ពិព័រណ៍អាស៊ី បញ្ចប់ដោយជោគជ័យ និងបើកឱកាសថ្មីសម្រាប់កម្ពុជា លើវិស័យវប្បធម៌ ពាណិជ្ជកម្ម និងការទូតម្ហូបអាហារ
17-08-2026 11:24
(តូក្យូ, ជប៉ុន)៖ ពិព័រណ៍អាស៊ីលើកទី១ ដែលបានរៀបចំឡើងរយៈពេល២ថ្ងៃ ចាប់ពីថ្ងៃទី១៥ ដល់ថ្ងៃទី១៦ ខែសីហា ឆ្នាំ២០២៦ នៅសួនស៊ីបា (Shiba Park) ទីក្រុងតូក្យូ ប្រទេសជប៉ុន បានបញ្ចប់ដោយជោគជ័យ ដោយទទួលបានការចូលរួមយ៉ាងច្រើនកុះករ ជាង ១០,០០០នាក់។
ព្រឹត្តិការណ៍នេះ មិនត្រឹមតែជាវេទិកាសម្រាប់បង្ហាញសិល្បៈ វប្បធម៌ ប្រពៃណី ទេសចរណ៍ និងផលិតផលខ្មែរប៉ុណ្ណោះទេ ប៉ុន្តែថែមទាំងមានតូបម្ហូបអាហារ និងផលិតផលពីបណ្តាប្រទេសនានាក្នុងតំបន់អាស៊ី រួមទាំងប្រទេសជប៉ុន ដែលបានចូលរួមបង្ហាញពីភាពសម្បូរបែបនៃម្ហូបអាហារ វប្បធម៌ និងអត្តសញ្ញាណរបស់ប្រទេសនីមួយៗ។
តាមរយៈការចូលរួមរបស់តូបម្ហូបអាហារពីបណ្តាប្រទេសនានា ពិព័រណ៍អាស៊ីបានក្លាយជាវេទិកាមួយសម្រាប់ជំរុញការទូតម្ហូបអាហារ (Gastronomy Diplomacy) ដែលអាហារមិនត្រឹមតែជារសជាតិប៉ុណ្ណោះទេ ប៉ុន្តែជាស្ពានភ្ជាប់វប្បធម៌ មិត្តភាព និងការយល់ដឹងគ្នារវាងប្រជាជននៃបណ្តាប្រទេសក្នុងតំបន់។
ជាមួយគ្នានេះ ព្រឹត្តិការណ៍ ក៏បានបង្កើតឱកាសថ្មីៗសម្រាប់កិច្ចសហប្រតិបត្តិការពាណិជ្ជកម្ម ការផ្លាស់ប្តូរវប្បធម៌ និងការតភ្ជាប់ប្រជាជនទៅប្រជាជនរវាងកម្ពុជា ជប៉ុន និងបណ្តាប្រទេសដទៃទៀតក្នុងតំបន់អាស៊ី។
ពិធីបើកកម្មវិធី មានការអញ្ជើញចូលរួមពីភ្ញៀវកិត្តិយស រួមមាន៖ លោក ហៃ វណ្ណា ទីប្រឹក្សាសម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគមជនជាតិខ្មែររស់នៅប្រទេសជប៉ុន, លោក គង់ លីវ៉ា ជំនួយការសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា, លោក មាស សុខឆាយ នាយកសាខាប្រចាំប្រទេសកម្ពុជា នៃក្រុមហ៊ុនអាកាសចរណ៍ជាតិកម្ពុជា (Air Cambodia) និងលោក គីម សំអុល ប្រធានសហគមន៍ខ្មែរនៅប្រទេសជប៉ុន ព្រមទាំងតំណាងវិស័យឯកជន និងភ្ញៀវកិត្តិយសជាច្រើនរូប។
ក្នុងឱកាសនោះ លោក ហៃ វណ្ណា ប្រធានគណៈកម្មាធិការរៀបចំពិព័រណ៍អាស៊ី (Asian Festival – Angkor Days 2026 in Tokyo) បានសង្កត់ធ្ងន់ថា ពិព័រណ៍អាស៊ី គឺជាវេទិកាដ៏សំខាន់មួយសម្រាប់ពង្រឹងមិត្តភាព និងកិច្ចសហប្រតិបត្តិការរវាងកម្ពុជា និងជប៉ុន ព្រមទាំងបើកទូលាយដល់ការចូលរួមរបស់បណ្តាប្រទេសនានាក្នុងតំបន់អាស៊ី ដើម្បីជំរុញការផ្លាស់ប្តូរវប្បធម៌ ការតភ្ជាប់រវាងប្រជាជន និងកិច្ចសហប្រតិបត្តិការផ្នែកសេដ្ឋកិច្ចឱ្យកាន់តែស៊ីជម្រៅ។
ការជោគជ័យនៃការរៀបចំពិព័រណ៍អាស៊ីលើកទី១នេះ គឺជាជំហានដ៏សំខាន់ក្នុងការនាំយកវប្បធម៌ខ្មែរ ផលិតផលខ្មែរ ម្ហូបអាហារខ្មែរ និងសក្តានុពលទេសចរណ៍កម្ពុជា ទៅកាន់សង្គមជប៉ុន និងអន្តរជាតិ ព្រមទាំងបង្កើតបណ្តាញ និងឱកាសថ្មីៗសម្រាប់កិច្ចសហប្រតិបត្តិការជាមួយបណ្តាប្រទេសក្នុងតំបន់អាស៊ីនាពេលអនាគត។
ពីវប្បធម៌ទៅមិត្តភាព ពីមិត្តភាពទៅកិច្ចសហប្រតិបត្តិការ និងពីកិច្ចសហប្រតិបត្តិការទៅកាន់ឱកាសថ្មីសម្រាប់ប្រទេសកម្ពុជា៕
