(សៀមរាប)៖ នាថ្ងៃទី១៨ ខែសីហា ឆ្នាំ២០២៦ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ព្រមទាំងថ្នាក់ដឹកនាំក្រសួង មន្ដ្រីបច្ចេកទេស និងមន្ទីរអភិវឌ្ឍន៍ជនបទខេត្តសៀមរាប បានអញ្ជើញចុះពិនិត្យជាក់ស្ដែងស្ថានភាពផ្លូវចំនួន ៣ខ្សែ ស្ថិតនៅក្នុងខេត្តសៀមរាប រួមមាន៖

ខ្សែទី១៖ ឈ្មោះផ្លូវ ថ្នល់ដាច់-កំពង់ឃ្លាំង ជាផ្លូវល្បាយក្រួស មានប្រវែង ១១គ.ម. តភ្ជាប់ពីភូមិថ្នល់ដាច់ ឃុំដានរុន ទៅដល់ភូមិអូរតាពុត ឃុំកំពង់ឃ្លាំង ស្រុកសូទ្រនិគម។ ផ្លូវនេះ មានអ្នកទទួលផលសរុបចំនួន ២ ៦៩៨គ្រួសារ ស្មើនឹង ១១ ៤០៧នាក់។

ខ្សែទី២៖ ឈ្មោះផ្លូវ ផ្សារជ្រាវ-ភូមិវាល ជាផ្លូវល្បាយក្រួស មាន ២កំណាត់ ប្រវែងសរុប ៥.១៥គ.ម តភ្ជាប់ពីភូមិជ្រាវ ទៅដល់បឹងពារាំងក្នុងភូមិវាល សង្កាត់ជ្រាវ ក្រុងសៀមរាប ក្នុងនោះ
-កំណាត់ទី១ ឈ្មោះផ្លូវ ផ្សារជ្រាវ-មជ្ឈមណ្ឌលវប្បធម៌ ស្ថិតក្នុងភូមិជ្រាវ សង្កាត់ជ្រាវ ក្រុងសៀមរាប មានប្រវែង ៣,៦៥គ.ម.។
-កំណាត់ទី២ ចេញផ្លូវពីភូមិជ្រាវ ទៅដល់ភូមិវាល សង្កាត់ជ្រាវ ក្រុងសៀមរាប មានប្រវែង ១,៥គ.ម.។

ខ្សែទី៣៖ ឈ្មោះផ្លូវ ភូមិប្រឡាយ-បឹងពារាំង បំបែកចេញពីផ្លូវបេតុងតាវ៉ឺន ស្ថិតក្នុងភូមិប្រឡាយ និងភូមិវាល សង្កាត់ជ្រាវ ក្រុងសៀមរាប មានប្រវែង ៨គ.ម. ។

សូមបញ្ជាក់ដែរថា ខ្សែផ្លូវទី២ និងខ្សែទី៣ ខាងលើនេះ មានអ្នកទទួលផលសរុបចំនួន ៣ ៣៩១គ្រួសារ ស្មើនឹង ១៣ ០៣៧នាក់។ គួរជម្រាបជូនថា ការអញ្ជើញចុះពិនិត្យស្ថានភាពផ្លូវទាំង៣ខ្សែនេះ ក្នុងគោលបំណងដើម្បីពិនិត្យស្ថានភាពជាក់ស្តែង និងធ្វេីសិក្សាលទ្ធភាពក្នុងការជួសជុលជូនប្រជាពលរដ្ឋក្នុងតំបន់នោះប្រេីប្រាស់ ព្រមទាំងជួយក្នុងការលើកកំពស់សក្ដានុពលទេសចរណ៍ ក្នុងតំបន់នោះផងដែរ៕