(តាកែវ)៖ ដើម្បីធានាបាននូវសន្តិសុខ សុវត្ថិភាព និងរក្សាសណ្តាប់ធ្នាប់ឱ្យបានល្អប្រសើរ ក្នុងអំឡុងពេលនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅក្នុងខេត្តតាកែវ កម្លាំងកងរាជអាវុធហត្ថខេត្តជាង ១០០នាក់ ត្រូវបានដាក់ពង្រាយ និងត្រៀមអន្តរាគមន៍រាល់បញ្ហាដែលអាចកើតឡើង។

លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ បានបញ្ជាក់ថា កម្លាំងអាវុធហត្ថជាង ៩០នាក់ ត្រូវបានដាក់ពង្រាយនៅតាមមណ្ឌលប្រឡងទាំង១៧ទីតាំង ចំណែកកម្លាំងជាង ២០នាក់ទៀត ត្រូវបានត្រៀមចាំអន្តរាគមន៍ជាប្រចាំ។ ការដាក់ពង្រាយកម្លាំងនេះ គឺមានគោលបំណងធានាឱ្យដំណើរការប្រឡងប្រព្រឹត្តទៅដោយរលូន សុវត្ថិភាព មានសណ្តាប់ធ្នាប់ល្អ និងបង្កលក្ខណៈងាយស្រួលដល់បេក្ខជន អាណាព្យាបាល និងអ្នកពាក់ព័ន្ធទាំងអស់។

លោកឧត្តមសេនីយ៍ត្រី ក៏បានលើកឡើងថា កម្លាំងរបស់លោកបានសហការយ៉ាងជិតស្និទ្ធជាមួយកម្លាំងនគរបាលខេត្ត និងប្រធានមណ្ឌលប្រឡង ដើម្បីការពារសុវត្ថិភាពជូនបេក្ខជនប្រឡង និងគណៈមេប្រយោគ ធ្វើយ៉ាងណាឱ្យដំណើរការប្រឡងសញ្ញាបត្រមធ្យមសិក្សាទុតិយភូមិក្នុងខេត្តតាកែវ រយៈពេល២ថ្ងៃនេះ ប្រព្រឹត្តទៅដោយរលូនគ្មានបញ្ហាអ្វីកើតឡើង។

សម្រាប់ឆ្នាំ២០២៦នេះ ខេត្តតាកែវ មានមណ្ឌលប្រឡងចំនួន ១៧មណ្ឌល ស្មើនឹង៣៨៥បន្ទប់ ដែលក្នុងនោះចែកចេញជាថ្នាក់វិទ្យាសាស្ត្រចំនួន ៤មណ្ឌល ស្មើ៨០បន្ទប់ និងវិទ្យាសាស្ត្រសង្គមចំនួន ១៣មណ្ឌល ស្មើ៣០៥បន្ទប់។ មានបេក្ខជនចំនួន ៩ ៥៦៣នាក់ ក្នុងនោះស្រីចំនួន៥.៣១៩នាក់៕