(ព្រះសីហនុ)៖ មន្ត្រីជំនាញនៃមន្ទីរបរិស្ថានខេត្តព្រះសីហនុ សហការជាមួយអាជ្ញាធរសង្កាត់លេខ១ និងលោកមេភូមិ៣ (ទំនប់រលក) បានចុះពិនិត្យ និងស្រាវជ្រាវករណីទឹកសមុទ្រឡើងពណ៌ខ្មៅ នៅតំបន់ទំនប់រលក ស្ពានឆ្នេរព្រែកត្រែង ក្នុងក្រុងព្រះសីហនុ ខេត្តព្រះសីហនុ។

កិច្ចសហការចុះត្រួតពិនិត្យនេះបានធ្វើឡើងនាថ្ងៃទី៨ ខែសីហា ឆ្នាំ២០២៦ នៅតំបន់ទំនប់រលក និងស្ពានឆ្នេរព្រែកត្រែង ក្នុងក្រុងព្រះសីហនុ ខេត្តព្រះសីហនុ។

ក្នុងកិច្ចសហការចុះត្រួតពិនិត្យនេះ ក្រុមការងារបានរកឃើញទីតាំងសង្ស័យចំនួន ០២ ដែលបង្កឱ្យមានទឹកពណ៌ខ្មៅហូរចូលអូរធម្មជាតិ និងបន្តហូរធ្លាក់ចូលសមុទ្រ។ ទីតាំងទាំងនោះរួមមាន ក្រុមហ៊ុន HUN KIM HONG 86 Logistics CO., LTD និងក្រុមហ៊ុន TNT VN ដែលជាប្រភេទរោងចក្រកិនកំទេចឈើអាកាស្យា ដើម្បីនាំចេញសម្រាប់កែច្នៃជាក្រដាសកាតុង និងក្រដាសអនាម័យ។ ក្រុមហ៊ុនទាំងពីរនេះមានទីតាំងស្ថិតនៅក្រុម២ ភូមិ៣ (ទំនប់រលក) សង្កាត់លេខ១ ក្រុងព្រះសីហនុ។

ជាលទ្ធផលនៃការពិនិត្យ ក្រុមការងារបានរកឃើញថា ក្រុមហ៊ុនទាំងពីរពុំបានបង្ហូរទឹកកខ្វក់របស់ខ្លួនចូលសមុទ្រដោយផ្ទាល់នោះទេ ប៉ុន្តែក្រុមហ៊ុនបានទុកដាក់សំណល់មិនត្រឹមត្រូវ ដោយគរឈើអាកាស្យាដែលបានកិនឱ្យទៅជាកំទេចឈើម៉ត់ៗ នៅលើបរិវេណដីរបស់ក្រុមហ៊ុនដោយគ្មានដំបូលគ្រប។ ហេតុនេះហើយ នៅពេលមានភ្លៀងធ្លាក់ខ្លាំង ទឹកភ្លៀងបានជ្រាបចូលទៅក្នុងសំណល់ទាំងនោះ បណ្ដាលឱ្យហូរចូលប្រភពទឹកសាធារណៈ (អូរធម្មជាតិ)។

បច្ចុប្បន្ន ក្រុមការងារបានចាត់វិធានការឱ្យក្រុមហ៊ុនទាំងពីរបញ្ឈប់ជាបន្ទាន់នូវការបង្ហូរទឹកពណ៌ខ្មៅចូលប្រភពទឹកសាធារណៈបន្តទៀត។ ក្រុមហ៊ុនត្រូវធ្វើការកែលម្អបរិស្ថាន រៀបចំអាងចម្រោះទឹកកខ្វក់ឱ្យបានត្រឹមត្រូវ និងធ្វើការទុកដាក់សំណល់កំទេចឈើអាកាស្យាឱ្យបានត្រឹមត្រូវតាមបទដ្ឋានបច្ចេកទេស និងស្របតាមច្បាប់ពាក់ព័ន្ធនឹងវិស័យបរិស្ថានជាធរមាន។ ជាមួយគ្នានេះ ក្រុមការងារក៏បានសម្រេចយកសំណាកទឹកចំនួន ០២ សំណាក ដើម្បីបញ្ជូនទៅវិភាគនៅមន្ទីរពិសោធន៍ក្រសួងបរិស្ថានផងដែរ៕