(ភ្នំពេញ)៖ កាលពីវេលាម៉ោង ១:៣០នាទី រំលងអធ្រាត្រឈានចូលថ្ងៃទី១៦ ខែសីហា ឆ្នាំ២០២៦ កម្លាំងការិយាល័យបង្ការ និង បង្ក្រាប នៃបញ្ជាការដ្ឋានកងរាជអាវុធហត្ថរាជធានីភ្នំពេញ បានចុះប្រតិបត្តិការបង្ក្រាបក្រុមយុវជនដែលបង្ហោះម៉ូតូយ៉ាងអនាធិបតេយ្យ ក្នុងមូលដ្ឋានខណ្ឌដង្កោ។

ការបង្ក្រាបនេះធ្វើឡើងនៅចំណុចផ្លូវបេតុង ភូមិជើងឯក សង្កាត់ជើងឯក ដោយបានឃាត់ខ្លួនយុវជនចំនួន ០៥នាក់ ដែលតែងតែប្រមូលផ្តុំគ្នាធ្វើសកម្មភាពបង្អួតម៉ូតូ និងបើកបរយ៉ាងលឿននៅលើផ្លូវសាធារណៈ បង្កការភ័យខ្លាច និងប៉ះពាល់ដល់សណ្តាប់ធ្នាប់សង្គម។

ក្រោយពីការឃាត់ខ្លួន កម្លាំងអាវុធហត្ថបានធ្វើការអប់រំ និងណែនាំដល់យុវជនទាំង ០៥នាក់ រួមទាំងធ្វើកិច្ចសន្យាជាលាយលក្ខណ៍អក្សរ ដើម្បីបញ្ឈប់សកម្មភាពបង្កភាពអនាធិបតេយ្យ ដែលអាចប៉ះពាល់ដល់ការសិក្សា កិត្តិយសគ្រួសារ និងសង្គមជាតិ។

ក្នុងប្រតិបត្តិការនេះ ក៏មានការដកហូតម៉ូតូចំនួន ០២គ្រឿង ដែលពួកគេបានប្រើប្រាស់ប្រព្រឹត្តល្មើស យកមករក្សាទុកនៅបញ្ជាការដ្ឋានកងរាជអាវុធហត្ថរាជធានីភ្នំពេញ រយៈពេល ០៣ខែ។

វិធានការនេះ ត្រូវបានអនុវត្តយ៉ាងម៉ឺងម៉ាត់ ស្របតាមបទបញ្ជា និងការណែនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលតែងតែយកចិត្តទុកដាក់ និងដាក់ចេញនូវវិធានការតឹងរ៉ឹងបំផុត ចំពោះបញ្ហាក្មេងទំនើងដែលបង្ហោះម៉ូតូអនាធិបតេយ្យតាមផ្លូវ។

ទស្សនា៖ https://t.me/freshnewsasia/294458