(ប៉េកាំង)៖ មន្រ្តីកំពូលៗរបស់ចិនដឹកនាំដោយលោកប្រធានាធិបតី ស៉ី ជីនពីង បានជួបជុំគ្នានៅឯមហាសាលប្រជាជន នៅថ្ងៃចន្ទ ទី១៧ ខែសីហា ដើម្បីប្រារព្ធពិធីរំលឹកខួបអាយុ ១០០ របស់អតីតមេដឹកនាំ លោក Jiang Zemin ដែលបានដឹកនាំចិន ក្នុងដំណាក់កាលដ៏សំខាន់នៃការផ្លាស់ប្តូរពីប្រទេសមានសេដ្ឋកិច្ចតូចតាច ទៅជាប្រទេសមហាអំណាចសេដ្ឋកិច្ចមួយ លើពិភពលោក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក Jiang ដែលទទួលមរណភាពក្នុងឆ្នាំ២០២២ នៅអាយុ ៩៦ឆ្នាំ បានធ្វើឱ្យអ្នកដែលធ្លាប់មានមតិជំទាស់ ឬមិនជឿជាក់លើសមត្ថភាពរបស់លោក មានភាពភ្ញាក់ផ្អើល និងបានដឹកនាំប្រទេសចិនឆ្លងកាត់រយៈពេល ១ទសវត្សរ៍នៃកំណើនសេដ្ឋកិច្ចយ៉ាងឆាប់រហ័ស បន្ទាប់ពីព្រឹត្តិការណ៍ Tiananmen ឆ្នាំ១៩៨៩។

ក្នុងសុន្ទរកថារយៈពេល ៤០នាទី លោក ស៉ី អំពាវនាវឱ្យបក្សកុម្មុយនីស្តចិន បន្តកេរដំណែលរបស់លោក Jiang ដោយណែនាំថាថ្នាក់ដឹកនាំបច្ចុប្បន្ន គឺជាអ្នកបន្តវេននៃគំរូនយោបាយ និងមនោគមវិជ្ជារបស់លោក Jiang។ លោក ស៉ី គូសបញ្ជាក់ថា «នៅលើដំណើរថ្មីនាពេលខាងមុខ យើងត្រូវបង្កើនការប្រុងប្រយ័ត្នខ្ពស់ ចំពោះគ្រោះថ្នាក់ដែលអាចកើតមាន»។

គួរបញ្ជាក់ថា ដៃគូដឹកនាំរួមរបស់លោក Jiang គឺអតីតនាយករដ្ឋមន្ត្រី Zhu Rongji ដែលជាបុគ្គលម៉ឺងម៉ាត់ខ្លាំង និងប្រកាន់ខ្ជាប់គោលការណ៍ជាក់ស្តែងនិយម បានទទួលមរណភាព កាលពីសប្តាហ៍មុន ហើយពិធីបុណ្យសពត្រូវបានកំណត់ឡើងនៅថ្ងៃអង្គារ៕