(ភ្នំពេញ)៖ ដោយសម្លឹងឃើញយ៉ាងច្បាស់អំពីសុវត្ថិភាព និងភាពសុខសាន្តរបស់បងប្អូនប្រជាពលរដ្ឋជាចម្បង លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន តែងតែយកចិត្តទុកដាក់ និងដាក់ចេញនូវការណែនាំយ៉ាងម៉ឺងម៉ាត់ ក្នុងការលើកកម្ពស់សុវត្ថិភាពចរាចរណ៍នៅតាមដងផ្លូវ។

ស្ថិតក្រោមការដឹកនាំ និងការចង្អុលបង្ហាញផ្ទាល់របស់លោករដ្ឋមន្ត្រី ក្រសួងសាធារណការ និងដឹកជញ្ជូន បានសហការយ៉ាងជិតស្និទ្ធជាមួយទីភ្នាក់ងារ JICA ក្នុងការបំពាក់បន្ថែមនូវបណ្តុំបរិក្ខារសុវត្ថិភាពចរាចរណ៍ដែលមានប្រសិទ្ធភាពខ្ពស់។ ក្រុមការងារបច្ចេកទេសបាននិងកំពុងអនុវត្តការងារដំឡើងផ្ទាំងការពារពន្លឺចាំង (Anti-glare) ចំនួន ១៥,៤៥០ ផ្ទាំង និងឧបករណ៍ចំណាំងផ្លាតលើរបាំង (Delineator) ចំនួន ៥៩,២៨៧ គ្រាប់។

ក្រៅពីនេះ ក៏មានការដំឡើងប្រព័ន្ធភ្លើងសញ្ញាចរាចរណ៍ និងបង្គោលចំនួន ២៤កន្លែង ផ្លាកសញ្ញាចរាចរណ៍លើគ្រោងដែកផ្តេកចំនួន ១០កន្លែង ផ្លាកសញ្ញាចរាចរណ៍បន្ថែមសម្រាប់ភ្លើងសញ្ញាចំនួន ២១៧ ផ្លាក ប្រព័ន្ធភ្លើងបំភ្លឺផ្លូវសាធារណៈ និងការគូសសញ្ញាចរាចរណ៍លើទ្រូងផ្លូវផងដែរ។

កិច្ចខិតខំប្រឹងប្រែងទាំងនេះ គឺដើម្បីអភិវឌ្ឍ និងកែលម្អហេដ្ឋារចនាសម្ព័ន្ធផ្លូវថ្នល់ឱ្យកាន់តែមានសុវត្ថិភាព ទាំងការបើកបរពេលថ្ងៃ និងពេលយប់។ ក្រសួងសាធារណការ និងដឹកជញ្ជូន សូមអំពាវនាវយ៉ាងទទូចដល់បងប្អូនប្រជាពលរដ្ឋ និងអ្នកបើកបរទាំងអស់ ត្រូវចូលរួមគោរពច្បាប់ចរាចរណ៍ ផ្លាក គំនូសសញ្ញាចរាចរណ៍ និងមានការយោគយល់អធ្យាស្រ័យឱ្យគ្នាទៅវិញទៅមក ដើម្បីធានាសុវត្ថិភាព កាត់បន្ថយគ្រោះថ្នាក់ និងធ្វើដំណើរប្រកបដោយស្នាមញញឹម និងភាពកក់ក្តៅ។ សុវត្ថិភាពនៃការធ្វើដំណើរពិតជាផ្ដើមចេញពីយើងទាំងអស់គ្នា៕