(ភ្នំពេញ)៖ ស្មារតីឯករាជ្យរបស់ឥណ្ឌូណេស៊ី ត្រូវបានប្រារព្ធឡើងនៅរាជធានីភ្នំពេញ ដោយមានពលរដ្ឋឥណ្ឌូណេស៊ីប្រមាណ ២៥០នាក់ បានចូលរួមពិធីហូតទង់ជាតិ ដើម្បីអបអរសាទរខួបទី៨១ នៃទិវាបុណ្យឯករាជ្យជាតិសាធារណរដ្ឋឥណ្ឌូណេស៊ី នៅស្ថានទូតឥណ្ឌូណេស៊ី នាព្រឹកថ្ងៃចន្ទ ថ្ងៃទី១៧ ខែសីហា ឆ្នាំ២០២៦។

ពិធីដែលបានចាប់ផ្តើមនៅម៉ោង ៧៖០០ ព្រឹក ត្រូវបានប្រារព្ធឡើងក្នុងបរិយាកាសដ៏ឧឡារិក និងពោរពេញដោយភាពរីករាយ ដែលឆ្លុះបញ្ចាំងពីស្មារតីសាមគ្គីភាពដ៏រឹងមាំក្នុងចំណោមសហគមន៍ឥណ្ឌូណេស៊ីនៅកម្ពុជា។ ពលរដ្ឋឥណ្ឌូណេស៊ីជាច្រើន បានចូលរួមពិធីដោយស្លៀកពាក់ឈុតប្រពៃណី និងវ៉ាស្ត្រា (wastra) ដែលជាក្រណាត់ប្រពៃណីឥណ្ឌូណេស៊ី បង្ហាញពីបេតិកភណ្ឌវប្បធម៌ដ៏សម្បូរបែប និងភាពចម្រុះរបស់ប្រទេស ដែលបន្តរីកចម្រើនក្នុងចំណោមជនជាតិឥណ្ឌូណេស៊ីនៅកម្ពុជា។

ការហូតទង់ជាតិឥណ្ឌូណេស៊ីក្រហមស ត្រូវបានដឹកនាំដោយលោក Krishnajie Partadiredja ភារធារីស្តីទីនៃស្ថានទូតឥណ្ឌូនេស៊ីប្រចាំនៅភ្នំពេញ។ ទង់ជាតិត្រូវបានហូតដោយកងទ័ពទង់ជាតិឥណ្ឌូនេស៊ី (Paskibra) ដែលសមាជិកឆ្នាំនេះសុទ្ធតែជាស្ត្រី។

បន្ទាប់ពីពិធីនេះ ការរំលឹកខួបបានបន្តជាមួយនឹងការកាត់នំ tumpeng ដែលជានំអង្កររាងសាជីជានិមិត្តរូបនៃការដឹងគុណចំពោះឯករាជ្យភាពរបស់ឥណ្ឌូណេស៊ី ដែលត្រូវបានរក្សាអស់រយៈពេលជាងប្រាំបីទសវត្សរ៍។

នៅក្នុងសុន្ទរកថារបស់ខ្លួន លោកភារធារីស្តីទី Krishnajie បានអំពាវនាវដល់ពលរដ្ឋឥណ្ឌូណេស៊ីទាំងអស់នៅកម្ពុជា ឱ្យប្រើប្រាស់ការរំលឹកទិវាបុណ្យឯករាជ្យនេះជាឱកាសដើម្បីពង្រឹងសាមគ្គីភាព និងរួមចំណែកជាវិជ្ជមានក្នុងអំឡុងពេលស្នាក់នៅកម្ពុជា។

លោក Krishnajie Partadireja បានថ្លែងថា៖ «វឌ្ឍនភាពដែលឥណ្ឌូណេស៊ីទទួលបាននាពេលបច្ចុប្បន្ននេះ គឺជាលទ្ធផលនៃការតស៊ូ និងការលះបង់របស់បុព្វបុរសរបស់យើង។ វាជាទំនួលខុសត្រូវរបស់យើងក្នុងការបន្តការតស៊ូរបស់ពួកគេ ដើម្បីសម្រេចបានឥណ្ឌូណេស៊ីមួយដែលមានអធិបតេយ្យ យុត្តិធម៌ និងវិបុលភាព»។

លោកបានសង្កត់ធ្ងន់បន្ថែមថា ឥណ្ឌូណេស៊ីបានជម្នះរាល់បញ្ហាប្រឈមជាបន្តបន្ទាប់ នៅពេលដែលគ្រប់ផ្នែកនៃសង្គមបានរក្សាស្មារតីសាមគ្គីភាព។

លោកបានបន្ថែមថា៖ «ដោយដឹកនាំដោយស្មារតីតស៊ូនេះ ស្ថានទូតឥណ្ឌូណេស៊ីប្រចាំនៅភ្នំពេញ បន្តដើរតួនាទីយ៉ាងសកម្មក្នុងការជំរុញផលប្រយោជន៍ជាតិរបស់ឥណ្ឌូណេស៊ី ដោយពង្រឹងកិច្ចសហប្រតិបត្តិការជាមួយកម្ពុជា»។

ខួបទី៨១ នៃទិវាបុណ្យឯករាជ្យឥណ្ឌូណេស៊ីនៅភ្នំពេញ ក៏បានផ្តល់ឱកាសដើម្បីពង្រឹងមិត្តភាព និងកិច្ចសហប្រតិបត្តិការរវាងឥណ្ឌូណេស៊ី និងកម្ពុជាផងដែរ។ ក្រៅពីសមាជិកសហគមន៍ឥណ្ឌូណេស៊ី ពិធីនេះក៏មានការចូលរួមពីតំណាងកងយោធពលខេមរភូមិន្ទ និងនគរបាលជាតិកម្ពុជា ដែលជាដៃគូដ៏សំខាន់ក្នុងការពង្រឹងទំនាក់ទំនងទ្វេភាគីរវាងប្រទេសទាំងពីរ។

ខួបទី៨១ នៃទិវាបុណ្យឯករាជ្យឥណ្ឌូណេស៊ីនៅភ្នំពេញ មិនត្រឹមតែជាពេលវេលាដើម្បីរំលឹកដល់ដំណើរដ៏វែងឆ្ងាយរបស់ឥណ្ឌូណេស៊ីក្នុងនាមជាប្រទេសឯករាជ្យប៉ុណ្ណោះទេ ប៉ុន្តែក៏ជាឱកាសដើម្បីពង្រឹងសាមគ្គីភាពក្នុងចំណោមពលរដ្ឋឥណ្ឌូណេស៊ី ថ្លែងអំណរគុណដល់ដៃគូដ៏មានតម្លៃ និងបន្តពង្រឹងមិត្តភាព និងកិច្ចសហប្រតិបត្តិការរវាងឥណ្ឌូណេស៊ី និងកម្ពុជា៕