(ភ្នំពេញ)៖ លោក នាង ផាត ប្រធានគណៈកម្មការទី៤ នៃព្រឹទ្ធសភា និងជាប្រធានសមាគមមិត្តភាពកម្ពុជា-ឡាវ នៅថ្ងៃទី១២ ខែសីហា ឆ្នាំ២០២៦នេះ បានដឹកនាំគណៈប្រតិភូប្រគល់សារលិខិតរំលែកទុក្ខ និងចូលរួមគោរពវិញ្ញាណខន្ធ លោកបណ្ឌិត សាយសំផន ភូមវិហាន (Xaysomphone Phomvihane) ប្រធានរដ្ឋសភានៃសាធារណរដ្ឋប្រជាមានិតឡាវ។

នៅក្នុងសារលិខិតរបស់ លោក នាង ផាត ប្រធានសមាគមមិត្តភាពកម្ពុជា-ឡាវ បានបង្ហាញសេចក្តីក្រៀមក្រំក្រៃលែង ដែលបានទទួលដំណឹងអំពីមរណភាពរបស់លោកបណ្ឌិត សាយសំផន ភូមវិហាន ប្រធានរដ្ឋសភា នៃសាធារណរដ្ឋប្រជាធិបតេយ្យប្រជាមានិតឡាវ កាលពីថ្ងៃទី៨ ខែសីហា ឆ្នាំ២០២៦។

សមាគមមិត្តភាពកម្ពុជា-ឡាវ និងរូបលោកផ្ទាល់ ចងចាំជានិច្ចថាលោកបណ្ឌិត សាយសំផន ភូមវិហាន ជាថ្នាក់ដឹកនាំឡាវមួយរូបដ៏ឆ្នើមក្នុងការរួមចំណែកដ៏អស្ចារ្យដល់សន្តិភាព និងវិបុលភាពនៃប្រទេសដ៏ រុងរឿងរបស់លោក និងដល់ការរីកចម្រើននៃទំនាក់ទំនងទ្វេភាគីរវាងប្រទេសទាំងពីរ។

ក្នុងនាមសមាគមមិត្តភាពកម្ពុជា-ឡាវ សូមសម្តែងនូវការរំលែកទុក្ខដ៏សែនក្រៀមក្រំ និងចូលរួមរំលែកទុក្ខជាមួយ ប្រជាជននៃសាធារណរដ្ឋប្រជាធិបតេយ្យប្រជាមានិតឡាវ បក្សប្រជាជនបដិវត្តន៍ឡាវ និងចំពោះជូនក្រុមគ្រួសាររបស់លោកបណ្ឌិត សាយសំផន ភូមវិហាន ក្នុងពេលវេលាដែលមានទុក្ខជាទម្ងន់នេះ៕