(ភ្នំពេញ)៖ ថ្នាក់ដឹកនាំសកលវិទ្យាល័យ​ ចេនឡា បានសម្រេចផ្តល់ជូនអាហារូបករណ៍ចំនួន ១២កន្លែង តាមរយៈលោក នេត្រ ភត្ត្រា រដ្ឋមន្ត្រីក្រសួងព័ត៌មាន សម្រាប់ជំនាញសុខាភិបាល និងជំនាញផ្សេងទៀតដើម្បីគាំទ្រដល់កិច្ចខិតខំប្រឹងប្រែងក្នុងការគាំទ្រដល់មន្ត្រីរាជការ បុគ្គលិក ព្រមទាំងកូនចៅរបស់មន្ត្រីរាជការ និងបុគ្គលិកដែលមានជីវភាពខ្វះខាត។

ការប្រកាសនេះត្រូវបានធ្វើឡើងក្នុងឱកាសដែលលោក នេត្រ ភត្ត្រា បានអនុញ្ញាតឱ្យលោកបណ្ឌិត អ៉ី លីម៉ា សាកលវិទ្យាធិការសាកលវិទ្យាល័យចេនឡា ជួបសម្តែងការគួរសម និងនាំអាហារូបករណ៍ថ្នាក់បរិញ្ញាបត្ររង និងថ្នាក់បរិញ្ញាបត្រ សម្រាប់ឆ្នាំសិក្សា២០២៦-២០២៧ ជូនក្រសួងព័ត៌មាន។

លោកបណ្ឌិត អ៉ី លីម៉ា បានបញ្ជាក់ថាអាហារូបករណ៍ចែកចេញជាទី១៖ កម្រិតបរិញ្ញាបត្ររង ឬបរិញ្ញាបត្រសម្រាប់ជំនាញសុខាភិបាល៖ អាហារូបករណ៍ ៥០%ចំនួន ០២កន្លែង សិក្សាមួយចប់កម្មវិធីសិក្សា, ទី២៖ កម្រិតបរិញ្ញាបត្ររង ឬបរិញ្ញាបត្រសម្រាប់ជំនាញក្រៅពីសុខាភិបាល៖ អាហារូបករណ៍ពិសេស ១០០% ចំនួន ១០កន្លែង សិក្សា មួយចប់កម្មវិធីសិក្សា (មិនមានបង់ថ្លៃសេវារដ្ឋបាលផ្សេងៗ បន្ថែមទៀតទេ)។

លោករដ្ឋមន្ត្រី នេត្រ ភក្ត្រា បានសម្តែងការកោតសរសើរ និងលើកទឹកចិត្តចំពោះសាកលវិទ្យាល័យចេនឡា ដែលបានដើរតួនាទីយ៉ាងសំខាន់ក្នុងការរួមចំណែកជាមួយរាជរដ្ឋាភិបាល លើកកម្ពស់វិស័យអប់រំ និងអភិវឌ្ឍធនធានមនុស្សនៅកម្ពុជា​ លើវិស័យសុខាភិបាល តាមរយៈការផ្តល់អាហារូបករណ៍ដល់និស្សិតក្រីក្រ។

លោកបណ្ឌិត អ៉ី លីម៉ា បានលើកឡើងថា ការផ្តល់អាហារូបករណ៍ជូនក្រសួងព័ត៌មាន គឺជាការចូលរួមចំណែកដ៏សំខាន់របស់សាកលវិទ្យាល័យចេនឡា ក្នុងការគាំទ្រដល់ការអភិវឌ្ឍវិស័យអប់រំ និងការកសាងធនធានមនុស្ស។

លោកបណ្ឌិតក៏បានបង្ហាញក្តីសង្ឃឹមថា អាហារូបករណ៍ទាំងនេះនឹងជួយសម្រាលបន្ទុកផ្នែកហិរញ្ញវត្ថុដល់ក្រុមគ្រួសាររបស់និស្សិត និងរួមចំណែកផលិតធនធានមនុស្សដែលមានសមត្ថភាពឆ្លើយតបនឹងតម្រូវការអភិវឌ្ឍសង្គម និងសេដ្ឋកិច្ចជាតិ។

ក្នុងឱកាសនោះ លោករដ្ឋមន្ត្រី នេត្រ ភក្ត្រា បានថ្លែងអំណរគុណ និងវាយតម្លៃខ្ពស់ចំពោះថ្នាក់ដឹកនាំសាកលវិទ្យាល័យចេនឡា ដែលបានចូលរួមជាមួយរាជរដ្ឋាភិបាលក្នុងការលើកកម្ពស់វិស័យអប់រំ។

លោករដ្ឋមន្ត្រីបានគូសបញ្ជាក់ថា ការអប់រំគឺជាគ្រឹះដ៏សំខាន់សម្រាប់ការអភិវឌ្ឍមនុស្ស និងប្រទេសជាតិ ហើយការផ្តល់អាហារូបករណ៍នាពេលនេះ គឺជាកាយវិការដ៏មានអត្ថន័យ ដែលមិនត្រឹមតែជួយសម្រាលបន្ទុកផ្នែកហិរញ្ញវត្ថុប៉ុណ្ណោះទេ ប៉ុន្តែថែមទាំងបើកទ្វារឱកាសឱ្យមន្ត្រីរាជការ បុគ្គលិក និងកូនចៅរបស់ពួកគេដែលមានជីវភាពខ្វះខាត អាចបន្តការសិក្សាថ្នាក់ឧត្តមសិក្សា ពង្រឹងចំណេះដឹង ជំនាញ និងសមត្ថភាព ដើម្បីបំពេញភារកិច្ចបម្រើជាតិ និងប្រជាពលរដ្ឋឱ្យកាន់តែមានប្រសិទ្ធភាព។

លោករដ្ឋមន្ត្រី នេត្រ ភក្ត្រា បានបន្ថែមថា ក្រសួងព័ត៌មានតែងតែយកចិត្តទុកដាក់លើការអភិវឌ្ឍធនធានមនុស្ស ដោយជំរុញការបណ្តុះបណ្តាល និងការសិក្សាពេញមួយជីវិត ស្របតាមយុទ្ធសាស្ត្ររបស់រាជរដ្ឋាភិបាល។

បន្ថែមពីនេះ លោករដ្ឋមន្ត្រិី នេត្រ ភក្ត្រា បានបញ្ជាក់ថា ក្រសួងនឹងធ្វើការផ្សព្វផ្សាយអំពីអាហារូបករណ៍នេះឱ្យបានទូលំទូលាយ ដើម្បីឱ្យមន្ត្រីរាជការ បុគ្គលិក និងកូនចៅដែលមានលក្ខខណ្ឌសមស្រប ទទួលបានឱកាសបន្តការសិក្សា និងអភិវឌ្ឍខ្លួនឱ្យក្លាយជាធនធានមនុស្សប្រកបដោយគុណភាព សម្រាប់បម្រើការអភិវឌ្ឍវិស័យព័ត៌មាន និងប្រទេសជាតិ៕