(ភ្នំពេញ)៖ ​បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងអំណរគុណយ៉ាងជ្រាលជ្រៅ ចំពោះស្មារតីទទួលខុសត្រូវខ្ពស់ របស់គណៈប្រយោគ និងការចូលរួមយ៉ាងសកម្មពីគ្រប់ភាគីពាក់ព័ន្ធទាំងអស់ ដែលបានធ្វើឱ្យដំណើរការសំណេរ នៃការប្រឡងសញ្ញាបត្រមធ្យមសិក្សាទុតិយភូមិ ប្រព្រឹត្តទៅដោយរលូន និងទទួលបានជោគជ័យគួរជាទីមោទនៈ។

បណ្ឌិតសភាចារ្យ បានគូសបញ្ជាក់ថា «សូមថ្លែងអំណរគុណយ៉ាងជ្រៀលជ្រៅចំពោះស្មារតីទទួលខុសត្រូវខ្ពស់របស់គណៈប្រយោគ និងការចូលរួមពីអង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា មន្ត្រីសុខាភិបាល អាជ្ញាធរមានសមត្ថកិច្ច កងកម្លាំង និងគ្រប់ភាគីទាំងអស់ក្នុងដំណើរការសំណេរ។ ភាពជោគជ័យនៃការប្រឡងសញ្ញាបត្រមធ្យមសិក្សាទុតិយភូមិ ក្រោមគោលការណ៍ ច្បាប់ យុត្តិធម៌ តម្លាភាព និងលទ្ធផលទទួលយកបាន បានមកពីការគោរពបទប្បញ្ញត្តិរបស់បេក្ខជន ការចូលរួមយ៉ាងសកម្មពីភាគីពាក់ព័ន្ធទាំងអស់»។

​ការចូលរួមយ៉ាងសកម្ម និងស្មារតីទទួលខុសត្រូវខ្ពស់របស់ភាគីទាំងអស់ បានឆ្លុះបញ្ចាំងពីការប្តេជ្ញាចិត្តរួមគ្នាក្នុងការលើកកម្ពស់គុណភាពអប់រំនៅកម្ពុជា ព្រមទាំងបង្កើតបរិយាកាសប្រឡងមួយដែលប្រកបដោយភាពជឿជាក់ និងយុត្តិធម៌សម្រាប់សិស្សានុសិស្សគ្រប់រូប។

សូមជម្រាបថា ការប្រឡងបាក់ឌុប ឆ្នាំ២០២៦នេះ មានបេក្ខជនចុះឈ្មោះ ប្រឡងសរុប ១៥១ ២៣៨ នាក់ (ស្រី ៨៤ ៧៣៥ នាក់) ក្នុងនោះ៖ បេក្ខជនថ្នាក់វិទ្យាសាស្ត្រ មានចំនួន ៣៧ ៤៤៥ នាក់ (ស្រី ២២ ១៩៣ នាក់) បេក្ខជនថ្នាក់វិទ្យាសាស្ត្រសង្គម មានចំនួន ១១៣ ៧៩៣ នាក់ (ស្រី ៦២ ៥៤២ នាក់)។

ក្រសួងអប់រំ យុវជន និងកីឡា គ្រោងនឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៦ នៅថ្ងៃទី២ ខែកញ្ញា ឆ្នាំ២០២៦ តាមមណ្ឌលសំណេរនៃរាជធានី-ខេត្តទាំង២៥ នៅទូទាំងប្រទេស៕