(បន្ទាយមានជ័យ)៖ កងរាជអាវុធហត្ថខេត្តបន្ទាយមានជ័យ បានបញ្ជូនជនសង្ស័យម្នាក់ទៅសាលាដំបូងខេត្ត ដើម្បីអនុវត្តតាមនីតិវិធី ពាក់ព័ន្ធករណីប្រទូស្តកេរ្តិ៍ខ្មាស (ស្ថានទម្ងន់ទោស) លើអនីតិជន។ ជនសង្ស័យឈ្មោះ ជេស សង្អៃ អាយុ ៣៤ឆ្នាំ ជនជាតិខ្មែរ ជាគ្រូបង្រៀននៅវិទ្យាល័យប៉ោយប៉ែតក្រុង ត្រូវបានឃាត់ខ្លួនបន្ទាប់ពីប្រព្រឹត្តបទល្មើសកាលពីថ្ងៃទី៤ ខែសីហា ឆ្នាំ២០២៦ នៅចំណុចសាលាវិទ្យាល័យប៉ោយប៉ែតក្រុង ស្ថិតក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត។

កាលពីវេលាម៉ោង១០ព្រឹក ថ្ងៃទី០៥ ខែសីហា ឆ្នាំ២០២៦ មន្ត្រីរដ្ឋបាលក្រុងប៉ោយប៉ែត ដឹកនាំដោយលោកស្រី រុន រចនា ប្រធានគណៈកម្មការកិច្ចការស្ត្រី និងកុមារក្រុងប៉ោយប៉ែត បាននាំកុមារីរងគ្រោះអាយុ ១៦ឆ្នាំ មកដាក់ពាក្យបណ្ដឹង។ ក្រោយទទួលបានពាក្យបណ្ដឹង កម្លាំងមូលដ្ឋានកងរាជអាវុធហត្ថក្រុងប៉ោយប៉ែត សហការជាមួយលោកនាយកសាលា បានចុះឃាត់ខ្លួនជនសង្ស័យភ្លាមៗ។

លោកអនុសេនីយ៍ឯក តិល តៃលីវ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានបញ្ជាក់ថា ក្រោយការសួរនាំ ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពដូចការចោទប្រកាន់ពិតប្រាកដមែន។ ដោយផ្អែកលើចម្លើយសារភាពនេះ កម្លាំងមូលដ្ឋានកងរាជអាវុធហត្ថក្រុង បានកសាងសំណុំរឿងបញ្ជូនបន្តមកកាន់បញ្ជាការដ្ឋានកងរាជអាវុធហត្ថខេត្ត ដើម្បីចាត់ការតាមនីតិវិធី។

ការបង្ក្រាបករណីនេះ គឺស្ថិតក្រោមការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត។ បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្ត ដើម្បីបន្តនីតិវិធីច្បាប់៕