(កំពង់ស្ពឺ)៖ មន្ទីរបរិស្ថានខេត្តកំពង់ស្ពឺ សូមធ្វើការបដិសេធយ៉ាងដាច់អហង្ការចំពោះការចុះផ្សាយតាមបណ្តាញសង្គមឈ្មោះ PhanPhana ដែលបានលើកឡើងថា «សាលាដូងនឹងត្រូវរុះរើក្នុងរយៈពេល ១៤ថ្ងៃ»។ មន្ទីរបរិស្ថានសូមបំភ្លឺជូនសាធារណជនជ្រាបថា ព័ត៌មាននេះមិនមែនជាការពិតឡើយ ហើយទីតាំងសាលាដូង មិនស្ថិតក្នុងសេចក្តីប្រកាសជូនដំណឹងឱ្យរុះរើនោះទេ។

តាមរយៈលិខិតបំភ្លឺមន្ទីរបរិស្ថាន បានឱ្យដឹងថា កាលពីថ្ងៃទី១៣ ខែសីហា ឆ្នាំ២០២៦ ការិយាល័យឧទ្យានជាតិគិរីរម្យ បានចេញសេចក្តីប្រកាសជូនដំណឹងជាសាធារណៈដល់ម្ចាស់ទីតាំងដែលបានលួចចូលទន្ទ្រានបោះបង្គោលហ៊ុំព័ទ្ធដីសាធារណៈរបស់រដ្ឋ និងសង់សំណង់អនាធិបតេយ្យបំណងយកដីធ្វើជាកម្មសិទ្ធិ នៅចំណុចជើងភ្នំអាប៉ែត ក្នុងឧទ្យានជាតិព្រះសុរាម្រិត-កុសមៈ «គិរីរម្យ» ស្ថិតក្នុងភូមិសាស្ត្រឃុំចំបក់ ស្រុកភ្នំស្រួច ខេត្តកំពង់ស្ពឺ ដែលផ្ទុយទៅនឹងក្រមបរិស្ថាន និងធនធានធម្មជាតិ។

ចំពោះវិធានការខាងលើនេះមានគោលបំណងធានាឱ្យការគ្រប់គ្រង និងថែរក្សាឧទ្យានជាតិព្រះសុរាម្រិត-កុសមៈ «គិរីរម្យ» ប្រកបដោយប្រសិទ្ធិភាព រក្សាឱ្យបាននូវធនធានធម្មជាតិ ជីវៈចម្រុះ និងសណ្តាប់ធ្នាប់សាធារណៈ ដែលស្របតាមក្រមបរិស្ថាន និងធនធានធម្មជាតិ។

អាស្រ័យហេតុនេះ សូមសាធារណជនមេត្តាជ្រាបជាព័ត៌មាន និងធ្វើការចែកចាយព័ត៌មានដោយមានការទទួលខុសត្រូវ ព្រមទាំងត្រូវធ្វើការចែកចាយព័ត៌មានណាដែលពិតប្រាកដ និងមានប្រភពច្បាស់លាស់៕