(កំពង់ឆ្នាំង)៖ នៅព្រឹកថ្ងៃទី១៧ ខែសីហា ឆ្នាំ២០២៦ នៅសាលប្រជុំសណ្ឋាគារ សុវណ្ណភូមិ ក្រុងកំពង់ឆ្នាំង អង្គការ​​សង្គមស៊ីវិលក្នុងខេត្តកំពង់ឆ្នាំង បានចូលរួម​វេទិកាសន្ទនា ក្រោមប្រធានបទស្ដីពី​ «ការពង្រឹងសមត្ថភាពអង្គការ សង្គមស៊ីវិលក្នុងយុគសម័យ​ឌីជីថល» ដោយសហការរៀបចំដោយវេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការ​​គណៈរដ្ឋមន្រ្តី ដែលបានប្រព្រឹត្តទៅក្រោមអធិបតីភាពលោក ប៉ៃ សំបូរ​ អគ្គលេខាធិការ ​នៃអគ្គលេខាធិការដ្ឋាន​​ វ.ស.ស. តំណាងលោក កឹមរ័ត្ន វិសិដ្ឋ នាយករង​ខុទ្ទកាល័យសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងជាប្រធានក្រុមប្រឹក្សា​ភិបាល វ.ស.ស. និងលោក ជា សុខរិទ្ធិ អភិបាលរងខេត្តកំពង់ឆ្នាំង តំណាងដ៏ខ្ពង់ខ្ពស់លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំង ដោយ​មានការអញ្ជើញចូលរួម​ពី​អង្គការសង្គមស៊ីវិលក្នុងខេត្តកំពង់ឆ្នាំង និងអាជ្ញាធរមូលដ្ឋានជាច្រើននាក់។

ថ្លែងក្នុងពិធីបើកអង្គវេទិកាសន្ទនានាព្រឹកនេះ លោក ប៉ៃ សំបូរ​ ​បានកោតសរសើរ​ចំពោះកិច្ចសហការជិតស្និទ្ធ​រវាង​អាជ្ញាធរមូលដ្ឋាននិងអង្គការសង្គមស៊ីវិល​ក្នុងខេត្តកំពង់ឆ្នាំង ដែលបានរួមគ្នាជំរុញ​ការអភិវឌ្ឍសេដ្ឋកិច្ច សង្គម និង​លើកកម្ពស់​សុខុមាលភាព និងជីវភាព​រស់នៅរបស់ប្រជាពលរដ្ឋប្រកបដោយបរិយាបន្ន។

លោកអគ្គលេខាធិការ បានគូសប​ញ្ជាក់អំពីការយកចិត្តទុកដាក់ខ្ពស់របស់រាជរដ្ឋាភិបាល ​ចំពោះ​អង្គការសង្គមស៊ីវិលដែលជាដៃគូមិនអាច​ខ្វះបានក្នុងការអភិវឌ្ឍប្រទេសជាតិលើគ្រប់វិស័យ ស្របតាមគោលនយោបាយ និងយុទ្ធសាស្រ្តអភិវឌ្ឍន៍ជាតិ ក្រោមការ​ដឹកនាំ​ប្រកបដោយគតិបណ្ឌិត និង​ថាមវន្ដ​របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃ​កម្ពុជា។

ទន្ទឹមនឹងនេះ លោក​ក៏បានលើកទឹកចិត្តឱ្យអង្គការសង្គមស៊ីវិលក្នុងមូលដ្ឋាន​ជួយផ្សព្វផ្សាយជំរុញឱ្យ​​យុវជនចុះឈ្មោះចូលរៀនថ្នាក់បច្ចេកទេស​និងវិជ្ជាជីវៈនៅ​វិទ្យាស្ថាន​ជាតិពហុបច្ចេកទេសខេត្តកំពង់ឆ្នាំង ដើម្បី​ទទួលបានឱកាសការងារកាន់តែល្អប្រសើរនៅតាមក្រុមហ៊ុន សហគ្រាសក្នុងមូលដ្ឋាន ដែលអាចជួយលើកកម្ពស់​ជីវភាព​រស់នៅកាន់តែល្អប្រសើរ។

