(ស្វាយរៀង)៖ នាព្រឹកថ្ងៃចន្ទ ទី១០ ខែសីហា ឆ្នាំ២០២៦ លោកឧត្តមសេនីយ៍ទោ សែ វុទ្ធី មេបញ្ជាការរងកងរាជអាវុធហត្ថលើផ្ទៃប្រទេស និងលោកស្រី ព្រំ សុម៉ាលី បានធ្វើពិធីប្រគល់ដីទំហំ ២០,៤៨០ម៉ែត្រការ៉េ (ជាង ២ហិកតា) ជូនដល់បញ្ជាការដ្ឋានកងរាជអាវុធហត្ថខេត្តស្វាយរៀង ដើម្បីប្រើប្រាស់ជាប្រយោជន៍ដល់ខេត្តស្វាយរៀងទាំងមូល និងសង្គមជាតិ។

ពិធីក្រុងពាលីសុំបើកផ្លូវ និងធ្វើរបងលើទីតាំងដីថ្មីនេះ បានប្រព្រឹត្តទៅក្រោមអធិបតីភាពរបស់លោកឧត្តមសេនីយ៍ទោ សែ វុទ្ធី, លោក អ៊ាក ផល្លា ប្រធានសាលាដំបូងខេត្តស្វាយរៀង និងលោកឧត្តមសេនីយ៍ត្រី សុខា រ៉ានាថ មេបញ្ជាការកងរាជអាវុធហត្ថខេត្តស្វាយរៀង។

ទីតាំងដីដែលជាអំណោយដ៏ថ្លៃថ្លានេះ ស្ថិតនៅជាប់របងបញ្ជាការដ្ឋានកងរាជអាវុធហត្ថខេត្តស្វាយរៀង ក្នុងភូមិថ្មី សង្កាត់សង្ឃ័រ ក្រុងស្វាយរៀង ខេត្តស្វាយរៀង។

ការផ្តល់អំណោយដីនេះ គឺជាកាយវិការដ៏ប្រពៃមួយ ដែលបង្ហាញពីការយកចិត្តទុកដាក់ខ្ពស់របស់លោកឧត្តមសេនីយ៍ទោ សែ វុទ្ធី និងលោកស្រី ចំពោះការរួមចំណែកអភិវឌ្ឍន៍ និងពង្រឹងសមត្ថភាពកងកម្លាំងប្រដាប់អាវុធ ពិសេសកងរាជអាវុធហត្ថខេត្តស្វាយរៀង ក្នុងការបំពេញបេសកកម្មការពារសន្តិសុខ សណ្តាប់ធ្នាប់សាធារណៈ និងបម្រើប្រជាពលរដ្ឋឲ្យកាន់តែមានប្រសិទ្ធភាព។

អំណោយនេះនឹងក្លាយជាមូលដ្ឋានដ៏សំខាន់មួយសម្រាប់ការពង្រីក និងពង្រឹងហេដ្ឋារចនាសម្ព័ន្ធរបស់កងរាជអាវុធហត្ថខេត្ត ដើម្បីបម្រើផលប្រយោជន៍ជាតិ និងប្រជាជន។