(ភ្នំពេញ)៖ ដោយមានការឧបត្ថម្ភពីភេសជ្ជៈ Pocari Sweat ក្រុមបាល់ទាត់ FCA ដឹកនាំឱ្យលោក លឹម ជាវុត្ថា អគ្គនាយក Fresh News, CoolApp & Fresh AI នៅល្ងាចថ្ងៃទី១១ ខែសីហា ឆ្នាំ២០២៦ បានប្រកួតមិត្តភាពជាមួយក្រុមបាល់ទាត់មន្ត្រីនៃក្រសួងសេដ្ឋកិច្ច និងហិរញ្ញវត្ថុ ដើម្បីជំរុញស្មារតីស្រឡាញ់សុខភាព តាមរយៈការលេងកីឡា និងការហាត់ប្រាណ។

លើវាលស្មៅសប្បនិម្មិតរយៈពេល២ម៉ោង កីឡាករទាំងពីរក្រុម បានប្រកួតដោយការយោគយល់ អធ្យាស្រ័យគ្នាទៅវិញទៅមក មិនមានការប៉ះទង្គិចគ្នា ធ្វើឱ្យកីឡាករណាម្នាក់រងរបួសនោះឡើយ។ ជាលទ្ធផលក្រុមបាល់ទាត់ FCA ស៊ុតចូលសំណាញ់ទីរបស់ក្រុមមន្ត្រីនៃក្រសួងសេដ្ឋកិច្ចចំនួន ៨គ្រាប់ ប៉ុន្តែរបូតគ្រាប់វិញចំនួន ១៥គ្រាប់។

លោក លឹម ជាវុត្ថា បានបង្ហាញនូវក្តីរីករាយ ចំពោះការប្រកួតបាល់ទាត់មិត្តភាពនេះ ហើយថាគោលបំណងនៃការប្រកួតបាល់ទាត់នេះ ដើម្បីតែមិត្តភាព និងសុខភាពប៉ុណ្ណោះ ហើយការប្រកួតនេះ គ្មានអ្នកឈ្នះ ក៏គ្មានអ្នកចាញ់ដែរ គឺឈ្នះទាំងអស់គ្នា ឈ្នះមិត្តភាព និងឈ្នះសុខភាព។

ជាមួយគ្នានេះ លោកអគ្គនាយកបានអំពាវនាវរួមគ្នា ដល់បងប្អូនប្រជាពលរដ្ឋ ពិសេសបងប្អូនអ្នកសារព័ត៌មាន ដែលមានសុខភាពមិនសូវល្អ សូមនាំគ្នាលេងកីឡាឱ្យបានគ្រប់ៗគ្នា ព្រោះមានសុខភាពល្អ ទើបមានអ្វីៗតាមក្រោយ។

សូមជម្រាបថា ក្រុមបាល់ទាត់ FCA តែងតែប្រកួតមិត្តភាពជាញឹកញាប់ជាមួយស្ថាប័នព័ត៌មានដូចគ្នា និងស្ថាប័នផ្សេងទៀត ដូចជា ស្ថានីយទូរទស្សន៍ជាតិកម្ពុជា, អង្គភាពសារព័ត៌មាន AMS, កងរាជអាវុធហត្ថរាជធានីភ្នំពេញ និងក្រុមបាល់ទាត់ក្រុមមន្ត្រីនៃក្រសួងសេដ្ឋកិច្ចជាដើម៕