ជាមួយគ្នានេះដែរលោក ជា សុខរិទ្ធិ បានកោតសរសើរ និងវាយតម្លៃខ្ពស់ចំពោះកិច្ចសហការយ៉ាងជិតស្និទ្ធរវាងអាជ្ញាមូលដ្ឋានគ្រប់លំដាប់ថ្នាក់ និងអង្គការសង្គមស៊ីវិល ដែលបានចូលរួមពង្រឹងកិច្ចសហប្រតិបត្តិការលើគ្រប់វិស័យ រួមទាំងការលើកកម្ពស់លទ្ធិប្រជាធិបតេយ្យ និងអភិបាលកិច្ចនៅថ្នាក់មូលដ្ឋាន។

លោកបានលើកទឹកចិត្តឱ្យអង្គការសង្គមស៊ីវិលទាំងអស់​បន្ត​សហការឱ្យកាន់​​តែជិតស្និទ្ធ​ដើម្បីរួមគ្នាលើកកម្ពស់ការអភិវឌ្ឍសេដ្ឋកិច្ច-សង្គម និងបន្តពង្រឹងភាពជាដៃគូល្អ​ក្នុងការគាំទ្រអនុវត្ត​យុទ្ធសាស្រ្ត​បញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ស្របតាមកម្មវិធី​នយោបាយនិងយុទ្ធសាស្រ្តអភិវឌ្ឍន៍នានា ដើម្បីរក្សាបាននូវសុខសន្តិភាព​ ស្ថិរភាពរឹងមាំ ការគោរពសិទ្ធិសេរីភាព​​ស្របតាមគោលការណ៍នៃលទ្ធិប្រជាធិបតេយ្យ និងការអភិវឌ្ឍប្រកបដោយបរិយាបន្ន ក៏ដូចជាជំរុញការអនុវត្ត​​គោលនយោបាយភូមិ-ឃុំ​មានសុវត្ថិភាព ​និងការអភិវឌ្ឍលើគ្រប់វិស័យនៅថ្នាក់មូលដ្ឋាន។

អង្គវេទិកា​ក៏បានបើកទូលាយ​ឱ្យតំណាងអង្គការសង្គមស៊ីវិល​លើកយកនូវបញ្ហាប្រឈមនិងសំណូមពរ មកជជែក​ពិភាក្សាដោយត្រង់ទៅត្រង់មក ដើម្បីរួមគ្នាស្វែងរកដំណោះស្រាយនិងពង្រឹងកិច្ចសហការល្អជាមួយគ្នា។ ជាលទ្ធផល បញ្ហាប្រឈមនិង​​សំណូមពរ​​មួយចំនួន ត្រូវបាន​ដោះស្រាយជាក់ស្តែងក្នុងកិច្ច​ពិភាក្សាដោយផ្ទាល់ និងទទួលបានការសាទរពីអង្គវេទិកាទាំងមូល។

ក្នុងវេទិកាសន្ទនានាព្រឹកនេះផងដែរ លោក ហ៊ាង សុបញ្ញា អ្នកស្រាវជ្រាវ​នៃបណ្ឌិត្យសភា​​​បច្ចេកវិទ្យា​ឌីជីថលកម្ពុជា បានចូលរួមធ្វើបទបង្ហាញស្តីពី «ការយល់ដឹងអំពីអក្ខរកម្ម​ឌីជីថលនិងសុវត្ថិភាព​តាម​ប្រព័ន្ធ​បច្ចេកវិទ្យាសម្រាប់អង្គការ​​សង្គមស៊ីវិល» ក្រោមការសម្របសម្រួលពី វ.ស.ស. ដើម្បីចូលរួមផ្សព្វផ្សាយនិងលើកកម្ពស់បរិវត្តកម្ម​​ឌីជីថលនិងការយល់ដឹងអំពី​គោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥៕