(ភ្នំពេញ)៖ ប្រធាននាយកដ្ឋានសហប្រតិបត្តិការវប្បធម៌អន្តរជាតិ និងកិច្ចការអាស៊ាន កញ្ញា សួស លីដា បានលើកឡើងថា ការធ្វើជំរឿនមិនមែនជាការដាក់សម្ពាធមន្ត្រីទេ ប៉ុន្តែជាការលើកកម្ពស់គុណតម្លៃរបស់មន្ត្រី ដោយជួយមន្ត្រីឲ្យធ្វើការចំមុខជំនាញវិជ្ជាជីវៈរបស់ខ្លួន។

កញ្ញាបានលើកឡើងបែបនេះ ក្នុងឱកាសចូលរួមក្នុងការចុះធ្វើជំរឿនមន្រ្តីជាក់ស្តែង នៅតាមរចនាសម្ពន្ធ័ របស់ក្រសួងវប្បធម៌ និងវិចិត្រសិល្បៈ នៅថ្ងៃទី១៩ ខែសីហា ឆ្នាំ២០២៦ នៅទីស្តីការក្រសួងវប្បធម៌ និងវិចិត្រសិល្បៈ។

បើតាមកញ្ញា សួស លីដា ការធ្វើជំរឿនមិនយូរនោះទេ គឺត្រឹម ៥នាទីប៉ុណ្ណោះ ហើយនៅពេលធ្វើជំរឿនរួច មន្ត្រីអាចទៅធ្វើការងារតាមមុខងាររៀងៗខ្លួនបានវិញផងដែរ។ ការធ្វើជំរឿន មានភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរ (ច្បាប់ដើម) ហើយក្នុងករណីមិនមានអត្តសញ្ញាណប័ណ្ណសញ្ជាតិខ្មែរច្បាប់ដើម ត្រូវភ្ជាប់មកជាមួយនូវលិខិតឆ្លងដែន (ច្បាប់ដើម) ឬប័ណ្ណសម្គាល់ខ្លួនមន្ត្រីរាជការដែលមានសុពលភាព (ច្បាប់ដើម)។

សូមជម្រាបថា គណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធ នៃក្រសួងមុខងារសាធារណៈ និងក្រុមការងារជំរឿនរបស់ក្រសួងវប្បធម៌និងវិចិត្រសិល្បៈ ធ្វើជំរឿនជាក់ស្តែងនៅតាមរចនាសម្ព័ន្ធរបស់ក្រសួងវប្បធម៌និង វិចិត្រសិល្បៈ ដែលប្រព្រឹត្តទៅរយៈពេល ២ថ្ងៃ គឺនៅថ្ងៃទី១៩-២០ ខែសីហា ឆ្នាំ២០២៦។

យុទ្ធនាការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមក្រសួង-ស្ថាប័ន ត្រូវបានដឹកនាំដោយ ក្រសួងមុខងារសាធារណៈ ក្នុងគោលបំណងប្រមូលទិន្នន័យមន្ត្រីរាជការស៊ីវិលឱ្យបានច្បាស់លាស់ រៀបចំប្រព័ន្ធទិន្នន័យឌីជីថល និងធានាប្រសិទ្ធភាពនៃការគ្រប់គ្រងធនធានមនុស្សក្នុងប្រព័ន្ធរដ្ឋ៕