(កំពង់ស្ពឺ)៖ លោកឧត្តមសេនីយ៍ឯក ខៀវ ឆេន រដ្ឋលេខាធិការក្រសួងការពារជាតិ និងលោកឧត្តមសេនីយ៍ឯកបម្រុង ង្វៀន ធឿងថាំង អនុរដ្ឋមន្ត្រីក្រសួងការពារប្រទេស នៃសាធារណរដ្ឋសង្គមនិយមវៀតណាម នៅព្រឹកថ្ងៃទី១៤ ខែសីហា ឆ្នាំ២០២៦ បានអញ្ជើញសម្ពោធអគារទីបញ្ជាការថ្មី នៃបញ្ជាការដ្ឋានយោធភូមិភាគទី៣។

នាឱកាសនោះ លោកឧត្តមសេនីយ៍ឯកបម្រុង ង្វៀន ធឿងថាំង បានលើកឡើងថា សំណង់អគារទីបញ្ជាការ បញ្ជាការដ្ឋានយោធភូមិភាគទី៣ នៃកងយោធពលខេមរភូមិន្ទ បានចាប់ផ្តើមសាងសង់នៅចុងឆ្នាំ២០២៣ និងបានបញ្ចប់តាមផែនការដែលបានកំណត់។

លោកថា «នេះគឺជាសំណង់មួយក្នុងចំណោម សំណង់សំខាន់ៗ ដែលក្រសួងការពារជាតិ នៃប្រទេសទាំងពីរ បាននិងកំពុងសហការអនុវត្តក្នុងរយៈពេលកន្លងមក។ សំណង់នេះ គឺជានិមិត្តរូបដ៏សកម្មស្តែងចេញនូវស្មារតីសាមគ្គីភាព ការគាំទ្រ​ និងជួយគ្នាទៅវិញទៅមករវាងប្រទេស គោលបំណង និងកងទ័ពទាំងពីរ ប្រកៀកស្មារួមដំណើរជាមួយកងយោធពលខេមរភូមិន្ទជានិច្ចដើម្បីរួមចំណែកពង្រឹងហេដ្ឋារចនាសម្ព័ន្ធលើកកម្ពស់លក្ខខណ្ឌការងារ និងជីវភាពរស់នៅរបស់យោធិន ជាពិសេស រួមចំណែកបង្កើនប្រសិទ្ធភាពនៃទំនាក់ទំនងសហប្រតិបត្តិការ និងការងារសម្របសម្រួលរបស់យោធភូមិភាគទី៣ ដូចជាយោធភូមិភាគទី៩ នៃកងទ័ពប្រជាជនវៀតណាមជាដើម»។

អនុរដ្ឋមន្ត្រីក្រសួងការពារប្រទេសវៀតណា បានបញ្ជាក់ថា ក្នុងនាមថ្នាក់ដឹកនាំក្រសួងការពារប្រទេសវៀតណាម បានកត់សម្គាល់ និងសូមកោតសរសើរ ចំពោះស្មារតីទទួលខុសត្រូវ ការខិតខំប្រឹងប្រែង និងការលះបង់របស់ ក្រុមការងារគ្រប់គ្រងគម្រោងអង្គភាពសាងសង់ អង្គភាពប្រឹក្សា អង្គភាពត្រួតពិនិត្យ និងអ្នកម៉ៅការទាំងអស់ ដែលបានជម្នះការលំបាកទាក់ទងនឹងភូមិសាស្ត្រ និងអាកាសធាតុ ដើម្បីបញ្ចប់សំណង់នេះ ប្រកបដោយគុណភាព បំពេញតាមតម្រូវការបច្ចេកទេស សោភ័ណភាព និងតាមកាលវិភាគដែលបានកំណត់។ ចំពោះការសហការ និងការបង្កលក្ខណៈ ងាយស្រួលពីសំណាក់ថ្នាក់ដឹកនាំក្រសួងការពារជាតិ ក៏ដូចជាអាជ្ញាធរមូលដ្ឋាន គ្រប់លំដាប់ថ្នាក់របស់កម្ពុជា ក្នុងអំឡុងពេលអនុវត្តការសាងសង់សំណង់នេះ។

