កម្លាំងអាវុធហត្ថស្រុកថ្ពង បង្ក្រាប និងឃាត់ខ្លួនជនសង្ស័យម្នាក់ ករណីប្រើប្រាស់គ្រឿងញៀនហួសកម្រិត បំផ្លាញទ្រព្យសម្បត្តិប្រជាពលរដ្ឋ
18-08-2026 08:49
(កំពង់ស្ពឺ)៖ កាលពីវេលាម៉ោង ០០:៤៥ នាទីយប់ ថ្ងៃទី១៦ ខែសីហា ឆ្នាំ២០២៦ កម្លាំងមូលដ្ឋានកងរាជអាវុធហត្ថស្រុកថ្ពង បានធ្វើការបង្រ្កាប និងឃាត់ខ្លួនជនសង្ស័យម្នាក់ភ្លាមៗ នៅចំណុចភូមិថ្មីជង្រុក ឃុំយាអង្គ ស្រុកថ្ពង ខេត្តកំពង់ស្ពឺ ក្រោយទទួលបានពាក្យបណ្តឹងពីប្រជាពលរដ្ឋតាមរយៈលេខអន្តរាគមន៍ Hotline 1292 អំពីករណីប្រើប្រាស់គ្រឿងញៀនហួសកម្រិត និងបំផ្លាញទ្រព្យសម្បត្តិសាធារណៈ។
ប្រតិបត្តិការនេះបានធ្វើឡើងយ៉ាងម៉ឺងម៉ាត់ តាមបទបញ្ជារបស់ថ្នាក់ដឹកនាំ ជាពិសេសក្រោមការដឹកនាំបញ្ជាដោយផ្ទាល់ពីសំណាក់ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ ព្រមទាំងមានការសម្របសម្រួលនីតិវិធីពី ឯកឧត្ដមព្រះរាជអាជ្ញា អមសាលាដំបូងខេត្ត។
លោកវរសេនីយ៍ត្រី ធី រ៉ាស៊ី មេបញ្ជាការស្តីទីកងរាជអាវុធហត្ថស្រុកថ្ពង បានដឹកនាំកម្លាំងចុះទៅដល់កន្លែងកើតហេតុភ្លាមៗ ដើម្បីធ្វើការបង្រ្កាប។
ជនសង្ស័យមានឈ្មោះ ទុំ សុធា ភេទប្រុស អាយុ ៣១ឆ្នាំ មុខរបរធ្វើការរោងចក្រ មានទីលំនៅភូមិត្រពាំងត្រើយ ឃុំញរ ស្រុកកំពងរោ ខេត្តស្វាយរៀង។
ជននេះបានធ្វើសកម្មភាពដោយយកដែកថ្នាំងអំពៅវាយទៅលើរថយន្តដែលចតចោល បណ្ដាលឱ្យខូចខាតចំនួន ០៥គ្រឿង និងកុំព្យូទ័រចំនួន ០១គ្រឿង។ វត្ថុតាងដែលបានចាប់យករួមមាន ដែកថ្នាំងអំពៅចំនួន ០១ដើម។
បច្ចុប្បន្ន ជនសង្ស័យ រួមនិងវត្ថុតាង ត្រូវបានកម្លាំងជំនាញបញ្ជាការដ្ឋានកងរាជអាវុធហត្ថខេត្តកំពង់ស្ពឺ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីបន្តនីតិវិធីតាមផ្លូវច្បាប់។
ករណីនេះជាការក្រើនរំលឹកដល់សាធារណជនអំពីគ្រោះថ្នាក់នៃការប្រើប្រាស់គ្រឿងញៀន និងការប្តេជ្ញាចិត្តរបស់កងកម្លាំងមានសមត្ថកិច្ចក្នុងការរក្សាសន្តិសុខ សណ្តាប់ធ្នាប់សាធារណៈ និងការពារទ្រព្យសម្បត្តិរបស់ប្រជាពលរដ្ឋ។
