(ព្រះវិហារ)៖ មន្ទីរសុខាភិបាលខេត្តព្រះវិហារ កាលពីព្រឹកថ្ងៃទី៧ ខែសីហា ឆ្នាំ២០២៦ បានបើកវគ្គបណ្តុះបណ្តាលស្តីពី ការព្យាបាល និងការថែទាំជំងឺគ្រុនឈាម ក្នុងគោលបំណងពង្រឹងសមត្ថភាពមន្ត្រីសុខាភិបាល ដើម្បីឆ្លើយតបឱ្យកាន់តែមានប្រសិទ្ធភាពចំពោះការកើនឡើងនៃជំងឺគ្រុនឈាមនៅក្នុងខេត្ត និងទូទាំងប្រទេស។

វគ្គនេះបានប្រព្រឹត្តទៅក្រោមអធិបតីភាពលោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ រួមជាមួយលោកសាស្ត្រាចារ្យ យ៉ៃ ចន្ទនា ប្រធានមន្ទីរពេទ្យជ័យវរ្ម័នទី៧ ខេត្តសៀមរាប។

វគ្គបណ្តុះបណ្តាលនេះបានផ្តោតលើប្រធានបទសំខាន់ៗជាច្រើន រួមមាន ការគ្រប់គ្រងជំងឺគ្រុនឈាមលើកុមារ ដោយលោកវេជ្ជបណ្ឌិតឯកទេសរោគកុមារ នុត សុធា ការគ្រប់គ្រងជំងឺគ្រុនឈាមលើស្ត្រីមានផ្ទៃពោះ ដោយលោកស្រីវេជ្ជបណ្ឌិត ស៊ឹម ចាន់សុភត្រា ការបង្ហាញករណីសិក្សាជាក់ស្តែង និងការថែទាំអ្នកជំងឺគ្រុនឈាម។ ខ្លឹមសារទាំងនេះមានសារៈសំខាន់ណាស់ក្នុងការបង្កើនចំណេះដឹង និងជំនាញជាក់ស្តែងដល់សិក្ខាកាម។

ក្នុងឱកាសនោះ លោកវេជ្ជបណ្ឌិត គួង ឡូ បានថ្លែងលើកឡើងថា បច្ចុប្បន្នខេត្តព្រះវិហារ ក៏ដូចជាស្ទើរទូទាំងប្រទេសកម្ពុជា កំពុងប្រឈមនឹងការកើនឡើងនៃការរាតត្បាតជំងឺគ្រុនឈាម។ ដូច្នេះ មន្ត្រីសុខាភិបាលគ្រប់លំដាប់ថ្នាក់ ត្រូវរួមសហការគ្នាអនុវត្តវិធានការទប់ស្កាត់ និងឆ្លើយតបឱ្យបានទាន់ពេលវេលា ដើម្បីកាត់បន្ថយការឆ្លងរាលដាល និងអត្រាស្លាប់ពីជំងឺនេះ។

លោកបានសង្កត់ធ្ងន់លើសសរស្តម្ភសំខាន់ពីរ គឺការការពារ និងការព្យាបាល ដោយការការពារតាមរយៈការដាក់ថ្នាំអាល់ប៉ែត ការអប់រំផ្សព្វផ្សាយ និងការបាញ់ថ្នាំសម្លាប់មូសខ្លា គឺជាវិធានការដែលមានប្រសិទ្ធភាព និងចំណាយតិច។

លោកប្រធានមន្ទីរសុខាភិបាល ក៏បានអំពាវនាវឱ្យមន្ត្រីសុខាភិបាលទាំងអស់អនុវត្តការងារដោយភាពសកម្ម និងបុរេសកម្ម មិនត្រូវរង់ចាំរហូតដល់មានការផ្ទុះរាតត្បាតទើបចុះអន្តរាគមន៍នោះទេ ប៉ុន្តែត្រូវចាប់ផ្តើមសកម្មភាព ការពារតាំងពីមុន ដោយសហការយ៉ាងជិតស្និទ្ធជាមួយអាជ្ញាធរ និងប្រជាពលរដ្ឋនៅតាមសហគមន៍។

ជាមួយគ្នានេះ លោកបានណែនាំឱ្យពង្រឹងការត្រួតពិនិត្យគុណភាពនៃការដាក់ថ្នាំអាបែតតាមពាងទឹករបស់ប្រជាពលរដ្ឋ ដើម្បីធានាប្រសិទ្ធភាពនៃការទប់ស្កាត់ជំងឺគ្រុនឈាម។ ការបណ្តុះបណ្តាលនេះរំពឹងថានឹងរួមចំណែកយ៉ាងសំខាន់ក្នុងការកាត់បន្ថយបន្ទុកជំងឺគ្រុនឈាមនៅក្នុងសហគមន៍៕