ស្ពានបេតុងថ្មីឆ្លងកាត់ស្ទឹងពោធិ៍សាត់ ក្នុងស្រុកភ្នំក្រវាញ គឺសម្រេចបានជិត១០០%ហើយ និងបានរៀបចំដំឡើងអំពូលសូឡា ១៨បង្គោល រួចរាល់ ដើម្បីបំភ្លឺសោភណ្ឌភាព ត្រៀមដាក់ឱ្យប្រើប្រាស់មុនបុណ្យភ្ជុំបិណ្ឌ!
17-08-2026 22:30
(ពោធិ៍សាត់)៖ គម្រោងសាងសង់ស្ពានបេតុងប្រវែង១៤៤ម៉ែត្រ ទទឹង១០ម៉ែត្រ ឆ្លងកាត់ស្ទឹងពោធិ៍សាត់ ដែលជាអំណោយដ៏ថ្លៃថ្លារបស់ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត គឺសម្រេចបានជិត១០០%ហើយ ដោយគ្រោងនឹងបញ្ចប់ការដ្ឋានទាំងស្រុង នៅមុនពិធីបុណ្យភ្ជុំបិណ្ឌខាងមុខ។ ជាពិសេសនាថ្ងៃទី១៧ ខែសីហា ឆ្នាំ២០២៦ ក្រុមការងារបច្ចេកទេសរដ្ឋបាលខេត្ត បានចុះដំឡើង អំពូលភ្លើងដើរដោយថាមពលពន្លឺព្រះអាទិត្យ (Solar) ប្រភេទLED សរុបចំនួន១៨បង្គោល នៅលើស្ពាននេះរួចរាល់ផងដែរ។
យោងតាមរបាយការណ៍កន្លងទៅ នាថ្ងៃទី៣០ ខែកក្កដា ឆ្នាំ២០២៦ លោក ខូយ រីដា អភិបាលខេត្តពោធិ៍សាត់ ដោយមានការចូលរួមពីឧត្តមសេនីយ៍ឯក គង់ អៀង អនុរដ្ឋលេខាធិការក្រសួងការពារជាតិ បានអញ្ជើញចុះពិនិត្យផ្ទាល់វឌ្ឍនភាពនៃគម្រោងស្ថាបនាស្ពានបេតុងថ្មីនេះ ដែលស្ថិតនៅភូមិបោះពួយ ឃុំលាច (ត្រើយខាងកើត) និងត្រើយខាងលិចភូមិព្រែក៣ ឃុំសំរោង ស្រុកភ្នំក្រវាញ ខេត្តពោធិ៍សាត់។
ស្ពាននេះអនុវត្តគម្រោងសាងសង់ដោយ កងវិស្វកម្ម ក្រសួងការពារជាតិ តាមរយៈក្រសួងអភិវឌ្ឍន៍ជនបទ ដោយបានបើកការដ្ឋានសាងសង់តាំងពីថ្ងៃទី២២ ខែមេសា ឆ្នាំ២០២៥។
ក្នុងឱកាសចុះពិនិត្យការដ្ឋាននោះ លោក ខូយ រីដា បានថ្លែងអំណរគុណយ៉ាងជ្រាលជ្រៅបំផុតចំពោះ សម្តេចបវរធិបតី ហ៊ុន ម៉ាណែត និងលោកជំទាវបណ្ឌិត ដែលបានផ្តល់កាដូដ៏មានតម្លៃជាស្ពានបេតុងដ៏រឹងមាំនេះ ជូនដល់ប្រជាពលរដ្ឋក្នុងខេត្តពោធិ៍សាត់ ដើម្បីសម្រាលការលំបាកក្នុងការធ្វើដំណើររបស់បងប្អូនប្រជាពលរដ្ឋក្នុងស្រុកភ្នំក្រវាញ។
ការដំឡើង អំពូលសូឡាចំនួន១៨បង្គោល នៅថ្ងៃទី១៧ ខែសីហា ឆ្នាំ២០២៦នេះ នឹងជួយបំភ្លឺផ្លូវ លើកកម្ពស់សោភណ្ឌភាពស្ពាននៅពេលយប់ ក៏ដូចជាធានាបាននូវសុវត្ថិភាព និងភាពងាយស្រួលជូនដល់ប្រជាពលរដ្ឋក្នុងការធ្វើដំណើរឆ្លងកាត់ប្រកបដោយភាពកក់ក្តៅ។
គួររំលឹកផងដែរថា ស្ពានដែកបាឡេចាស់ពីមុនមានប្រវែង១៣៨ម៉ែត្រ និងទទឹង៥ម៉ែត្រ ដែលជាអំណោយរបស់សម្តេចតេជោ ហ៊ុន សែន អតីតនាយករដ្ឋមន្ត្រី ត្រូវបានសាងសង់កាលពីឆ្នាំ២០០៥ ប៉ុន្តែបានរងការទ្រុឌទ្រោម និងប្រឈមខ្លាំងដោយសារជំនន់ទឹកភ្លៀង និងការដឹកជញ្ជូនសម្ភារៈសំណង់ផ្សេងៗ។
ការស្ថាបនាស្ពានបេតុងថ្មីដ៏ប្រណិតនេះ នឹងនាំមកនូវគុណប្រយោជន៍យ៉ាងមហាសាល ក្នុងការធានាបាននូវការតភ្ជាប់ទំនាក់ទំនងគមនាគមន៍រវាងស្រុកភ្នំក្រវាញ និងតំបន់ជុំវិញឱ្យកាន់តែមានភាពរលូន ប្រកបដោយសុវត្ថិភាពខ្ពស់ ព្រមទាំងជួយជំរុញកំណើនសេដ្ឋកិច្ចមូលដ្ឋាន ការដឹកជញ្ជូនកសិផល និងការធ្វើដំណើររបស់ប្រជាពលរដ្ឋបានពេញមួយឆ្នាំ ដោយពុំមានការព្រួយបារម្ភពេលមានជំនន់ទឹកភ្លៀងដូចមុនទៀតឡើយ៕
