(ភ្នំពេញ)៖ លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ (ក.ប.ទ.) និងជាប្រធានគណៈកម្មាធិការដ្ឋាភិបាលឌីជីថល នាព្រឹកថ្ងៃទី១៧ ខែសីហា ឆ្នាំ២០២៦ បានអញ្ជើញជាអធិបតីក្នុងពិធីបើកសិក្ខាសាលាស្តីពី កិច្ចសហប្រតិបត្តិការលើការដាក់ឱ្យប្រើប្រាស់ថ្នាលផ្ទៀងផ្ទាត់ឯកសារ Verify.gov៖ ការចែករំលែកបទពិសោធ និងកសាងសមត្ថភាពរួមគ្នា ដោយមានការអញ្ជើញចូលរួមពីគណៈប្រតិភូពីសាធារណរដ្ឋប្រជាធិបតេយ្យទីម័រឡេស្ដេ ថ្នាក់ដឹកនាំ ក.ប.ទ. ក្រសួងអប់រំ យុវជន និងកីឡា ក្រសួងសុខាភិបាល ក្រសួងសាធារណការនិងដឹកជញ្ជូន សាកលវិទ្យាល័យជាតិគ្រប់គ្រង ក្រសួង ស្ថាប័នពាក់ព័ន្ធ តំណាងដៃគូអភិវឌ្ឍន៍ និងគ្រឹះស្ថានអប់រំ ប្រមាណ ៣០០រូប។

សិក្ខាសាលានេះ មានគោលបំណងចែករំលែកបទពិសោធផ្ទាល់របស់កម្ពុជាក្នុងការដាក់ឱ្យប្រើថ្នាល verify.gov.kh ទាំងផ្នែកបច្ចេកទេសនិងផ្នែកអនុវត្តតាមវិស័យ ទៅដល់ប្រតិភូអន្តរក្រសួងមកពីទីម័រឡេស្តេ។

ថ្លែងក្នុងពិធីបើកសិក្ខាសាលា លោករដ្ឋមន្រ្តី បានលើកឡើងថា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃនិងប្រកបដោយគតិបណ្ឌិតរបស់ សម្តេចមហាបវរធិបតីនាយករដ្ឋមន្ត្រី បានកំណត់យក “បច្ចេកវិទ្យា” ជាពិសេស បច្ចេកវិទ្យាឌីជីថល ជាអាទិភាពគន្លឹះថ្មីមួយក្នុងការជំរុញការអភិវឌ្ឍសេដ្ឋកិច្ចនិងសង្គមកម្ពុជា។

លោករដ្ឋមន្រ្តី បានថ្លែងថា ដើម្បីឱ្យការធ្វើបរិវត្តកម្មរដ្ឋាភិបាលឌីជីថលទទួលជោគជ័យត្រូវការកត្តារួមផ្សំមួយចំនួន រួមមាន ការសម្រេចចិត្តនយោបាយ កិច្ចសហការរវាងក្រសួង ស្ថាប័នពាក់ព័ន្ធ ប្រព័ន្ធដែលបង្កើតឡើងដោយធ្វើសមាហរណកម្មចូលគ្នាបាន ធនធានមនុស្សជំនាញ ធនធានហិរញ្ញវត្ថុ ហេដ្ឋារចនាសម្ព័ន្ធឌីជីថល និងមានកត្តារួមផ្សំមួយចំនួនអាស្រ័យតាមប្រទេសនីមួយៗ។

តាមការវាយតម្លៃដោយជួបពិភាក្សាជាមួយថ្នាក់ដឹកនាំឌីជីថលជាង ២០ប្រទេស បរិវត្តកម្មរដ្ឋាភិបាលឌីជីថលអាចចំណាយពេលដល់ទៅ ២០ទៅ៣០ឆ្នាំ ហើយមិនមានប្រទេសច្រើនទេដែលបានជោគជ័យខ្ពស់។ ដើម្បីពន្លឿនបរិវត្តកម្មឌីជីថលនៅកម្ពុជា ក្រសួងប្រៃសណីយ៍និងទូរគមនាគមន៍បានរៀបចំអភិវឌ្ឍបច្ចេកវិទ្យាទំនើប ដើម្បីកាត់បន្ថយពេលវេលា ដែលយើងប្រើពី ២០-៣០ឆ្នាំ មកនៅសល់ត្រឹម ៦-៧ឆ្នាំ ឬក្រោម ១០ឆ្នាំ ហើយធានាថា បច្ចេកវិទ្យាទាំងនេះនឹងធ្វើឱ្យយើងសម្រេចបានគោលដៅ ទោះបីជាកត្តាខាងលើ ណាមួយជាឧបសគ្គក៏ដោយ។

អនុវត្តតាមផែនការនេះ កម្ពុជាបានដាក់ឱ្យប្រើប្រាស់ថ្នាល verify.gov.kh និងកម្មវិធី DG SuperApp ដែលអាចផ្ដល់សេវាសាធារណៈបានឆាប់រហ័ស ងាយស្រួលប្រើប្រាស់សម្រាប់ប្រជាពលរដ្ឋ និងមានសុវត្ថិភាពទិន្នន័យ ដែលជាហេតុនាំឱ្យថ្នាលនេះត្រូវបានទទួលស្គាល់ដោយអង្គការសហប្រជាជាតិនិងអង្គការអន្តរជាតិនានា។

ក្រសួងកំពុងតែប្រែក្លាយថ្នាល verify.gov.kh ឱ្យទៅជាហេដ្ឋារចនាសម្ព័ន្ធឌីជីថលសាធារណៈ (DPI) ដែលមិនអាចខ្វះបាន ហើយជួយបំពេញបន្ថែលលើ DPI ផ្សេងទៀត ដើម្បីពន្លឿនបរិវត្តកម្មឌីជីថលនៅកម្ពុជា ហើយជឿជាក់ថាកិច្ចសហការជាមួយទីម័រឡេស្តេឱ្យនឹងបានជោគជ័យ ហើយក្លាយជាកិច្ចសហប្រតិបត្តិការគំរូមួយបន្ថែមទៀត សម្រាប់បណ្ដាប្រទេសដែលមានចំណាប់អារម្មណ៍ជាច្រើន អាចចូលរួមប្រើប្រាស់បច្ចេកវិទ្យាដែលបង្កើតដោយកម្ពុជាដូចគ្នា៕