(កំពង់ស្ពឺ)៖ ដើម្បីពន្លឿនការអន្តរាគមន៍ និងជួយសង្គ្រោះប្រជាពលរដ្ឋឱ្យបានទាន់ពេលវេលា បញ្ជាការដ្ឋានកងរាជអាវុធហត្ថខេត្តកំពង់ស្ពឺ បានប្រកាសដាក់ឲ្យប្រើប្រាស់លេខទូរស័ព្ទអន្តរាគមន៍សង្គ្រោះបន្ទាន់ ១២៩២ ដែលត្រៀមរួចជាស្រេចសម្រាប់ទទួលព័ត៌មាន និងផ្តល់ការអន្តរាគមន៍ ២៤ម៉ោងលើ២៤ម៉ោង ជូនដល់បងប្អូនប្រជាពលរដ្ឋទាំងអស់នៅក្នុងភូមិសាស្ត្រខេត្តកំពង់ស្ពឺ។

លេខទូរស័ព្ទ ១២៩២ នេះ គឺជាខ្សែទូរស័ព្ទបន្ទាន់ដែលប្រជាពលរដ្ឋអាចទាក់ទងបានភ្លាមៗ ក្នុងករណីប្រទះឃើញ ឬរងគ្រោះដោយសារបទល្មើស ឬហេតុការណ៍បន្ទាន់នានា។

ក្នុងនោះរួមមាន បទល្មើសព្រហ្មទណ្ឌគ្រប់ប្រភេទ ល្បែងស៊ីសងខុសច្បាប់ បទល្មើសគ្រឿងញៀន សកម្មភាពក្រុមក្មេងទំនើង អំពើហិង្សាក្នុងគ្រួសារ គ្រោះថ្នាក់ គ្រោះមហន្តរាយ ឬហេតុការណ៍បន្ទាន់ផ្សេងៗ ក៏ដូចជារាល់សកម្មភាពដែលប៉ះពាល់ដល់សន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។

បញ្ជាការដ្ឋានកងរាជអាវុធហត្ថខេត្តកំពង់ស្ពឺ បានធានាថា រាល់ព័ត៌មានដែលបងប្អូនប្រជាពលរដ្ឋផ្តល់ជូន នឹងត្រូវរក្សាការសម្ងាត់ជាដាច់ខាត និងចាត់វិធានការអន្តរាគមន៍ឱ្យបានឆាប់រហ័ស ស្របតាមច្បាប់ និងនីតិវិធីជាធរមាន។

ការដាក់ឲ្យប្រើប្រាស់លេខទូរស័ព្ទបន្ទាន់នេះ គឺដើម្បីលើកកម្ពស់ប្រសិទ្ធភាពការងាររក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ឲ្យកាន់តែល្អប្រសើរ។

ការអំពាវនាវដល់បងប្អូនប្រជាពលរដ្ឋទាំងអស់ ចូលរួមផ្តល់ព័ត៌មាន និងសហការជាមួយកងរាជអាវុធហត្ថ គឺដើម្បីរួមចំណែកថែរក្សាសន្តិសុខសង្គមប្រកបដោយចីរភាព។