(ពោធិ៍សាត់)៖ គណៈកម្មាធិការគណបក្សប្រជាជនកម្ពុជាខេត្តពោធិ៍សាត់ នាថ្ងៃទី១៦ ខែសីហា ឆ្នាំ២០២៦នេះ បានរៀបចំពិធីប្រកាសសេចក្តីសម្រេចកែសម្រួលរចនាសម្ព័ន្ធគណៈចលនាមហាជនខេត្ត ក្រោមអធិបតីភាពលោក ខូយ រីដា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សខេត្ត។

ពិធីដ៏មានសារៈសំខាន់នេះ ត្រូវបានប្រារព្ធធ្វើឡើងនៅមន្ទីរគណបក្សខេត្ត ស្ថិតក្នុងភូមិមាន់ចែ សង្កាត់ព្រៃញី ក្រុងពោធិ៍សាត់ ដោយមានការអញ្ជើញចូលរួមពីសំណាក់ សមាជិកអចិន្ត្រៃយ៍ ប្រធានគណៈជំនាញទាំង៥ ព្រមទាំងសមាជិក សមាជការមន្ទីរ អង្គភាព ស្រុក ក្រុង សរុបជាង ៥០០នាក់។

នៅក្នុងពិធីនោះ លោក ពៅ ពិសិដ្ឋ សមាជិកគណៈអចិន្ត្រៃយ៍គណបក្សខេត្ត អនុប្រធានគណៈចលនាមហាជន និងជាប្រធានលេខាធិការដ្ឋាន បានឡើងជម្រាបជូនអំពីការងារពង្រឹងរចនាសម្ព័ន្ធថ្នាក់ខេត្ត ស្រុក-ក្រុង ឃុំ-សង្កាត់។

បន្ទាប់មក លោក ម៉ៅ សាន សមាជិកគណៈកម្មាធិការកណ្តាល និងជាអនុប្រធានគណៈកម្មាធិការគណបក្សខេត្ត បានអានសេចក្តីសម្រេចលេខ២០៩ ចុះថ្ងៃទី២៩ ខែកក្កដា ឆ្នាំ២០២៦ ស្តីពីការកែសម្រួលសមាសភាពគណៈចលនាមហាជន តាមផ្នែកនីមួយៗរួមមាន៖

*គណៈចលនាមហាជនខេត្ត៖ សរុបចំនួន ៨៧រូប ដោយមាន លោក ខូយ រីដា ជាប្រធាន។
*គណៈចលនាយុវជន៖ សរុបចំនួន ៤៩រូប មាន លោក ខូយ រីដា ជាប្រធាន និងលោក ងួន ប៉ោសេង ជាអនុប្រធាន។
*ក្រុមចលនាស្ត្រី៖ សរុបចំនួន ២១រូប មាន លោកស្រី ឈឹម ស៊ីណា ជាប្រធាន។
*ក្រុមគណៈចលនាសហជីព៖ សរុបចំនួន ៦៣រូប មាន លោក ហេង សុភាណា ជាប្រធាន។
*គណៈចលនាអង្គការសមាគម និងដៃគូអភិវឌ្ឍន៍៖ សរុបចំនួន ៦០រូប មាន លោក ញឹក បានខេង ជាប្រធាន។
*លេខាធិការដ្ឋាន៖ សរុបចំនួន ២៥រូប មាន លោក ពៅ ពិសិដ្ឋ ជាប្រធាន។
*រចនាសម្ព័ន្ធស្រុក-ក្រុងទាំង៧៖ មានអភិបាលស្រុក-ក្រុង ជាប្រធាន និងក្រុមចលនាមហាជនទាំង ៤៩ឃុំ-សង្កាត់។

តួនាទីភារកិច្ចស្នូល៖ គណៈចលនាមហាជន ជាសេនាធិការ និងជាជំនួយការដ៏មានប្រសិទ្ធភាពរបស់គណៈកម្មាធិការបក្សគ្រប់ថ្នាក់ ក្នុងការដឹកនាំស្រទាប់មហាជន យុវជន ស្ត្រី កម្មករនិយោជិត និងស្ថាប័នពាក់ព័ន្ធ ព្រមទាំងក្តាប់ឱ្យបាននូវរាល់តម្រូវការ សំណូមពរ និងសតិអារម្មណ៍ ដើម្បីវិភាគ និងដោះស្រាយឱ្យបានទាន់ពេលវេលាស្របតាមគោលនយោបាយបក្ស។

មានប្រសាសន៍សំណេះសំណាលនាឱកាសនោះ លោក ខូយ រីដា បានសម្តែងការស្វាគមន៍យ៉ាងកក់ក្តៅ និងស្និទ្ធស្នាលបំផុតចំពោះមន្ត្រីបក្សគ្រប់ថ្នាក់ ដែលមានស្មារតី និងឆន្ទៈមោះមុតក្នុងការចូលរួមគាំទ្រយ៉ាងក្លៀវក្លាជាមួយគណបក្សប្រជាជនកម្ពុជា។ លោកបានស្នើឱ្យបង្កើនការយកចិត្តទុកដាក់ធ្វើអំពើល្អ រាល់សកម្មភាពបក្ស ត្រូវប្រកាន់ខ្ជាប់នូវស្មារតីទទួលខុសត្រូវខ្ពស់ ដើម្បីឈរលើផលប្រយោជន៍ប្រជាជន។ កសាងកម្លាំងឱ្យកាន់តែមុតមាំក្រោមពាក្យស្លោក «សមាជិកបក្សម្នាក់ រាប់ជាសន្លឹកឆ្នោតបានការ ១សន្លឹក» ដើម្បីប្រជែងយកជ័យជម្នះជូនគណបក្ស។

គណបក្សប្រជាជនកម្ពុជា ជាគណបក្សដែលមានស្នាដៃបម្រើជាតិដ៏ធធេង រំដោះប្រទេសពីរបបប្រល័យពូជសាសន៍ បញ្ចប់សង្គ្រាម និងនាំមកនូវសុខសន្តិភាព និងការអភិវឌ្ឍរហូតមកដល់សព្វថ្ងៃ។ ជោគជ័យ និងការរីកចម្រើនរបស់ប្រទេសជាតិ គឺក្រោមមគ្គុទេសក៍ដឹកនាំដ៏ឈ្លាសវៃ ប៉ិនប្រសព្វ និងប្រកបដោយគតិបណ្ឌិតរបស់ សម្តេចតេជោ ហ៊ុន សែន ប្រធានគណបក្ស និងជាប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងជាអនុប្រធានគណបក្ស៕