(ភ្នំពេញ)៖ ដើម្បីចូលរួមជាមួយរដ្ឋបាលរាជធានីភ្នំពេញ ធ្វើការកែលម្អ និងប្រែក្លាយទីតាំងដី មួយកន្លែង ស្ថិតនៅភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ឱ្យទៅជាសួនដើមឈើ នៅព្រឹកថ្ងៃទី១៨ ខែសីហា ឆ្នាំ២០២៦ លោក ញ៉ែម តារារិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ រាជធានីភ្នំពេញ បានដឹកនាំមន្ត្រីខណ្ឌរដ្ឋបាលព្រៃឈើភ្នំពេញ និងសហការី ចុះដាំដើមឈើនៅទីតាំងដីនេះ សម្រាប់ឱ្យប្រជាពលរដ្ឋបានមកហាត់ប្រាណ និងដើរលំហែរកម្សាន្ត។

លោក ញ៉ែម តារារិទ្ឋ ប្រធានមន្ទីរ បានបានឲ្យដឹងថា តបតាមប្រសាសន៍ណែនាំរបស់លោក ឃួង ស្រេង អភិបាលរាជធានីភ្នំពេញ លោកបានដឹកនាំក្រុមការងារ ដាំដើមឈើសាគូរ៉ា ក្នុងថ្ងៃនេះ ក្នុងជំហានដំបូង យើងបានប្រមាណជិត៤០ដើម និងបន្តអនុវត្តការងារដាំដើមឈើបន្តទៀត ឱ្យបានរួចរាល់ក្នុងរយៈពេល១សប្ដាហ៍ខាងមុខ។

ក្នុងគម្រោងដាំដើមឈើ ៤ប្រភេទ សរុបចំនួន ២៩៣ដើម ក្នុងនោះ ដើមសាគូរ៉ា ៧៤ដើម ដើមធ្នង់ឈាមមាន់ ៨៧ដើម ដើមគ្រាប់បែក ៦៦ដើម និងដើមរាំងទឹក ៦៦ដើម បន្ថែមពីលើដើមឈើមានស្រាប់នៅក្នុងបរិវេណដី ៤១ប្រភេទ សរុបចំនួន ៦៩២ដើម ដែលលប់ទៅដោយប្រភេទដើមគ្រាប់បែក សាគូរ៉ា ធ្នង់ អាកាស្យា ចាន់គិរី ឈើទាល។

គួរបញ្ជាក់ថា រដ្ឋបាលរាជធានីភ្នំពេញ ទទួលបានសួនដើមឈើខាងលើ ពីលោកស្រី មិឈិកូ កាន់ហ្សាគិ (MICHIKO KANSAKI) ភរិយារបស់លោក កូជិ កាន់ហ្សាគិ (KOJI KANZAKI) ជនជាតិជប៉ុន តាមរយៈការចុះហត្ថលេខាលើកិច្ចព្រមព្រៀងប្រគល់ជូន ដោយលោកស្រី មិឈិកូ កាន់ហ្សាគិ (MICHIKO KANSAKI) និងរដ្ឋបាលរាជធានីភ្នំពេញ កាលពីថ្ងៃទី៣១ ខែឧសភា ឆ្នាំ២០២២។

លោក កូជិ កាន់ហ្សាគិ (KOII KANZAKI) ជាស្វាមីរបស់លោកស្រី មិឈិកូ កាន់ហ្សាគិ (MICHIKO KANSAKI) គាត់ស្រឡាញ់ប្រទេសកម្ពុជា ហើយក៏ស្រឡាញធម្មជាតិដែរ៕