(បន្ទាយមានជ័យ)៖ នាថ្ងៃច័ន្ទ ទី១០ ខែសីហា ឆ្នាំ២០២៦ គណៈបញ្ជាការឯកភាពរដ្ឋបាលខេត្តបន្ទាយមានជ័យ បានដឹកនាំកម្លាំងចម្រុះចុះធ្វើរដ្ឋបាលក្នុងគោលបំណងទប់ស្កាត់បទល្មើសនានា ជាពិសេសការផ្តល់ទីតាំងស្នាក់នៅ ប្រមូលផ្តុំដោយខុសច្បាប់របស់ជនបរទេសប្រព្រឹត្តការឆបោកតាមប្រព័ន្ធបច្ចេកវិទ្យា ចំនួន៣ទីតាំង ស្ថិតក្នុងក្រុងប៉ោយប៉ែត ខេត្តបន្ទាយមានជ័យ។

ប្រតិបត្តិការនេះ ដឹកនាំដោយលោក លៀម សុដា តំណាងលោក អ៊ុំ រាត្រី អភិបាលខេត្តបន្ទាយមានជ័យ និងមានការសម្របសម្រួលនីតិវិធីពីលោក ទេព ឃុនឆៃ ព្រះរាជអាជ្ញារង តំណាងលោក កើត វណ្ណារ៉េត។ កម្លាំងចូលរួមមាន ស្នងការដ្ឋាននគរបាលខេត្ត កងរាជអាវុធហត្ថខេត្ត និងគណៈបញ្ជាការឯកភាពរដ្ឋបាលក្រុងប៉ោយប៉ែត។

ក្នុងចំណោមទីតាំងទាំង៣ ទីតាំងទី១ និងទី២ ស្ថិតនៅភូមិគីឡូលេខ៤ សង្កាត់ផ្សារកណ្តាល ត្រូវបានរកឃើញជនបរទេសស្នាក់នៅដោយមិនបានរាយការណ៍ទៅប្រព័ន្ធ FPCS។ ម្ចាស់ទីតាំងទាំងពីរត្រូវបានអនុវត្តនីតិវិធី ពិន័យតាមមាត្រា១៨ និងមាត្រា២០ នៃច្បាប់ពាក់ព័ន្ធ ហើយត្រូវបានណែនាំឱ្យសហការជាមួយអាជ្ញាធរ និងគោរពច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ព្រមទាំងអនុក្រឹត្យលេខ០៣ ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ។

ដោយឡែក ទីតាំងទី៣ ស្ថិតនៅភូមិផ្សារកណ្តាល សង្កាត់ផ្សារកណ្តាល ត្រូវបានរកឃើញជនបរទេសចំនួន ១១នាក់ (ចិន១នាក់ ថៃ១០នាក់) និងជនជាតិខ្មែរម្នាក់។ ក្នុងនោះ មានជនបរទេសមួយចំនួនបានស្នាក់នៅហួសទិដ្ឋាការ គ្មានលិខិតឆ្លងដែនជាប់នឹងខ្លួន និងឆ្លងដែនខុសច្បាប់។

លើសពីនេះ ទីតាំងនេះក៏បានរកឃើញវត្ថុតាងពាក់ព័ន្ធបទល្មើសឆបោកតាមប្រព័ន្ធអនឡាញ រួមមាន៖ កុំព្យូទ័រ ២០គ្រឿង ឡេបថប ២គ្រឿង និងទូរស័ព្ទ ១៦គ្រឿង។ វត្ថុតាង និងមនុស្សត្រូវបានប្រគល់ជូនជំនាញដើម្បី អនុវត្តនីតិវិធីបន្ត ចំណែកឯទីតាំងត្រូវបានបិទជាបណ្តោះអាសន្ន។

ប្រតិបត្តិការនេះបានបង្ហាញពីការប្តេជ្ញាចិត្តរបស់អាជ្ញាធរខេត្តបន្ទាយមានជ័យ ក្នុងការរក្សាសន្តិសុខ សណ្តាប់ធ្នាប់សាធារណៈ និងទប់ស្កាត់បទល្មើសឆ្លងដែន ជាពិសេសបទល្មើសឆបោកតាមប្រព័ន្ធបច្ចេកវិទ្យា ដែលកំពុងជាក្តីបារម្ភ៕