សហជីពមើលឃើញថា ក្រសួងការងារ បានធានាពីសិទ្ធ និងអត្ថប្រយោជន៍ស្របតាមច្បាប់ចំពោះរោងចក្រ ៣ដែលផ្អាកដំណើរការ ដោយសារថៃឈ្លានពាន
18-08-2026 12:38
(ភ្នំពេញ)៖ ថ្នាក់ដឹកនាំសហជីពធំៗនៅកម្ពុជា បានមើលឃើញថា ក្រសួងការងារ បានធានាពីសិទ្ធ និងអត្ថប្រយោជន៍ស្របតាមច្បាប់ចំពោះរោងចក្រ៣ ដែលផ្អាកដំណើរការដោយសារថៃឈ្លានពាន និងការបិទច្រកព្រំដែនដែលបង្កជាផលប៉ះពាល់ដល់ខ្សែសង្វាក់ផលិតកម្ម និងការនាំចេញនាំចូល។
លោក សំ សឿន ប្រធានសហភាពពលកម្មជាតិកម្ពុជា បានលើកឡើងថា លោកសោកស្តាយចំពោះព័ត៌មានថារោងចក្រត្រូវបិទទ្វារ ដោយសារការឈ្លានពានរបស់ថៃ។
លោកបន្តថា ក្រោមការយកចិត្តទុកដាក់ពីគ្រប់ភាគីពាក់ព័ន្ធ ពិសេសគឺការអន្តរាគមន៍ពីប្រមុខរាជរដ្ឋាភិបាល និងក្រសួងការងារ និងបណ្ដុះបណ្ដាលវិជ្ជាជីវៈ នឹងអាចជួយស្វែងរកដំណោះស្រាយសមស្រប ដើម្បីជួយបងប្អូនកម្មករឱ្យបានទាន់ពេលវេលា និងទទួលបានអត្ថប្រយោជន៍តាមច្បាប់ស្ដីពីការងារ។
លោក សំ សឿន បានបញ្ជាក់៖ «ខ្ញុំគាំទ្រវិធានការក្រសួងបានធានារាល់ការទូទាត់អត្ថប្រយោជន៍ផ្សេងៗជូនដល់បងប្អូនកម្មករនិយោជិតទាំងអស់បានត្រឹមត្រូវ និងគ្រប់ចំនួនទៅតាមច្បាប់ស្តីពីការងារនៅកម្ពុជា ដោយមិនបណ្តោយឱ្យមានការកេងប្រវ័ញ្ច ឬបាត់បង់ប្រាក់អត្ថប្រយោជន៍ណាមួយឡើយ»។
ទន្ទឹមនឹងការលើកឡើងនេះដែរ លោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករ ក៏បានមានប្រសាសន៍សង្កត់ធ្ងន់ផងដែរថា លោកក៏សោកស្តាយចំពោះបងប្អូនកម្មករនិយោជិត ដែលធ្លាប់បានបម្រើការងារនៅទីនោះ។ លោកបានសង្កេតឃើញក្រុមការងារជំនាញរបស់ក្រសួងការងារ និងបណ្ដុះបណ្ដាលវិជ្ជាជីវៈ បានយកចិត្តទុកដាក់ដោះស្រាយបញ្ហានេះបានទាន់ពេលវេលា។
លោកបានអំពាវនាវភាគីទាំងអស់បន្តសហការយ៉ាងជិតស្និទ្ធជាមួយអាជ្ញាធរមានសមត្ថកិច្ច និងមន្រ្តីជំនាញរបស់ក្រសួងការងារ និងបណ្ដុះបណ្ដាលវិជ្ជាជីវៈ ដើម្បីធានាថា រាល់ផលប្រយោជន៍ស្របច្បាប់របស់បងប្អូនកម្មករត្រូវបានការពារ និងឆ្លើយតបទៅតាមគោលការណ៍ច្បាប់ស្តីពីការងារយ៉ាងត្រឹមត្រូវ។
បើតាមក្រសួងការងារ និងបណ្ដុះបណ្ដាលវិជ្ជាជីវៈ តាមរយៈទីភ្នាក់ងារជាតិ និងមុខរបរ(NEA) គ្រោងចុះទៅដល់ទីតាំងផ្ទាល់ ដើម្បីចុះឈ្មោះបងប្អូនកម្មករនិយោជិតទាំងឡាយណា ដែលមានបំណងចង់ស្វែងរកឱកាសការងារថ្មី ដោយមន្រ្តីជំនាញនឹងផ្គូរផ្គងការងារយ៉ាងសកម្ម ដែលមានតម្រូវការកម្លាំងពលកម្មជាច្រើននាក់ ដែលនេះជាឱកាសល្អក្នុងការទទួលបានការងារថ្មីភ្លាមៗដោយមិនបាច់រង់ចាំយូរ។
បន្ថែមលើសពីនេះ សម្រាប់បងប្អូនកម្មរនិយោជិត ដែលចង់ផ្លាស់ប្តូរអាជីព ឬចង់បង្កើនសមត្ថភាពរបស់ខ្លួន ក្រសួងការងារក៏បានរៀបចំកម្មវិធីផ្តល់ការបណ្តុះបណ្តាលជំនាញថ្មីៗដោយមិនគិតថ្លៃ ដើម្បីជួយឱ្យបងប្អូនមានជំនាញ ហើយជួយពង្រឹងសេដ្ឋកិច្ចគ្រួសារឱ្យកាន់តែមានស្ថិរភាពយូរអង្វែងតទៅមុខទៀត៕
