(កំពត)៖ នាយកមន្ទីរពេទ្យព្រះអង្គឌួង លោកសាស្ដ្រាចារ្យរង លូ លីឃាង នាព្រឹកថ្ងៃទី១១ ខែសីហា ឆ្នាំ២០២៦ បានដឹកនាំក្រុមគ្រូពេទ្យ ចុះទៅបណ្ដុះបណ្ដាលពី «ការសង្គ្រោះបឋមនៃការគាំងបេះដូង និងការគ្រប់គ្រងផ្លូវដង្ហើម» ជូនដល់ប្រធានមណ្ឌលសុខភាពនៃមន្ទីរសុខាភិបាលនៃរដ្ឋបាលខេត្តកំពត និងខេត្តកែប។

លោកសាស្ដ្រាចារ្យបានថ្លែងថា ថ្ងៃនេះលោកពិតជាមានសេចក្តីសោមនស្សរីករាយ ដែលមន្ទីរពេទ្យព្រះអង្គឌួងបានបើកវគ្គបណ្តុះបណ្តាល ស្តីពី «ការសង្គ្រោះបឋមនៃការគាំងបេះដូង និងការគ្រប់គ្រងផ្លូវដង្ហើម» ជូនដល់ប្រធានមណ្ឌលសុខភាព នៃមន្ទីរសុខាភិបាលនៃរដ្ឋបាលខេត្តកំពត និងខេត្តកែប ពីក្រុមគ្រូពេទ្យនៃមន្ទីរពេទ្យព្រះអង្គឌួង។

លោកបានថ្លែងបន្ដថា «ការគាំងបេះដូង និងបញ្ហាផ្លូវដង្ហើម គឺជាស្ថានភាពបន្ទាន់ដែលតម្រូវឱ្យមានការសង្គ្រោះទាន់ពេលវេលាត្រឹមត្រូវ និងមានប្រសិទ្ធភាព។ រាល់វិនាទីគឺមានតម្លៃណាស់សម្រាប់ជីវិតអ្នកជំងឺ។ ដូច្នេះការពង្រឹងសមត្ថភាពបុគ្គលិកសុខាភិបាលនៅតាមមូលដ្ឋាន គឺជាកត្តាដ៏សំខាន់ក្នុងការកាត់បន្ថយហានិភ័យ និងជួយសង្គ្រោះជីវិតប្រជាពលរដ្ឋ។ វគ្គបណ្តុះបណ្តាលនេះ មិនមានគោលបំណងត្រឹមតែផ្ដល់ចំណេះដឹងដល់ប្រធានមណ្ឌលសុខភាពប៉ុណ្ណោះទេ ប៉ុន្តែសំខាន់ជាងនេះ គឺចង់ឱ្យក្រុមគ្រូពេទ្យទាំងអស់យកចំណេះដឹងនិងជំនាញដែលទទួលបាននេះ ទៅបន្តបង្ហាត់បង្រៀន និងហ្វឹកហាត់ដល់បុគ្គលិកនៅតាមមណ្ឌលសុខភាពរបស់ខ្លួន ឱ្យមានសមត្ថភាព និងភាពជឿជាក់ក្នុងការសង្គ្រោះបឋម»។

ក្នុងឱកាសនោះលោកសាស្ដ្រាចារ្យ លូ លីឃាង បានលើកទឹកចិត្តឱ្យប្រធានមណ្ឌលទាំងអស់ចូលរួមរៀនសូត្រឱ្យបានសកម្ម ផ្តោតសំខាន់លើការអនុវត្តជាក់ស្តែង និងបន្តធ្វើការហ្វឹកហាត់ជាប្រចាំ ដើម្បីធានាថា នៅពេលមានករណីបន្ទាន់ បុគ្គលិកអាចឆ្លើយតបបានយ៉ាងឆាប់រហ័ស និងត្រឹមត្រូវ។

ទន្ទឹមនឹងនោះលោកក៏ជឿជាក់ថា តាមរយៈកិច្ចសហការរវាងមន្ទីរពេទ្យព្រះអង្គឌួង និងមន្ទីរសុខាភិបាលនៃរដ្ឋបាលខេត្ដកំពត នឹងអាចរួមគ្នាពង្រឹងគុណភាពសេវាសង្គ្រោះបន្ទាន់ និងរួមចំណែកនៃរដ្ឋបាលខេត្តកំពត ក៏ដូចជាខេត្តកែប ការពារអាយុជីវិតប្រជាពលរដ្ឋឱ្យកាន់តែមានប្រសិទ្ធភាព។

សូមជម្រាបថា ក្នុងឱកាសប្រកាសបើកវគ្គបណ្តុះបណ្តាល ស្តីពី «ការសង្គ្រោះបឋមនៃការគាំងបេះដូង និងការគ្រប់គ្រងផ្លូវដង្ហើម» ក៏មានការអញ្ជើញចូលរួមពីលោកស្រី យូ សុគន្ធ ប្រធានមន្ទីរសុខាភិបាលនៃរដ្ឋបាលខេត្តកំពត។ ជាមួយគ្នានេះលោកស្រី ក៏បានថ្លែងអំណរគុណយ៉ាងជ្រៅចំពោះលោកនាយកមន្ទីរពេទ្យព្រះអង្គឌួង និងក្រុមគ្រូពេទ្យទាំងអស់ ដែលតែងតែខិតខំប្រឹងប្រែងចុះមកបណ្ដុះបណ្ដាលពង្រឹងសមត្ថភាពដល់ក្រុមគ្រូពេទ្យក្នុងខេត្ដកំពត និងខេត្តកែបទាំងពេលនេះ ក៏ដូចជាកន្លងមក៕