(ព្រះវិហារ)៖ ក្រុមគ្រូពេទ្យជំនាញនៃមន្ទីរពេទ្យបង្អែកខេត្ត ១៦ មករា នៃមន្ទីរសុខាភិបាលខេត្តព្រះវិហារ បានប្រឹងប្រែងអស់ពីសមត្ថភាព ដោយចំណាយពេលជាង ២ម៉ោង ដើម្បីធ្វើការវះកាត់ជូនអ្នកជំងឺស្ត្រីម្នាក់ អាយុ ៤៥ឆ្នាំ ដែលមានជំងឺដុំស្បូន និងគីសឈាម ព្រមទាំងមានផលវិបាកស្អិតជាប់ជាមួយប្លោកនោម និងពោះវៀនធំ ហើយការវះកាត់បានប្រព្រឹត្តទៅដោយជោគជ័យ។

លោកវេជ្ជបណ្ឌិត ជូ ប៉ូនីណា ប្រធានមន្ទីរពេទ្យបង្អែក ១៦ មករា បានថ្លែងឱ្យដឹងថា៖ ការវះកាត់នេះបានធ្វើឡើងនៅថ្ងៃទី១០ ខែសីហា ឆ្នាំ២០២៦ ជូនលោកស្រី ស ម ណ អាយុ៤៥ឆ្នាំ មានទីលំនៅភូមិទី១ ឃុំកោះសូទិន ស្រុកកោះសូទិន ខេត្តកំពង់ចាម។

លោកថា តាមការធ្វើរោគវិនិច្ឆ័យ អ្នកជំងឺមានដុំស្បូន និងគីសឈាម ជាមួយផលវិបាកស្អិតជាប់ប្លោកនោម និងពោះវៀនធំ ដែលធ្វើឱ្យការវះកាត់មានភាពស្មុគស្មាញ និងតម្រូវឱ្យក្រុមគ្រូពេទ្យមានការប្រុងប្រយ័ត្នខ្ពស់។

លោកវេជ្ជបណ្ឌិត បានថ្លែងទៀតថា សម្រាប់ករណីនេះ ក្រុមគ្រូពេទ្យបានសម្រេចធ្វើការវះកាត់ Hysterectomy Sub-total ដោយប្រើពេលវេលាជាងពីរម៉ោង។

ទោះបីជាករណីមានភាពស្មុគស្មាញក្ដី ក្រុមវះកាត់ និងក្រុមសណ្ដំបានសហការគ្នាយ៉ាងល្អប្រសើរ ប្រកបដោយការយកចិត្តទុកដាក់ និងវិជ្ជាជីវៈខ្ពស់ រហូតសម្រេចបានជោគជ័យ។

ចំពោះក្រុមវះកាត់ និងសណ្ដំដែលបានចូលរួមក្នុងការវះកាត់ រួមមាន៖ វេជ្ជបណ្ឌិត ផ្លុង ស្រីណាន់ ជាគ្រូពេទ្យវះកាត់, វេជ្ជបណ្ឌិត គល់ គោរព ជាគ្រូពេទ្យវះកាត់, លោក ហង្ស សីហា ជាគ្រូពេទ្យសណ្ដំ, លោក វង្ស សុខមី និង លោក ឈិត រមណីយ៍ ជាជំនួយការវះកាត់។

លោកថា ជោគជ័យនៃការវះកាត់នេះ បានបង្ហាញពីការយកចិត្តទុកដាក់ និងការខិតខំប្រឹងប្រែងរបស់ក្រុមគ្រូពេទ្យ និងបុគ្គលិកសុខាភិបាល ក្នុងការផ្ដល់សេវាពិនិត្យ ព្យាបាល និងវះកាត់ជូនប្រជាពលរដ្ឋ ដោយផ្ដោតលើសុវត្ថិភាព និងសុខភាពរបស់អ្នកជំងឺជាចម្បង។

លោក ជូ ប៉ូនីណា បានថ្លែងទៀតថា៖ នេះជាការឆ្លុះបញ្ចាំងពីការរីកចម្រើននៃសមត្ថភាពផ្នែកវះកាត់ និងសេវាសុខាភិបាលនៅមន្ទីរពេទ្យបង្អែកខេត្ត ១៦ មករា ដែលកាន់តែមានលទ្ធភាពក្នុងការទទួល និងព្យាបាលករណីអ្នកជំងឺដែលមានភាពស្មុគស្មាញ ជួយកាត់បន្ថយការចំណាយ និងការធ្វើដំណើររបស់ប្រជាពលរដ្ឋទៅកាន់មន្ទីរពេទ្យនៅទីក្រុងធំៗ៕