(ភ្នំពេញ)៖ លោក លីវ សុផាណារិទ្ធិ រដ្ឋលេខាធិការក្រសួងប្រៃសណីយ៍ និងទូរគមនាគមន៍ (ក.ប.ទ.) នៅល្ងាចថ្ងៃទី១៦ ខែសីហា ឆ្នាំ២០២៦ បានអញ្ជើញជាអធិបតីក្នុងពិធីបិទ និងប្រគល់ពានរង្វាន់ក្រុមឆ្នើមចំនួន ៣ក្រុម ក្នុងការប្រកួតប្រជែងថ្នាក់ជាតិផ្នែកសន្តិសុខសាយប័រប្រចាំឆ្នាំ ២០២៦ (Cambodia National Cybersecurity Competition 2026) ដែលមានការចូលរួមដោយថ្នាក់ដឹកនាំ ក.ប.ទ. ក្រុមហ៊ុនជាដៃគូសហការ និងបេក្ខភាពប្រកួតសរុបប្រមាណ ១២០នាក់ នៅសណ្ឋាគារ Oakwood Premier Phnom Penh។

កម្មវិធីប្រកួតប្រជែងនេះ រៀបចំឡើងដោយ ក្រសួងប្រៃសណីយ៍និងទូរគមនាគមន៍ (ក.ប.ទ.) និងមូលនិធិ ស.អ. មានរយៈពេល ២ថ្ងៃ ចាប់ពីថ្ងៃទី១៥ ដល់ថ្ងៃទី១៦ ខែសីហា ឆ្នាំ២០២៦ ក្នុងគោលបំណងជ្រើសរើសក្រុមឆ្នើមតំណាងប្រទេសកម្ពុជា សម្រាប់ចូលរួមការប្រកួតថ្នាក់តំបន់ ដែលមានការចូលរួមប្រកួតពីបេក្ខភាពសរុបចំនួន ១៥៧ក្រុម ស្មើនឹង ៥៤៧នាក់ មកពីក្រសួងស្ថាប័នរដ្ឋ ស្ថាប័នឯកជននិងគ្រឹះស្ថានអប់រំ ។

ជាមួយគ្នានេះ ឯកឧត្តមរដ្ឋលេខាធិការ បានអបអរសាទរ និងប្រគល់ពានរង្វាន់ដល់បេក្ខជនជ័យលាភីចំនួន ៣ក្រុម នៅដំណាក់កាលផ្តាច់ព្រ័ត្រនេះ ក្នុងចំណោមបេក្ខភាពទាំង ៣៤ក្រុមក្រោយពីត្រូវបានជម្រុះ ដែលបានចូលរួមក្នុងការប្រកួត និងទទួលបានមេដាយ ព្រមទាំងរង្វាន់លើកទឹកចិត្ត ដូចខាងក្រោម៖
- ក្រុមជ័យលាភីលេខ ១ នឹងទទួលបានប្រាក់រង្វាន់ចំនួន ២.០០០ (ពីរពាន់) ដុល្លារអាម៉េរិកគត់
- ក្រុមជ័យលាភីលេខ ២ នឹងទទួលបានប្រាក់រង្វាន់ចំនួន ១.០០០ (មួយពាន់) ដុល្លារអាម៉េរិកគត់
- ក្រុមជ័យលាភីលេខ ៣ នឹងទទួលបានប្រាក់រង្វាន់ចំនួន ៥០០ (ប្រាំរយ) ដុល្លារអាម៉េរិកគត់

បន្ថែមពីលើនេះ ឯកឧត្តមរដ្ឋលេខាធិការ បានប្រកាសក្រុមឆ្នើម ២ក្រុម បន្ថែមពីលើក្រុមជ័យលាភីទាំង៣ ខាងលើ ដើម្បីទទួលបានការបណ្ដុះបណ្ដាល និងពង្រឹងជំនាញបច្ចេកទេសផ្នែកសន្តិសុខសាយប័រពីគ្រូបង្គោលរយៈពេល ១០សប្ដាហ៍ សម្រាប់ត្រៀមខ្លួនក្នុងការប្រកួតបន្តទៀត។

ការប្រកួតប្រជែងនេះប្រព្រឹត្តទៅដោយមានការគាំទ្រពីក្រសួងប្រៃសណីយ៍និងទូរគមនាគមន៍ (ក.ប.ទ.) ក្រោមមូលនិធិ ស.អ. និងសហការឧបត្ថម្ភដោយក្រុមហ៊ុន Viettel (Cambodia) PTE. LTD, F5 Network, BYTEDC Solutions Co.,Ltd, Grab, ធនាគារ ឈីហ្វ, POSITRON MULTIVERSE Co.,Ltd, Veilron Technologies និង CHAMPION GROUP ព្រមទាំងដៃគូទីតាំង Oakwood Premier Phnom Penh។

លោករដ្ឋលេខាធិការ ក៏បានបន្ថែមថា កម្មវិធីប្រកួតថ្នាក់ជាតិសន្តិសុខសាយប័រប្រចាំឆ្នាំ ២០២៦ នេះ បានបង្ហាញពីការចូលរួមយ៉ាងសកម្មរបស់ ក.ប.ទ. ក្នុងការលើកកម្ពស់មូលធនឌីជីថល ជាពិសេសអ្នកជំនាញសន្តិសុខសាយប័រ និងការប្រកួតប្រជែងក្នុងវិស័យសន្តិសុខសាយប័រនៅប្រទេសកម្ពុជានិងក្នុងតំបន់៕