(បន្ទាយមានជ័យ)៖ ឃុំគោកបល្ល័ង្គ ស្រុកមង្គលបូរី ខេត្តបន្ទាយមានជ័យ ដែលជាឃុំមួយស្ថិតនៅដាច់ស្រយាលពីទីប្រជុំខេត្ត និងជាប់នឹងតំបន់បឹងទន្លេសាប កំពុងតែប្រែមុខមាត់ថ្មី តាមរយៈការបំពាក់ភ្លើងបំភ្លឺសូឡាចំនួន ៣១៥ បង្គោល។

ការបំពាក់ភ្លើងនេះបានធ្វើឱ្យផ្លូវនានានៅពេលរាត្រីមានពន្លឺភ្លឺច្បាស់ និងមានសោភ័ណភាពគួរជាទីគយគន់។

លោក ម៉ៅ សំអុន មេឃុំគោកបល្ល័ង្គ បានឱ្យដឹងថា ភ្លើងសូឡាទាំងនេះ គឺជាអំណោយឧបត្ថម្ភពីលោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកមង្គលបូរី។

អាជ្ញាធរឃុំបានចាត់ចែងដាំបង្គោលភ្លើងសូឡាទាំងនេះតាមបណ្តោយផ្លូវមេ និងផ្លូវបំបែកតូចៗទូទាំង ៨ ភូមិ។

ដើម្បីធានាបាននូវសោភ័ណភាព និងរបៀបរៀបរយ លោកមេឃុំបានប្រគល់ភារកិច្ចនេះទៅឱ្យលោកមេភូមិទាំង ៨ សហការជាមួយក្រុមយុវជន ដោយមានការសម្របសម្រួលពីក្រុមការងារឃុំ ឱ្យដាំបង្គោលភ្លើងឱ្យត្រង់ជួរ និងមិនប៉ះពាល់ដល់លំនៅឋានប្រជាពលរដ្ឋ។

ជំហានដំបូងនៃការដំឡើងភ្លើងសូឡានេះ គឺបានដាក់តាមបណ្តោយផ្លូវលេខ ៥៦C ដែលជាផ្លូវមេតភ្ជាប់ពីផ្លូវជាតិលេខ ៥ ត្រង់ចំណុចផ្សារអូរស្ងួត។

លោិ តាន់ ផាន់ណារ៉ា ក៏បានសន្យាថានឹងផ្តល់ភ្លើងសូឡាបន្ថែមទៀត ដើម្បីបំពាក់ឱ្យបានគ្រប់ផ្លូវទូទាំង ៨ ភូមិ នៃឃុំគោកបល្ល័ង្គ ធ្វើយ៉ាងណាឱ្យឃុំទាំងមូលភ្លឺបំព្រងនៅពេលយប់។

ក្រៅពីការផ្តល់ភ្លើងសូឡា លោក តាន់ ផាន់ណារ៉ា ក៏បានផ្តល់ថវិកាជួសជុលផ្លូវក្នុងភូមិ និងផ្តល់សម្ភារៈដល់ប្រជាពលរដ្ឋដែលជួបការលំបាកក្នុងមូលដ្ឋានផងដែរ។

ប្រជាពលរដ្ឋក្នុងឃុំគោកបល្ល័ង្គបានសម្តែងក្តីសប្បាយរីករាយយ៉ាងខ្លាំងចំពោះសមិទ្ធផលថ្មីនេះ ដែលបានរួមចំណែកបំភ្លឺផ្លូវ ធ្វើឱ្យឃុំមានសោភ័ណភាព និងបង្កើនសុវត្ថិភាពក្នុងការធ្វើដំណើរនៅពេលរាត្រី។