(ភ្នំពេញ)៖ ការពង្រឹងស្តង់ដារផលិតផល គឺជាកត្តាចាំបាច់ និងជាយុទ្ធសាស្ត្រដ៏សំខាន់មួយ សម្រាប់ជំរុញកំណើនសេដ្ឋកិច្ចជាតិ លើកកម្ពស់ភាពប្រកួតប្រជែងរបស់សហគ្រាស និងធានាសុវត្ថិភាពជូនអ្នកប្រើប្រាស់។

ការពង្រឹងស្តង់ដារផលិតផល មិនត្រឹមតែជាការបំពេញកាតព្វកិច្ចប៉ុណ្ណោះទេ ប៉ុន្តែជាការវិនិយោគរយៈពេលវែង ដែលនាំមកនូវផលប្រយោជន៍ជាច្រើន ទាំងសម្រាប់សហគ្រាស អ្នកប្រើប្រាស់ និងសេដ្ឋកិច្ចជាតិទាំងមូល។

ឧកញ៉ាបណ្ឌិត ឈិន កេន អនុប្រធានក្រុមប្រឹក្សាភិបាល សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានមានប្រសាសន៍ថា ការពង្រឹងស្តង់ដារផលិតផលក្នុងស្រុក គឺជាគន្លឹះដ៏សំខាន់ ដើម្បីអាចជំនួសផលិតផលនាំចូលបាន។

លោកបានសង្កត់ធ្ងន់ថា «បើទោះបីជាស្តង់ដាររបស់យើងមិនទាន់ដល់កម្រិត ដូចផលិតផលនាំចូលក៏ដោយ ក៏យើងត្រូវតែបន្តពង្រឹងខ្លួនបន្តិចម្តងៗ ដើម្បីឲ្យមានស្តង់ដារកាន់តែប្រសើរឡើង»។

លោកបានបន្ថែមថា កង្វះខាតស្តង់ដារផលិតផល នឹងធ្វើឲ្យអ្នកទិញពិបាកក្នុងការគាំទ្រ។ ដូច្នេះ លោកបានសំណូមពរឲ្យគ្រប់ភាគីពាក់ព័ន្ធ គិតគូរឲ្យបានស៊ីជម្រៅអំពីស្តង់ដារនេះ ដោយរក្សា ពង្រឹង និងព្យាយាមអភិវឌ្ឍឲ្យប្រសើរជាងមុន ដើម្បីឲ្យគុណភាពផលិតផលរបស់យើងកាន់តែមានភាពជឿជាក់ដល់អ្នកប្រើប្រាស់។ អ្នកប្រើប្រាស់នឹងអាចប្តូរចិត្ត ប្រសិនបើផលិតផលខ្វះស្តង់ដារ ពោលគឺមិនត្រូវពង្រឹងតែក្នុងរយៈពេលខ្លី ហើយទម្លាក់ស្តង់ដារវិញនោះទេ។

ជាមួយគ្នានេះ លោកក៏បានលើកឡើងផងដែរ ពីបញ្ហាប្រឈមរបស់ក្រសួងដែលជាស្ថាប័នចេញស្តង់ដារ ដោយសារមានការងារច្រើនក្នុងពេលតែមួយ ដែលធ្វើឱ្យមានការរាំងស្ទះ។ ហេតុនេះ លោកបានស្នើឲ្យមានការចូលរួមពីវិស័យឯកជន ជាពិសេសមន្ទីរពិសោធន៍ដែលមានសមត្ថភាព និងត្រូវបានទទួលស្គាល់ដោយរដ្ឋ ដើម្បីជួយសម្រួលដល់ដំណើរការនៃការធ្វើសំណាក និងការចេញលទ្ធផល ដែលនឹងរួមចំណែកដល់ការជំរុញការពង្រឹងទីផ្សារផលិតផលក្នុងស្រុកឲ្យកាន់តែមានគុណភាព និងភាពប្រកួតប្រជែងខ្ពស់៕

សូមស្តាប់ការលើកឡើងរបស់ឧកញ៉ាបណ្ឌិត ឈិន កេន៖