(កណ្តាល)៖ ការចែករំលែក និងយកអាសាអ្នកខ្សត់ គឺជាវប្បធម៌ដ៏ល្អមួយក្នុងសង្គមខ្មែរ ហើយ​ត្រូវ​បានសាបព្រោះជាប់ជាប្រចាំដោយថ្នាក់ដឹកនាំគណបក្សប្រជាជនកម្ពុជា។ យោងលើស្មា​រតី​នៃការ​អប់រំ និងសាបព្រោះនេះ លោក ទ្រី ដាលុច ប្រធានក្រុមការងារយុវជន​គណបក្ស​ចុះមូល​ដ្ឋាន​ឃុំត្បែង ស្រុកកណ្តាលស្ទឹង ខេត្តកណ្តាល តែងបានធ្វើសកម្មភាពសួរសុខទុក្ខ និងនាំ​អំណោយជាហូរហែជូនដល់ប្រជាពលរដ្ឋខ្វះខាតនៅក្នុងឃុំត្បែងនេះ។

នៅថ្ងៃអាទិត្យ ទី១៦ ខែសីហា ឆ្នាំ២០២៦ លោក ទ្រី ដាលុច បានចុះធ្វើសកម្មភាពនេះ​ជាបន្ត​ទៀត ដោយបានជួបសួរសុខទុក្ខ និងផ្តល់អំណោយដល់គ្រួសារក្រីក្រចំនួន ២០គ្រួសារ រស់នៅ​ក្នុងភូមិអង្គខ្លី ភូមិជ្រលង ភូមិកុកទិល និងភូមិក្រាំងឈើនាង ស្ថិតក្នុងមូលដ្ឋានឃុំត្បែង ស្រុក​កណ្ដាលស្ទឹង ខេត្តកណ្ដាល។

ក្នុងឱកាសនោះ លោក ទ្រី ដាលុច បានណែនាំដល់អាជ្ញាធរឃុំ និងសមត្ថកិច្ចនគរបាលឃុំ យក​ចិត្ត​ទុកដាក់ដោះស្រាយរាល់សំណូមពរ និងបញ្ហាប្រឈមផ្សេងៗ​ដែលប្រជា​ពលរដ្ឋក្នុងមូល​ដ្ឋាន​ជួបប្រទះ។ លោក ក៏បានណែនាំប្រជាពលរដ្ឋរួសរាន់បន្តសុពលភាពអត្តសញ្ញាណប័ណ្ណ ប្រសិន​បើផុត​កំណត់ ដើម្បីបំពេញសិទ្ធិ និងករណីយកិច្ចជាពលរដ្ឋក្នុងការចូលរួមបោះឆ្នោតជ្រើសរើស​ក្រុម​ប្រឹក្សាឃុំ សង្កាត់ អាណត្តិទី៦ ឆ្នាំ២០២៧ នាពេលខាងមុខនេះ។

សូមបញ្ជាក់ថា អំណោយដែលលោក ទ្រី ដាលុច បានផ្តល់ជូនដល់គ្រួសារក្រីក្រ​ទាំង២០គ្រួសារ​នោះ ក្នុងមួយគ្រួសារទទួលបានអង្ករ ២៥ គីឡូក្រាម មីជាតិ ១កេស ត្រីខ ១យួរ ទឹកត្រី ១យួរ ទឹកស៊ីអ៊ីវ ១យួរ ទឹកសុទ្ធ ១កេស និង ថវិកាមួយចំនួន៕