(សៀមរាប)៖ លោក ឌី រ៉ាដូ អភិបាលរងខេត្តសៀមរាប បានលើកឡើងថា ការពង្រឹងសមត្ថភាពធនធានមនុស្សក្នុងវិស័យសណ្ឋាគារ និងបដិសណ្ឋារកិច្ច សម្រាប់ខេត្តសៀមរាប ជាកត្តាចាំបាច់ ដើម្បីឆ្លើយតបនឹងតម្រូវការរបស់ទីផ្សារទេសចរណ៍ ដែលកាន់តែ មានការប្រកួតប្រជែង និងការរំពឹងទុកខ្ពស់ពីភ្ញៀវទេសចរ។

ការថ្លែងយ៉ាងដូច្នេះរបស់ លោក ឌី រ៉ាដូ នៅក្នុងវគ្គបណ្តុះបណ្តាលគ្រូបង្គោល និងអ្នកវាយតម្លៃគ្រូបង្គោលជាតិនៃសេវាកម្មសណ្ឋាគារ ស្របតាមស្មារតីនៃកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន ដែលរៀបចំដោយក្រសួងទេសចរណ៍ នាថ្ងៃទី១៧ ខែសីហា ឆ្នាំ២០២៦នេះ។

លោក ឌី រ៉ាដូ បានបន្តថា ក្នុងនាមរដ្ឋបាលខេត្តសៀមរាប សូមសម្តែងការគាំទ្រ ចំពោះក្រសួងទេសចរណ៍ ស្ថាប័នពាក់ព័ន្ធ វិស័យឯកជន និងដៃគូអភិវឌ្ឍន៍ ក្នុងការបន្តលើកកម្ពស់គុណភាព សេវាកម្ម និងការអភិវឌ្ឍធនធានមនុស្សក្នុងវិស័យទេសចរណ៍។ លោកបានលើកទឹកចិត្តដល់សិក្ខាកាមទាំងអស់ សូមខិតខំទទួលយកចំណេះដឹង បទពិសោធន៍ និង ជំនាញពីវគ្គបណ្តុះបណ្តាលនេះ ដើម្បីយកទៅអនុវត្ត និងបន្តចែករំលែកដល់អ្នកជំនាញ និងបុគ្គលិក ទេសចរណ៍នៅតាមស្ថាប័ន និងអង្គភាពរៀងៗខ្លួន។

លោក ឈុន មករា អគ្គនាយកគ្រប់គ្រងឧស្សាហកម្មទេសចរណ៍ បានលើកឡើងថា វគ្គបណ្តុះបណ្តាលនេះមានសារៈសំខាន់ខ្លាំងណាស់ក្នុងការលើកកម្ពស់វិជ្ជាជីវៈទេសចរណ៍តាមស្តង់ដាអាស៊ាន។ លោកក៏បានផ្ដល់អនុសាសន៍គន្លឹះដល់សិក្ខាកាម ឱ្យយកចិត្តទុកដាក់ខ្ពស់ក្នុងការសិក្សាគោរពវិន័យ និងត្រៀមខ្លួនយកចំណេះដឹងទាំងនេះទៅបណ្តុះបណ្តាលបន្តដល់បុគ្គលិកក្នុងអង្គភាពរបស់ខ្លួន ដើម្បីរួមចំណែកផ្តល់សេវាកម្មជូនអតិថិជនប្រកបដោយគុណភាព និងស្មារតីទទួលខុសត្រូវខ្ពស់។

លោក ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ បានឱ្យដឹងថា សិក្ខាកាមប្រមាណ ៨០% ដែលបានចូលរួមគឺជាថ្នាក់គ្រប់គ្រងមកពីវិស័យឯកជន ទាំងផ្នែកសណ្ឋាគារ និងសេវាកម្មធ្វើដំណើរ។ ពួកគាត់នឹងក្លាយជាគ្រូបង្គោលស្នូលរបស់ក្រសួងទេសចរណ៍ ដើម្បីជំរុញការបណ្តុះបណ្តាលផ្ទៃក្នុង (In-House Training) ជូនដល់បុគ្គលិករបស់ខ្លួនដោយប្រើប្រាស់ស្តង់ដាសមត្ថភាពអាស៊ាន។

សូមជម្រាបថា វគ្គបណ្តុះបណ្តាលនេះប្រព្រឹត្តទៅ រយៈពេល១សប្តាហ៍ពេញ ចាប់ពីថ្ងៃទី១៧ ដល់ទី២៣ ខែសីហា ឆ្នាំ២០២៦ ដោយមានការបង្រៀនផ្ទាល់ពីគ្រូបង្គោលអាស៊ានដែលមានការទទួលស្គាល់ពីលេខាធិការដ្ឋានអាស៊ាន និងក្រសួងទេសចរណ៍។

សិក្ខាកាម នឹងទទួលបានការបណ្តុះបណ្តាលលើចំណុចស្នូលសំខាន់ៗ រួមមាន៖ ការយល់ដឹងពីកម្មវិធីបណ្តុះបណ្តាលស្របតាមស្តង់ដាសមត្ថភាពអាស៊ាន, ការស្វែងយល់ស៊ីជម្រៅពីប្រព័ន្ធបណ្តុះបណ្តាល និងប្រព័ន្ធវាយតម្លៃផ្អែកលើសមត្ថភាព, ជំនាញរៀបចំកញ្ចប់គុណវុឌ្ឍ និងការប្រើប្រាស់ប្រអប់បណ្តុះបណ្តាលអាស៊ាន និងវិធីសាស្ត្របង្រៀន វិធីសាស្ត្រវាយតម្លៃសមត្ថភាព និងការរៀបចំផែនការមេរៀន។

សិក្ខាកាមទាំងអស់ តម្រូវឱ្យឆ្លងកាត់ការវាយតម្លៃសមត្ថភាពយ៉ាងហ្មត់ចត់ ដើម្បីធានាបាននូវគុណភាព និងភាពជាម្ចាស់ការលើការផ្ដល់សេវាកម្មទេសចរណ៍ កម្រិតស្តង់ដាអន្តរជាតិមួយនេះ៕