លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត៖ បណ្ណមូលនិធិសមធម៌សុខាភិបាល ជួយកាត់បន្ថយនូវបន្ទុកចំណាយ ហើយក៏មានភាពកក់ក្តៅនៅពេលដែលប្រជាពលរដ្ឋឈឺស្កាត់ (Video inside)
11-08-2026 21:53
(ភ្នំពេញ)៖ ក្នុងឱកាសអញ្ជើញសំណេះសំណាល និងចែកបណ្ណមូលនិធិសមធម៌សុខាភិបាល ( ម.ស.ស) រួមទាំងផ្តល់អំណោយដូចជាអង្ករ ភេសជ្ជៈ គ្រឿងឧបភោគបរិភោគនិងថវិកា ជូនដល់លោកតាលោកយាយ អ៊ំពូមីង កុមារា កុមារី រស់នៅក្នុង អង្គការមូលនិធិកុមារកម្ពុជា (CCF) នាថ្ងៃទី១១ ខែសីហា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានបញ្ជាក់ពីសារៈសំខាន់នៃបណ្ណមូលនិធិសមធម៌សុខាភិបាលថា ពេលមានបណ្ណនេះនៅក្នុងដៃ បានធ្វើឱ្យលោកតា លោកយាយ ក្លាហាន និងហ៊ានទៅពេទ្យជាងមុន ហើយក៏មិនទុកឱ្យជំងឺឈឺកាន់តែធ្ងន់ទើបទៅមន្ទីរពេទ្យនោះដែរ។
លោកជំទាវបណ្ឌិតបានថ្លែងបន្ដថា «សារៈសំខាន់នៃបណ្ណដែលលោកតាលោកយាយទទួលបាននៅក្នុងថ្ងៃនេះ ខ្ញុំគិតថាលោកតាលោកយាយបងប្អូនអ៊ុំពូមីងទាំងអស់ក៏មានភាពក្លាហានជាងមុន កាលពីមុនគឺពេលណាឈឺបន្តិចបន្តួចអីអត់ហ៊ានទៅពេទ្យទេ ព្រោះអីថាខ្លាចអត់មានលុយ ពេលទៅចំណាយអស់លុយច្រើន។ ប៉ុន្តែនៅពេលដែលមានបណ្ណនេះទៅ គឺមានភាពក្លាហានជាងមុន ឈឺអីតិចតួចក៏អាចទៅពេទ្យបានដែរ។ ដូច្នេះគឺលោកតាលោកយាយមិនចាំបាច់ដល់ឈឺធ្ងន់ទេ ដែលនេះគឺជាកាត់បន្ថយនូវអត្រាភាពឈឺធ្ងន់ធ្ងរមួយផងដែររបស់លោកតាលោកយាយនៅក្នុងភូមិ»។
ទន្ទឹមនឹងនោះដែរលោកជំទាវបណ្ឌិត ក៏បានផ្តាំផ្ញើទៀតថា បើសិនជាឈឺតិចតួច សូមលោកតាលោកយាយបងប្អូនទាំងអស់ សូមអញ្ជើញទៅរកពេទ្យឱ្យបានឆាប់ កុំទុកដល់ឈឺរ៉ាំរ៉ៃ សូម្បីតែពេទ្យក៏មិនអាចជួយយើងបានដែរ។ «ពេលនេះលោកតា លោកយាយមានប័ណ្ណនេះហើយ ពេលណាឈឺអីបន្តិចបន្តួចកុំខ្លាចឱ្យកូនចៅជូនទៅពេទ្យឱ្យសោះ ព្រោះរាល់ការចំណាយទាំងអស់គឺជាបន្ទុករបស់រាជរដ្ឋាភិបាល គឺចេញជូនទាំងអស់ដែលមិនធ្វើឱ្យកូនចៅរបស់លោកតាលោកយាយ មិនចំណាយថវិកា ថ្លៃពិនិត្យព្យាបាលជំងឺ និងបានជួយកូនចៅដែលមិនសូវធូរធារ ព្រោះលោកតាលោកយាយខ្លះក៏មានកូនចៅធ្វើការនៅរោងចក្រ ធ្វើការកន្លែងផ្សេងទៀត គឺដើម្បីរកលុយចិញ្ចឹមលោកតាលោកយាយដែលចាស់ៗនិងនៅពេលដែលឈឺទៅ។ ដូច្នេះគឺបណ្ណនេះហើយជួយកាត់បន្ថយការចំណាយថវិកាច្រើនមែនទែន»។
ក្នុងឱកាសនោះលោកជំទាវបណ្ឌិត ក៏បានថ្លែងកោតសរសើរអភិបាលរាជធានីភ្នំពេញ និងអង្គការមូលនិធិកុមារកម្ពុជា ដែលបានសហការគ្នាយ៉ាងសកម្ម ដើម្បីបន្ដឧបត្ថម្ភដល់លោកតា លោកយាយ ប្រជាពលរដ្ឋយើង ពិសេសដល់កុមារដែលកំពុងត្រូវការការយកចិត្ដទុកដាក់។ ហើយក្រោមការសម្របសម្រួលពីរដ្ឋបាលរាជធានីភ្នំពេញ នៅក្នុងការផ្ដល់បណ្ណមូលនិធិសមធម៌សុខាភិបាលជូនដល់ប្រជាពលរដ្ឋនៅក្នុងអង្គការមូលនិធិកុមារកម្ពុជានេះ គឺមានចំនួនបីលើករួចមកហើយ ។សម្រាប់នៅក្នុងថ្ងៃនេះ គឺមានបងប្អូនប្រជាពលរដ្ឋចំនួន ៥៥៩នាក់ ទទួលបានបណ្ណមូលនិធិសមធម៌សុខាភិបាល ក្នុងនោះគឺបណ្ណថ្មីចំនួន ២០៤បណ្ណ ហើយនិងបន្តសុពលភាពចំនួន ៣៥៥បណ្ណបន្ថែមទៀត។ បណ្ណមូលនិធិសមធម៌សុខាភិបាលនេះ បើយើងគិតទៅ យើងគិតថាជាបណ្ណមួយសន្លឹក តាមពិតគឺមិនមែនជាបណ្ណមួយសន្លឹកទេ ប៉ុន្តែគឺជាបណ្ណដែលប្រែក្លាយទៅជាការគាំពារសុខភាពលោកតា លោកយាយ ប្រជាពលរដ្ឋយើងដ៏សំខាន់បំផុត ដែលជួយកាត់បន្ថយបន្ទុកចំណាយរបស់គ្រួសារ និងជួយសម្រួលដល់ការទៅពិនិត្យព្យាបាលជំងឺនានា ដែលបង្ហាញអំពីការគិតគូរ យកចិត្តទុកដាក់យ៉ាងដិតដល់របស់រាជរដ្ឋាភិបាលកម្ពុជា ចំពោះប្រជាពលរដ្ឋជួបទុក្ខលំបាក៕
