(ព្រះវិហារ)៖ ក្រុមហ៊ុន អេមរុ រ៉ាយស៍ និងសហគមន៍កសិកម្មចំនួន ២៨ ក្នុងខេត្តព្រះវិហារ បានចុះហត្ថលេខាលើកិច្ចសន្យាទិញ-លក់ស្រូវសរីរាង្គ រវាងព្រមទាំងកិច្ចសន្យាទិញ-លក់ដំឡូងមីសរីរាង្គរវាងក្រុមហ៊ុនសាជីវកម្មសហគមន៍កសិកម្មកម្ពុជា (CACC)និងសហគមន៍កសិកម្មផងដែរ។

ពិធីនេះរៀបចំឡើងក្រោមអធិបតី លោក មាស ពិសិដ្ឋ រដ្ឋលេខាធិការ តំណាងលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក គីម រិទ្ធី អភិបាល នៃគណៈអភិបាលខេត្តព្រះវិហារ លោកឧកញ៉ា សុង សារ៉ន អគ្គនាយកក្រុម AMRU RICE កម្ពុជា លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា និងលោក នួន ដេ ប្រធានសហភាពសហគមន៍កសិកម្មព្រះវិហារមានជ័យ (PMUAC) ដែលបានរៀបចំឡើងនៅថ្ងៃទី៧ ខែសីហា ឆ្នាំ២០២៦។

កិច្ចសន្យាកសិកម្មនាពេលនេះ គឺជាជំហានយុទ្ធសាស្ត្រយ៉ាងសំខាន់ ក្នុងការឆ្លើយតបទៅនឹងគោលនយោបាយអភិវឌ្ឍន៍វិស័យកសិកម្មរបស់រាជរដ្ឋាភិបាលកម្ពុជា។ កិច្ចសហប្រតិបត្តិការនេះផ្តោតលើការធានាទីផ្សារ និងស្ថិរភាពតម្លៃ ដោយបង្កើនទំនុកចិត្តជូនប្រជាកសិករក្នុងសហគមន៍ តាមរយៈការកំណត់តម្លៃទិញ លក់សមរម្យ ច្បាស់លាស់ និងមានស្ថិរភាព។

ទន្ទឹមនឹងនេះ ក៏មានគោលបំណងលើកកម្ពស់ស្តង់ដារកសិកម្មសរីរាង្គ ដោយជំរុញការដាំដុះស្រូវ និងដំឡូងមីឱ្យស្របតាមបទដ្ឋានបច្ចេកទេស និងស្តង់ដារអន្តរជាតិ ដើម្បីឆ្លើយតបទៅនឹងតម្រូវការទីផ្សារនាំចេញ ព្រមទាំងចូលរួមលើកកម្ពស់ជីវភាពរស់នៅរបស់កសិករក្នុងខេត្តព្រះវិហារឱ្យកាន់តែប្រសើរឡើងជាលំដាប់។

នាឱកាសនោះដែរ លោក គីម រិទ្ធី បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចសហប្រតិបត្តិការជិតស្និទ្ធ រវាងអាជ្ញាធរដែនដី មន្ទីរជំនាញ ផ្នែកឯកជន និងសហគមន៍កសិកម្ម ដែលបានរួមគ្នាយ៉ាងសកម្មក្នុងការជួយជ្រោមជ្រែង និងជំរុញខ្សែច្រវាក់ផលិតកម្មកសិកម្មក្នុងខេត្តព្រះវិហារ ឱ្យកាន់តែមានភាពរឹងមាំ និងចីរភាព។

បើតាមលោកឧកញ៉ា សុង សារ៉ន បានឱ្យដឹងថា ក្នុងឆ្នាំ២០២៦នេះ ក្រុមហ៊ុនអេមរុរសយស៍ ប្តេជ្ញាទទួលទិញស្រូវសរីរាង្គចំនួន ៤០,០០០តោន គិតជាថវិកាប្រហែលជាង ១២លានដុល្លាសហរដ្ឋអាមេរិច ពីកសិករជាង ៣,៥០០គ្រួសារ ក្នុងសហគមន៍កសិកម្មចំនួន ២៨ នៅខេត្តព្រះវិហារ។

លោកឧកញ៉ា បានបន្តថា «កសិកម្មតាមកិច្ចសន្យា មិនមែនគ្រាន់តែជាការធានាទីផ្សារសម្រាប់កសិករប៉ុណ្ណោះទេ ប៉ុន្តែជាការកសាង ទំនុកចិត្ត ភាពជាដៃគូ និងការរីកចម្រើនរួមគ្នា រវាងកសិករ សហគមន៍ វិស័យឯកជន និងរាជរដ្ឋាភិបាល ដើម្បីជួយលើកកម្ពស់គុណភាពផលិតផល បង្កើនប្រាក់ចំណូលគ្រួសារកសិករ ពង្រឹងការតាមដានប្រភពដើម និងបង្កើនការប្រកួតប្រជែងរបស់កសិផលកម្ពុជានៅលើទីផ្សារអន្តរជាតិ៕