាំងលោក Infantino រួមទាំងលោក Grafstrom បានចុះហត្ថលេខារួមគ្នានៅលើសំបុត្រ ១ច្បាប់ ដែលបានផ្ញើជូនអនុប្រធាន និងសមាជិក FIFA ទាំង ២១១ប្រទេសទាំងអស់ ដោយបានទទួលស្គាល់នូវ «កំហុសឆ្គាំឆ្គង និងប្តេជ្ញាថា នឹងមិនឱ្យកើតមានឡើងម្តងទៀតឡើយ»។

លោក Gianni Infantino ធ្លាប់បានប្រកាសហើយថា នឹងបន្តឈរឈ្មោះបោះឆ្នោតក្នុងអាណត្តិទី៤ របស់លោកទៀត សម្រាប់អាណត្តិឆ្នាំ ២០២៧-២០៣១ ដែលនឹងបោះឆ្នោតនាអំឡុងខែមីនា ឆ្នាំ២០២៧ ខាងមុខ ក្រោយពេលដឹកនាំស្ថាប័នកំពូលបាល់ទាត់មួយនេះអស់ជាង ១០ឆ្នាំ ដែលជំនួសតំណែងលោក Sepp Blatter ដែលមានសញ្ជាតិស្វីសដូចគ្នា៕