(ភ្នំពេញ)៖ លោកឧត្តមអគារនុរក្សថ្នាក់លេខ១ នុត សវនា អគ្គនាយករង និងជាប្រធានមណ្ឌលអប់រំកែប្រែទី១ (ពន្ធនាគារព្រៃស) នៅព្រឹកថ្ងៃទី៦ ខែសីហា ឆ្នាំ២០២៦នេះ បានចេញមកទាត់ចោលទាំងស្រុង នូវលិខិតក្លែងក្លាយ ដែលបង្ហោះនៅតាមបណ្ដាញសង្គមដោយគណនីក្លែងក្លាយ ករណីទណ្ឌិត ស្រី ស៉ីណា ដែលប្រឌិតថា មានការឯកភាពឲ្យបញ្ជូនទៅសម្រាកព្យាបាលនៅមន្ទីរពេទ្យមិត្តភាពខ្មែរសូវៀត ក្រោមរោគវិនិច្ឆ័យ មហារីកថ្លើម។

ថ្លែងប្រាប់បណ្ដាញព័ត៌មាន Fresh News លោក នុត សវនា បានអះអាងបែបនេះថា «នោះជាឯកសារក្លែងក្លាយ ហើយទណ្ឌិត ស្រី ស៉ីណា មិនត្រូវបានបញ្ជូនទៅសម្រាកព្យាបាល នៅមន្ទីរពេទ្យក្រៅពន្ធនាគារនោះទេ ហើយក៏មិនធ្លាប់ត្រូវបានបញ្ជូនទៅពិនិត្យព្យាបាលនៅមន្ទីរពេទ្យនោះឡើយ»។

សូមជម្រាបថា ឃាតក ស្រី ស៊ីណា ត្រូវបានមហាជនស្គាល់យ៉ាងច្បាស់ចំពោះអំពើសាហាវរបស់ខ្លួន ដែលបានបាញ់សម្លាប់ជនរងគ្រោះនៅខណ្ឌច្បារអំពៅកាលពីឆ្នាំ២០២៤។ លោក ស្រី ស៊ីណា អតីតឧកញ៉ា ត្រូវបានតុលាការសម្រេចផ្តន្ទាទោសដាក់ពន្ធនាគារ ចំនួន៣១ឆ្នាំ និងបង្គាប់ឲ្យសងសំណង២លានដុល្លារដល់ជនរងគ្រោះដែលបានស្លាប់ និង៥០ម៉ឺនដុល្លារទៀតដល់អ្នករងរបួស។

សាលាដំបូងរាជធានីភ្នំពេញ បានប្រកាសសាលក្រមនេះនៅថ្ងៃទី២៣ ខែធ្នូ ឆ្នាំ២០២៤។ លោក ស្រី ស៊ីណា ត្រូវបានចោទប្រកាន់លើសំណុំរឿងព្រហ្មទណ្ឌចំនួន៣ រួមមាន៖ បទឃាតកម្ម និងបទរំលោភលើលំនៅដ្ឋាន៕