(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី១៨ ខែសីហា ឆ្នាំ២០២៦ បានអនុញ្ញាតឱ្យលោកស្រី ណេង ស៊ីណាត ស្ថាបនិកក្រុមហ៊ុន Compass Advertising Co., Ltd. និងសហការី ចូលជួបសម្តែងការគួរសម និងពិភាក្សាការងារ ដើម្បីពង្រឹងកិច្ចសហការលើការធ្វើទីផ្សារ ការផ្សព្វផ្សាយ និងការរៀបចំព្រឹត្តិការណ៍ទេសចរណ៍ជាតិ និងអន្តរជាតិនៅកម្ពុជា។

ក្នុងជំនួបនេះ លោកស្រី ណេង ស៊ីណាត បានបង្ហាញពីបំណងពង្រឹងកិច្ចសហការជាមួយក្រសួងទេសចរណ៍ និង CTB ក្នុងការផ្សព្វផ្សាយគោលដៅទេសចរណ៍កម្ពុជា និងចូលរួមបង្កើតតម្លៃបន្ថែមដល់ព្រឹត្តិការណ៍ទេសចរណ៍នានា។

ជាការឆ្លើយតប លោក ហួត ហាក់ បានកោតសរសើរចំពោះសមិទ្ធផលរបស់ Compass Advertising ដែលបានចូលរួមរៀបចំព្រឹត្តិការណ៍ជាតិ និងអន្តរជាតិជាច្រើននៅកម្ពុជា ដូចជា ការអញ្ជើញតារាប្រដាល់ពិភពលោក Manny Pacquiao ព្រឹត្តិការណ៍ Gumball 3000 និងមហាសន្និបាត JCI តំបន់អាស៊ី-ប៉ាស៊ីហ្វិក។

លោករដ្ឋមន្ត្រី បានលើកទឹកចិត្តឱ្យក្រុមហ៊ុនបន្តសហការជាមួយក្រសួង និង CTB ក្នុងការទាក់ទាញសិល្បករ តារាចម្រៀង និងព្រឹត្តិការណ៍អន្តរជាតិល្បីៗមកកម្ពុជា ព្រមទាំងជំរុញការផ្សព្វផ្សាយសក្តានុពលទេសចរណ៍កម្ពុជានៅទីផ្សារបរទេស ជាពិសេសសិង្ហបុរី ម៉ាឡេស៊ី និងវៀតណាម។

ជាមួយគ្នានេះ លោក ហួត ហាក់ បានស្នើឱ្យក្រុមហ៊ុនសិក្សាលទ្ធភាពចូលរួមរៀបចំពិធីបុណ្យសមុទ្រឆ្នាំ២០២៦ នៅខេត្តព្រះសីហនុ ឱ្យកាន់តែមានភាពច្នៃប្រឌិត ទាក់ទាញ និងបង្កើតតម្លៃបន្ថែមដល់សេដ្ឋកិច្ចមូលដ្ឋាន ព្រមទាំងគាំទ្រយុទ្ធនាការ «ទស្សនាកម្ពុជានៅរដូវកាលបៃតង» និងការលើកកម្ពស់ Soft Power តាមរយៈទេសចរណ៍ភាពយន្ត ម្ហូបអាហារ កីឡា តន្ត្រី និងព្រឹត្តិការណ៍ទេសចរណ៍នានា។

ជំនួបនេះ បានបង្ហាញពីការបន្តពង្រឹងកិច្ចសហការរវាងរដ្ឋ និងវិស័យឯកជន ដើម្បីប្រើប្រាស់ការធ្វើទីផ្សារ និងព្រឹត្តិការណ៍អន្តរជាតិ ជាចលករទាក់ទាញភ្ញៀវទេសចរ និងលើកកម្ពស់កម្ពុជា ជាគោលដៅទេសចរណ៍ដែលមានភាពទាក់ទាញ និងប្រកួតប្រជែងនៅលើឆាកអន្តរជាតិ៕