(សៀមរាប)៖ ក្រុមការងារនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា កំពុងបន្តជួសជុលស្រះទឹកខាងលិចប្រាសាទនាគព័ន្ធ ក្នុងដំណាក់កាលទី២ ដើម្បីលើកតម្លៃស្រះនេះ ឱ្យមានសោភ័ណភាពឡើងវិញ។

លោក អ៉ិត ស្រេង បុគ្គលិកបច្ចេកទេសនៃអាជ្ញាធរជាតិអប្សរា បានឱ្យដឹងថា គម្រោងនេះបានចាប់ផ្តើមពីខែមិថុនាមក។ គម្រោងបន្តជួសជុលកាំជណ្តើរខាងជើង និងជណ្តើរខាងត្បូង ខណៈដែលដំណាក់កាលទី១ បានជួសជុលជណ្តើរខាងកើត នៃស្រះខាងលិចប្រាសាទនាគព័ន្ធ។

ចំពោះស្ថានភាពនៃការខូចខាត លោក អ៉ិត ស្រេង បានរៀបរាប់ថា គឺដោយសារកត្តាធម្មជាតិ និងកត្តាអាយុកាល។ ទឹកភ្លៀងជាមូលហេតុចម្បងដែលបានហូរច្រោះច្រាំងស្រះ ដែលបណ្តាលឱ្យថ្មស្រុត រលុះធ្លាក់ចូលទឹកស្រះ រហូតធ្វើឱ្យថ្មទាំងនោះពុកផុយ ដែលភាគច្រើនពិបាកយកមកជួសជុលប្រើប្រាស់ឡើងវិញ។

គិតត្រឹមពាក់កណ្តាលខែសីហា ឆ្នាំ២០២៦ គម្រោងជួសជុលនេះបានរៀបចំគ្រឹះកាំថ្មបាយក្រៀមបានចំនួន២កាំ និងបន្តរៀបថ្មភក់កាំទី៥ដែលជាថ្មភក់។ លោក អ៉ិត ស្រេង បានបញ្ជាក់ថា កាំជណ្តើរស្រះខាងលិចប្រាសាទនាគព័ន្ធ មានចំនួន៧កាំ គឺកាំគ្រឹះថ្មបាយក្រៀមចំនួន២ និង៥កាំទៀតជាថ្មភក់។

គួររំឭកដែរថា មុននឹងដំណើរការជួសជុលស្រះទឹកខាងលិចប្រាសាទនាគព័ន្ធ គឺក្រុមការងារនៃនាយកដ្ឋានអភិរក្សប្រាសាទ និងបុរាណវិទ្យា ត្រូវការដឹកជញ្ជូនថ្មពីច្រាំងបារាយណ៍ជយតដាក ឬបារាយណ៍នាគព័ន្ធ។ ក្រុមការងារបានប្រើទូកជាមធ្យោបាយដឹកថ្ម១ដុំៗដោយមានការលំបាក និងត្រូវការបច្ចេកទេសខ្ពស់៕