(ភ្នំពេញ)៖ អង្គភាពសារព័ត៌មាន Fresh News មានកិត្តិយសដ៏ខ្ពង់ខ្ពស់ ក្នុងការធ្វើកិច្ចសម្ភាសន៍ផ្តាច់មុខជាមួយ ឯកឧត្តម ដូមីនីក វីលៀមស៍ (Dominic Williams) ឯកអគ្គរាជទូតនៃ «រាជាណាចក្ររួមនៃព្រីតថេន និងអៀរឡង់ខាងជើង» ប្រចាំព្រះរាជាណាចក្រកម្ពុជា។

ក្នុងកិច្ចសម្ភាសន៍នេះ ឯកឧត្តមបានថ្លែងពន្យល់ជាភាសាខ្មែរយ៉ាងច្បាស់លាស់ អំពីការសិក្សាស្រាវជ្រាវយ៉ាងល្អិតល្អន់ និងមូលហេតុចម្បងនៃការសម្រេចផ្លាស់ប្តូរឈ្មោះផ្លូវការជាភាសាខ្មែរសម្រាប់ប្រទេសរបស់លោក ដោយប្តូរពី «ចក្រភពអង់គ្លេស» មកជា «រាជាណាចក្ររួមនៃព្រីតថេន និងអៀរឡង់ខាងជើង» ឬហៅយ៉ាងខ្លីថា «ព្រីតថេន» ដែលជាពាក្យបច្ចេកសព្ទបង្កើតថ្មីតាមបែបសូរសព្ទ (Transliteration) ចេញពីពាក្យអង់គ្លេស "Britain"។

ការបកប្រែថ្មីនេះ ឆ្លុះបញ្ចាំងកាន់តែត្រឹមត្រូវអំពីរចនាសម្ព័ន្ធនយោបាយរបស់ព្រីតថេន ដែលជារាជាធិបតេយ្យអាស្រ័យរដ្ឋធម្មនុញ្ញ និងជាសហភាពនៃប្រទេសទាំង៤ រួមមាន អង់គ្លេស ស្កុតឡែន វែលស៍ និងអៀរឡង់ខាងជើង។