(សៀមរាប)៖ ក្រសួងទេសចរណ៍ សហការជាមួយរដ្ឋបាលខេត្តសៀមរាប នៅថ្ងៃទី១៧ ខែសីហា ឆ្នាំ២០២៦ បានរៀបចំសិក្ខាសាលាផ្សព្វផ្សាយ ស្តីពីកម្មវិធីសមមូលអប់រំកម្រិតមូលដ្ឋាន (BEEP) ក្នុងវិស័យទេសចរណ៍ ក្រោមវត្តមានរបស់លោក ប៉ាក់ សុខុម រដ្ឋលេខាធិការក្រសួងទេសចរណ៍ និងលោក ឌី រ៉ាដូ អភិបាលរងខេត្តសៀមរាប, លោកស្រី ផង់ ពុទ្ធី នាយិកាវិទ្យាស្ថានពហុបច្ចេកទេសតេជោសែនសៀមរាប ព្រមទាំងភាគីពាក់ព័ន្ធផងដែរ។

កម្មវិធីសមមូលអប់រំកម្រិតមូលដ្ឋាន (BEEP) នេះ ជាយន្តការដ៏មានប្រយោជន៍មួយ ដែលអាចជួយផ្តល់ឱកាសដល់អ្នកដែលមានការអប់រំមិនទាន់បានគ្រប់គ្រាន់ ឱ្យពួកគាត់អាចបន្តសិក្សា បង្កើនចំណេះដឹង និងអភិវឌ្ឍន៍ជំនាញរបស់ខ្លួន ដើម្បីឆ្លើយតបទៅនឹងតម្រូវការនៃទីផ្សារការងារ ជាពិសេសក្នុងវិស័យទេសចរណ៍។

ថ្លែងក្នុងឱកាសនោះ លោក ប៉ាក់ សុខុម បានលើកឡើងថា សិក្ខាសាលានេះ រៀបចំឡើងក្នុងគោលបំណងដើម្បីផ្សព្វផ្សាយ និងណែនាំអំពីកម្មវិធី BEEP ជូនដល់ភាគីពាក់ព័ន្ធក្នុងវិស័យទេសចរណ៍ ដោយផ្តោតលើលក្ខខណ្ឌនៃការចូលរួម របៀបសិក្សា ការទទួលស្គាល់ និងការទទួលបានវិញ្ញាបនបត្រ ព្រមទាំងផ្លូវបន្តការសិក្សា និងការអភិវឌ្ឍអាជីព។

លោកបានបន្តថា ការបង្ហាញពីរបៀបដែលកម្មវិធីអាចផ្តល់ឱកាសដល់អ្នកជំនាញ និងបុគ្គលិកក្នុងវិស័យទេសចរណ៍ ដែលមិនទាន់បានបញ្ចប់ការអប់រំកម្រិតមធ្យមសិក្សាបឋមភូមិ ឬការអប់រំមូលដ្ឋាន ឱ្យអាចបន្តការសិក្សា និងអភិវឌ្ឍសមត្ថភាពរបស់ខ្លួនបាន ខណៈពេលដែលពួកគាត់នៅតែបន្តបំពេញការងារ។

លោកបន្ថែមថា សិក្ខាសាលានេះ មិនត្រឹមតែជាវេទិកាសម្រាប់ផ្សព្វផ្សាយព័ត៌មានប៉ុណ្ណោះទេ ប៉ុន្តែជាវេទិកាដ៏សំខាន់មួយ សម្រាប់ពង្រឹងកិច្ចសហការរវាងស្ថាប័នពាក់ព័ន្ធ និងបង្កើតឱកាសសិក្សា ដែលមានភាពបត់បែន សមស្របនឹងតម្រូវការរបស់អ្នកប្រកបការងារ។

លោក ប៉ាក់ សុខុម បានបញ្ជាក់ថា តាមរយៈកម្មវិធីនេះ យើងអាចរួមគ្នាចូលរួមក្នុងការកសាងកម្លាំង ពលកម្មទេសចរណ៍ដែលមានចំណេះដឹង ជំនាញ សមត្ថភាព និងគុណវុឌ្ឍិ ស្របតាមតម្រូវការទីផ្សារការងារ និងការអភិវឌ្ឍវិស័យទេសចរណ៍ប្រកបដោយចីរភាព។

លោក ឌី រ៉ាដូ បានលើកឡើងថា កម្មវិធីសមមូលអប់រំកម្រិតមូលដ្ឋាន សម្រាប់ខេត្តសៀមរាបការអនុវត្តកម្មវិធីនេះ មានសារៈសំខាន់យ៉ាងខ្លាំង ជាពិសេសវិស័យទេសចរណ៍ ដែលកំពុងត្រូវការធនធានមនុស្សដែលមានទាំងចំណេះដឹង ជំនាញវិជ្ជាជីវៈ សីលធម៌ សេវាកម្មល្អ ភាសាបរទេស និងសមត្ថភាពក្នុងការសម្របខ្លួនទៅនឹងការវិវត្តថ្មីៗ នៃវិស័យទេសចរណ៍។

លោកក៏បានស្នើឱ្យមានការយកចិត្តទុកដាក់ ផ្សារភ្ជាប់ការអប់រំជាមួយនឹងការអនុវត្តជាក់ស្ដែងនៅកន្លែងការងារ ដើម្បីធានាថាអ្នកសិក្សាអាចយកចំណេះដឹង និងជំនាញដែលទទួលបានទៅប្រើប្រាស់ប្រកបដោយប្រសិទ្ធភាព និងអាចបង្កើនឱកាសការងារ និងប្រាក់ចំណូលរបស់ខ្លួន។

លោកស្រី ផង់ ពុទ្ធី បានឲ្យដឹងថា កន្លងមកវិទ្យាស្ថានបានខិតខំប្រឹងប្រែងលើការបណ្តុះបណ្តាលបច្ចេកទេស និងវិជ្ជាជីវៈ (TVET) ដល់យុវជនក្រីក្រ ងាយរងគ្រោះ ដើម្បីទទួលបានចំណេះ ជំនាញពិតប្រាកដ សំដៅលើកកម្ពស់ជីវភាពគ្រួសារ និងសង្គមជាតិ ស្របតាមទស្សនាទាន «TVET រៀនឱ្យចេះ ឱ្យចប់ មានការងារធ្វើ និងមានចំណូល»។

ជាមួយនេះ លោកស្រីបញ្ជាក់ថា វិទ្យាស្ថានបានបណ្តុះបណ្តាលអ្នកជំនាញទេសចរណ៍ជាច្រើនវគ្គ រួមមាន៖ គេហកិច្ច សេវាកម្មម្ហូបអាហារ និងភេសជ្ជៈ និងជំនាញចុងភៅ ដោយគ្រូបង្រៀនជំនាញ ហើយពួកគាត់ក៏បានចូលរួមក្នុងវគ្គបណ្តុះបណ្តាលគ្រូបង្គោល និងអ្នកវាយតម្លៃបង្គោលជាតិផងដែរ៕