(ភ្នំពេញ)៖ ក្រសួងប្រៃសណីយ៍ និងទូរគមនាគមន៍ បានដាក់ឱ្យប្រើប្រាស់នូវលេខកូដរួមតែមួយ សម្រាប់ប្រើប្រាស់បានគ្រប់ប្រព័ន្ធទូរសព្ទនៅកម្ពុជា ដើម្បីសម្រួលដល់ការប្រើប្រាស់ប្រចាំថ្ងៃរបស់ប្រជាពលរដ្ឋ។

គំនិតផ្តួចផ្តើមនេះ នឹងជួយលុបបំបាត់ការលំបាកក្នុងការចងចាំលេខកូដផ្សេងៗគ្នាសម្រាប់ប្រព័ន្ធ Cellcard, Metfone, Smart, និង Yes Seatel ដូចកាលពីមុន។

ក្រសួងប្រៃសណីយ៍ និងទូរគមនាគមន៍ បានរៀបចំលេខកូដរួមទាំងនេះឡើង ដើម្បីផ្តល់ភាពងាយស្រួល និងឥតគិតថ្លៃដល់អ្នកប្រើប្រាស់។ លេខកូដរួមទាំងនោះរួមមាន៖

* *1200# សម្រាប់ផ្តាច់សេវាទូរសព្ទបន្ថែម (VAS) ដែលមិនត្រូវការប្រើប្រាស់ ឬកាត់លុយមិនដឹងមុខ។

* *1201# សម្រាប់ពិនិត្យសមតុល្យទឹកប្រាក់។

* *1202# សម្រាប់ពិនិត្យអត្តសញ្ញាណអ្នកប្រើប្រាស់ (ថាស៊ីមនេះចុះឈ្មោះត្រឹមត្រូវហើយឬនៅ)។

* *1203*លេខកូដកាតកោស# សម្រាប់បញ្ចូលទឹកប្រាក់។

* 1204 សម្រាប់ទូរសព្ទទៅកាន់សេវាបម្រើអតិថិជនរបស់ក្រុមហ៊ុននីមួយៗ (ដោយឥតគិតថ្លៃ)។

* *1206# សម្រាប់បើកដំណើរការសេវាគោចរ (Roaming) ពេលធ្វើដំណើរទៅក្រៅប្រទេស។