(កំពង់ស្ពឺ)៖ ក្រោមការយកចិត្តទុកដាក់គិតគូរ និងជំនួយឧបត្ថម្ភដ៏ថ្លៃថ្លារបស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ ប្រជាពលរដ្ឋក្នុងឃុំអមលាំង ស្រុកថ្ពង ខេត្តកំពង់ស្ពឺ មានសេចក្តីសប្បាយរីករាយជាខ្លាំង នៅពេលទទួលបានប្រឡាយទឹកថ្មី ឬការស្តារប្រឡាយចាស់ឡើងវិញ។ សមិទ្ធផលដ៏មានសារៈសំខាន់នេះ បានរួមចំណែកយ៉ាងធំធេងក្នុងការដោះស្រាយបញ្ហាប្រឈមជាច្រើនរបស់ប្រជាពលរដ្ឋ។

ប្រឡាយទឹកថ្មីនេះ មិនត្រឹមតែជួយរំដោះការលិចលង់ដោយសារទឹកភ្លៀងប៉ុណ្ណោះទេ ថែមទាំងផ្តល់ទឹកសម្រាប់ស្រោចស្រពដំណាំកសិកម្មបានទាន់ពេលវេលា ដែលជាកត្តាចម្បងក្នុងការបង្កើនទិន្នផលកសិកម្ម។ លើសពីនេះ ការស្តារប្រឡាយឡើងវិញក៏បានធ្វើឱ្យបរិស្ថានជុំវិញកាន់តែល្អប្រសើរ និងមានអនាម័យ។

គម្រោងនេះបានរួមចំណែកយ៉ាងសកម្មក្នុងការលើកកម្ពស់ជីវភាពរស់នៅរបស់ប្រជាពលរដ្ឋនៅក្នុងភូមិពាក់ព័ន្ធចំនួន ៤ភូមិ ដែលគ្របដណ្តប់លើផ្ទៃដីអាស្រ័យផលប្រមាណ ៥២០ហិកតា ឱ្យកាន់តែប្រសើរឡើងជាលំដាប់។

ការគាំទ្រ និងការយកចិត្តទុកដាក់របស់លោកឧត្តមសេនីយ៍ត្រី ម៉េង ស្រ៊ុន បានបង្ហាញពីការប្តេជ្ញាចិត្តខ្ពស់ក្នុងការចូលរួមអភិវឌ្ឍន៍មូលដ្ឋាន និងលើកកម្ពស់សុខុមាលភាពរបស់ប្រជាពលរដ្ឋ ដែលជាកម្លាំងចលករដ៏សំខាន់ ក្នុងការជំរុញកំណើនសេដ្ឋកិច្ចគ្រួសារ និងសហគមន៍ទាំងមូល៕