(កំពត)៖ សម្ដេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា អញ្ជើញជាអធិបតីក្នុងពិធីដាំកូនឈើជានិមិត្តរូប ចំនួន ២ម៉ឺនដើម ក្រោមប្រធានបទ «រួមគ្នាថែរក្សារុក្ខជាតិ ដើម្បីទេសចរណ៍ធម្មជាតិ បែបជំនឿសាសនា និងប្រពៃណី» នៅទីសក្ការៈវិមានឋានសួគ៌ នៃគម្រោង យិន ផារ៉ាដាយ ស្ថិតក្នុងស្រុកទឹកឈូ ខេត្តកំពត នាព្រឹកថ្ងៃអាទិត្យ ៣កើត ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៦ ខែសីហា ឆ្នាំ២០២៦ ខេត្តកំពត។

តាមការលើកឡើងរបស់ឧកញ៉ា ឡុង ណាលី សួនឧទ្យានអនុស្សាវរីយ៍ យិន ផារ៉ាដាយ គឺជាសួនឧទ្យានអនុស្សាវរីយ៍ហុងស៊ុយបែបវិទ្យាសាស្រ្តឈានមុខគេបង្អស់នៅក្នុងតំបន់ ដែលបង្កើនភាពរុងរឿងនៃជីវិត និងកសាងមោទនភាព សម្រាប់ប្រទេសកម្ពុជាទៅកាន់ពិភពលោក។ មិនត្រឹមតែប៉ុណ្ណោះ មានទីតាំង ស្ថិតនៅលើទឹកដីដ៏ពិសិដ្ឋនៃថាមពលចក្រវាលធាតុទាំងប្រាំ មានហុងស៊ុយល្អពីធម្មជាតិ ដែលអាចជួយដល់កូនចៅគ្រប់ជំនាន់។ ទន្ទឹមនឹងនោះ ទីតាំងនេះ ក៏បានទាក់ទងភ្ញៀវ ទេសចរណ៍ជាតិ និងអន្តរជាតិចូលទស្សនាក្នុងឆ្នាំ២០២៦ ប្រមាណជិត១៣ម៉ឺននាក់។

ថ្លែងក្នុងពិធីនោះ លោក ម៉ៅ ធនិន អភិបាលនៃគណៈអភិបាលខេត្តកំពត ក៏បានលើកឡើងថា ថ្លែងនូវការកោតសសើរចំពោះការចូលរួមចំណែករបស់ក្រុមហ៊ុន និងគាំទ្រយ៉ាងពេញទំហឹង ចំពោះគំរោងសាងសង់ និងបានសំណូមពរចំណុះបណ្តាគម្រោងនាពេលខាងមុខទៀត ត្រូវគិតគូរយកចិត្តទុកដាក់អំពីរចនាបទ វប្បធម៌ សាសនា និងជំនឿ ដែលជាកេរ្តិ៍ដំណែលរបស់បុព្វបុរសជំនាន់មុនទុកឱ្យកូនចៅជំនាន់ក្រោយ។

លោកបណ្ឌិត ចាយ បូរិន រដ្ឋមន្រ្តីក្រសួងធម្មការ ក៏បានលើកឡើងថា សុខដុមនីយកម្មសាសនានៅកម្ពុជា បានអនុញ្ញាតឱ្យប្រជាពលរដ្ឋអាចប្រារព្ធពិធីសាសនារៀងៗខ្លួនបាន ក្រោមម្លប់សុខសន្តិភាព ដែលជាមរតកដ៏មានតម្លៃនៃនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា និងបានបន្តវេនដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ។

មានប្រសាសន៍ក្នុងអង្គពិធី សម្តេចកិត្តិសង្គហបណ្ឌិត ម៉ែន សំអន បានលើកឡើងថា រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយចក្ខុវិស័យវែងឆ្ងាយ និងភាពប្រាកដនិយម របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវគោលនយោបាយវិស័យវប្បធម៌ ទេសចរណ៍ និងសាសនាក្នុងយុទ្ធសាស្ត្របញ្ចកោណ ដំណាក់កាលទី១ ស្តីពីមត៌កសិល្បៈ វប្បធម៌ ជំនឿ និងសាសនា ដែលបាត់បង់ ឬប្រឈមនឹងការបាត់បង់ ត្រូវខិតខំស្តារឱ្យរស់រវើកឡើងវិញ ហើយចូលរួមលើកកម្ពស់ និងលើកស្ទួយនូវមត៌កវប្បធម៌ ជំនឿនិងសាសនា នោះធ្វើឱ្យមានកិត្យានុភាព ល្បីរន្ទឺ សុះសាយ ទៅទូទាំងសកលលោកដើម្បីទាក់ទាញភ្ញៀវទេសចរណ៍ឱ្យចូល មកទស្សនា និងជាការអភិវឌ្ឍសិល្បៈ វប្បធម៌ ជំនឿ និងសាសនា ប្រពៃណីឱ្យរឹងរិតតែរីកចម្រើន រុងរឿងជាលំដាប់៕