លោកបានសង្កត់ធ្ងន់ថា «ក្រសួងការពារជាតិវៀតណាម សង្ឃឹមថាបន្ទាប់ពីដាក់ឱ្យប្រើប្រាស់ សំណង់នេះនឹងត្រូវបានប្រើប្រាស់ប្រកបដោយប្រសិទ្ធភាព បម្រើដល់ការងារបញ្ជាការ និងដឹកនាំបញ្ជា ព្រមទាំងបង្កលក្ខណៈ ងាយស្រួលឱ្យថ្នាក់ដឹកនាំ និងយោធិននៃបញ្ជាការដ្ឋានយោធភូមិភាគទី៣ អាចបំពេញការងារបានកាន់តែល្អប្រសើរ សូមឱ្យទំនាក់ទំនង (ភាពជាអ្នកជិតខាងល្អ និងជាមិត្តភាពជាប្រពៃណី សហប្រតិបត្តិការគ្រប់ជ្រុងជ្រោយ និងស្ថិតស្ថេរយូរអង្វែង» រវាងប្រទេសវៀតណាម-កម្ពុជា អមតៈជារៀងរហូត!)។

ឧត្តមសេនីយ៍ឯក ខៀវ ឆេន បានលើកឡើងថា កម្ពុជា បានដាក់ចេញគោលនយោបាយការបរទេស ដោយផ្តល់អាទិភាពទៅលើការពង្រឹងទំនាក់ទំនង និងកិច្ចសហប្រតិបត្តិការអន្តរជាតិ ដោយឈរលើស្មារតីមិត្តភាព សមភាព ការយោគយល់គ្នា ផលប្រយោជន៍គ្នាទៅវិញទៅមក សម្រាប់វិស័យការពារជាតិ និងសន្តិសុខ ការពង្រឹងទំនាក់ទំនង និងកិច្ចសហប្រតិបត្តិការជាមួយប្រទេសជិតខាង គឺជាគន្លឹះនៅក្នុងការថែរក្សាសន្តិភាព ស្ថិរភាព ជំរុញការអភិវឌ្ឍ និងការរស់នៅប្រកបដោយភាព សុខដុមរមនារបស់ប្រជាជន ចំពោះកិច្ចសហប្រតិបត្តិការទ្វេភាគីជាមួយវៀតណាម រាជរដ្ឋាភិបាលកម្ពុជា បានប្តេជ្ញាចិត្តឥតងាករេក្នុងការពង្រឹងទំនាក់ទំនង មិត្តភាព សាមគ្គីភាពជាប្រពៃណី ជាអ្នកជិតខាងល្អ និងផ្តល់ផលប្រយោជន៍ទៅ វិញទៅមក រវាងកងទ័ព និងប្រជាជនទាំងពីរ។

លោកឧត្តមសេនីយ៍ឯក បានបន្ថែមថា លើសពីនេះទៀត យើងពិតជាមានមោទនភាព ប្រកបដោយការសប្បាយរីករាយ និងអបអរសាទរ ចំពោះភាពរីកចម្រើនឥតឈប់ឈរនៃទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធ លើគ្រប់វិស័យ ទោះបីស្ថានភាពសន្តិសុខសកលមានការវិវត្តកាន់តែពិបាកប៉ាន់ស្មាន និងស្មុគស្មាញយ៉ាងណាក្តី។

ឧត្តមសេនីយ៍ឯក ខៀវ ឆេន បានឱ្យដឹងថា នៅក្នុងរយៈពេលប៉ុន្មានឆ្នាំចុងក្រោយនេះ ក្រសួងការពារជាតិប្រទេសទាំងពីរ បានពង្រឹងពង្រីកកិច្ចសហប្រតិបត្តិការវិស័យការពារជាតិ មានការរីកចម្រើនលូតលាស់ជាបន្តបន្ទាប់ បានអនុវត្តយ៉ាងមានប្រសិទ្ធភាពនូវទិសដៅដែលបានកំណត់ដោយថ្នាក់ដឹកនាំជាន់ខ្ពស់ដោយកិច្ចសហប្រតិបត្តិការការពារជាតិ កាន់តែមានលក្ខណៈជាក់ស្តែង និងមានប្រសិទ្ធភាព តាមរយៈលើកកម្ពស់យន្ត ការដែលមានស្រាប់ កាន់តែស៊ីជម្រៅ និងគ្រប់ជ្រុងជ្រោយដោយឈរលើមូលដ្ឋានគោរពគ្នា និងជឿ ទុកចិត្តគ្នាទៅវិញទៅមក «ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថេរភាពយូរអង្វែង» ដែលនាំមកនូវផលប្រយោជន៍ជាច្រើនសម្រាប់កងទ័ព និងប្រជាជន រួមចំណែកដល់សន្តិភាព ស្ថិរភាព និងការអភិវឌ្ឍរបស់ប្រទេសនីមួយៗ៕