(ភ្នំពេញ)៖ កូនសិស្សកម្ពុជាតាមរយៈការបង្ហាញសមត្ថភាពរបស់ខ្លួន លើឆាកអន្តរជាតិក្នុងកម្មវិធី Teeneagle Competition ដែលជាការប្រកួតប្រជែងកំរិតភាសាអង់គ្លេសលំដាប់អន្តរជាតិ ធ្វើឡើងនៅសហរដ្ឋអាមេរិក ដែលមានកូនសិស្សជាច្រើន មកពីជុំវិញពិភពលោកចូលរួមប្រកួត, កូនសិស្សកម្ពុជា ០៩នាក់ បានធ្វើការប្រកួតយ៉ាងស្វិតស្វាញ និងដណ្តើមបានពានរង្វាន់ មេដាយមាស មេដាយប្រាក់ និងមេដាយសំរឹទ្ធ រួមទាំងទទួលបានចំណាត់ថ្នាក់ល្អៗជាច្រើនទៀត។

នាឱកាសនាំយកជយលាភី និងមេដាយជូនជាតិ នាថ្ងៃទី០៤ ខែសីហា ឆ្នាំ២០២៦ តំណាងសិស្សកម្ពុជា បានវាយតម្លៃខ្ពស់ពីការប្រកួតលំដាប់ថ្នាក់អន្តរជាតិនេះ និងបញ្ជាក់ពីការខិតខំប្រឹងប្រែងរៀនសូត្រ ដេីម្បីត្រៀមខ្លួនជាស្រេច មុនឈានដល់ការប្រកួត និងទទួលបានភាពជោគជ័យដូចនេះ និងបានលើកទឹកចិត្តសិស្សប្អូនជំនាន់ក្រោយ ខិតខំពង្រឹងសមត្ថភាពរបស់ខ្លួនឱ្យបានខ្លាំង និងរកឱកាសបង្កើតភាពក្លាហ៊ានក្នុងការចូលរួមប្រកួតប្រជែងលើកម្មវិធីដែលមានលក្ខណៈលំដាប់ថ្នាក់ពិភពលោក ដើម្បីបានបង្ហាញសមត្ថភាព​ឱ្យបរទេសបានឃើញពីសមត្ថភាពរបស់កូនខ្មែរ ដែលជាក់ស្តែងកូនខ្មែររាល់ពេលចូលរួមប្រកួតប្រជែងនៅក្រៅប្រទេស តែងតែទទួលបានភាពជោគជ័យជាបន្តបន្ទាប់ផងដែរ។

តំណាងសិស្សជយលាភី ក៏បានថ្លែងអរគុណដល់ B RIGHT EDUCATION CO.,LTD ដែលបានរៀបចំការប្រកួតប្រជែងរបស់សិស្ស ដេីម្បីឱ្យកូនសិស្សខ្មែរ មានឱកាសបញ្ចេញសមត្ថភាពលេីឆាគអន្តរជាតិ និងលេីកទឹកចិត្តឱ្យក្រុមហ៊ុន បន្តរៀបចំកម្មវិធីដូចនេះឱ្យបានកាន់តែច្រេីនបន្ថែមទៀត ដេីម្បីលេីកទឹកចិត្ត និងផ្តល់ភាពក្លាហាន សម្រាប់កូនសិស្សកម្ពុជា បានប្រកួតលេីឆាគអន្តរជាតិបន្តទៀត។

បើតាមក្រុមការងាររបស់ B RIGHT EDUCATION CO.,LTD បានឱ្យដឹងដែរថាកម្មវិធី Teeneagle Competition គឺជាការប្រកួតប្រជែងកំរិតភាសាអង់គ្លេស ដែលបានធ្វើការប្រកួតលើវិញ្ញាសារ Speaking Debate, spelling bee, writing and knowledge quiz ដែលមានកូនសិស្សជាច្រើនចូលរួមមកពីជុំវិញពិភពលោក, ភាពជោគជ័យរបស់កូនសិស្សខ្មែរនាពេលនេះ បានបង្ហាញឱ្យឃើញថា សិស្សកម្ពុជា ពិតជាមានសមត្ថភាពខ្លាំងពូកែគួរកត់សម្គាល់ បើធៀបនិងសិស្សអន្តរជាតិមកពីបណ្តាលប្រទេសផ្សេងៗ ជាក់ស្តែងសិស្សកម្ពុជាដែលបានចូលរួមប្រកួតប្រជែង ពួកគាត់ដណ្តើមបានមេដាយមាស ប្រាក់ និងសំរិទ្ធ និងទទួលបានចំណាត់ថ្នាក់ល្អៗជាច្រើនទៀត។

កូនសិស្សកម្ពុជា ដែលបានចូលរួមប្រកួតប្រជែងកំរិតភាសាអង់គ្លេសលំដាប់អន្តរជាតិ នៅសហរដ្ឋអាមេរិក ដណ្តើមបានមេដាយមាស ៦ មេដាយប្រាក់ ៥ និងមេដាយសំរឹទ្ធចំនួន៦ និងពានរង្វាន់ Overall 1st place teeneagle 3 , Overall 1st place TMC 4 , 1st place spelling Bee Teeneagle 3 , 2nd place spelling bee Teeneagle 2 , 3rd place spelling bee Teeneagle 2 , 1st place debate teeneagle 3 , 3rd place writing teeneagle 3 , 2nd place writing teeneagle 3 , 3rd place writing teeneagle 2 ។

សូមបញ្ជាក់ថា នៅក្នុងយុទ្ធសាស្រ្តបញ្ចាកោណដំណាក់កាលទី១, រាជរដ្ឋាភិបាលនីតិកាលទី៧ នៃរដ្ឋសភា នឹងបន្តរក្សាសន្តិភាព ស្ថិរភាព និងទ្រទ្រង់ដំណើរការវិវឌ្ឍន៍តទៅមុខ គឺឈរលើវិថីអភិវឌ្ឍប្រកដោយគុណភាព និងចីរភាព ក្នុងនោះសម្រាប់ក្រសួងអប់រំ យុវជន និងកីឡា នៅក្នុងឆ្នាំ២០៥នេះ រាជរដ្ឋាភិបាលចំណាយថវិកាដ៏ច្រើនសន្ធឹកសន្ធាប់ សម្រាប់ការអប់រំក្នុងប្រព័ន្ធ, ក្រៅប្រព័ន្ធ, ការអភិវឌ្ឍឧត្តមសិក្សា និងស្រាវជ្រាវ, ការអភិវឌ្ឍវិស័យអប់រំកាយ និងកីឡា, ការអភិវឌ្ឍជំនាញបច្ចេកទេស ជំនាញទន់ និងសហគ្រិនភាពសម្រាប់យុវជន និងការគាំទ្រសេវាអប់រំ និងអភិបាលកិច្ចល្អផងដែរ៕