(កណ្តាល)៖ ពលរដ្ឋជាង៣០នាក់ បានស្នើអភិបាលខេត្តកណ្ដាលលោក គួច ចំរើន មេត្តាពិនិត្យមើលករណីលោកឧកញ៉ា ថោង សារ៉ាត់ ដែលបានចាក់ដីរំលោភលើដីឡូត៍របស់ពួកគាត់ ដែលដីពួកគាត់បានទិញស្របច្បាប់ហើយ មានប្លង់រឹងត្រឹមត្រូវយូរមកហើយ ប៉ុន្តែខាងក្រុមហ៊ុនបែរជាថាប្លង់ដីក្លែងក្លាយទៅវិញ។

ពលរដ្ឋបានឲ្យដឹងថា ក្រោយដាក់បណ្តឹងទប់ស្កាត់នៅសាលាក្រុងតាខ្មៅហើយ នៅឡើយគ្មានលទ្ធផល ទើបពួកគាត់ជាង៣០នាក់ ប្រមូលផ្តុំគ្នាតវ៉ាការអភិវឌ្ឍរបស់ក្រុមហ៊ុនលើដីស្របច្បាប់របស់ខ្លួន។ ទីតាំងអភិវឌ្ឍដីឡូត៍នេះ ស្ថិតក្នុងសង្កាត់ស្វាយរលំ ក្រុងតាខ្មៅ។

ពលរដ្ឋបានអះអាងថា ពួកគាត់បានទិញដីឡូត៍ពីក្រុមហ៊ុន ថោង សារ៉ាត់ អភិវឌ្ឍន៍ អ៊ីមផត អ៊ិចផត តាំងពីអំឡុងឆ្នាំ២០០៨មកម្ល៉េះ ដោយមានលិខិតផ្ទេរប្រគល់សិទ្ធិកាន់កាប់ប្រើប្រាស់ដីធ្លី ចេញដោយក្រុមហ៊ុន ទទួលស្គាល់ ដោយមេធាវី និងអាជ្ញាធរភូមិ-ឃុំ ថែមទៀតផង ហើយពួកគាត់បានកាន់កាប់ សង់ផ្ទះនៅ ព្រមទាំងយកឯកសារទាំងនោះ ទៅដាក់បញ្ចាំនៅធនាគារ យកលុយមករកស៊ី រហូតបច្ចុប្បន្ន ពុំដែលមានបញ្ហាអ្វីនោះទេ។

ប៉ុន្តែថ្មីៗនេះ ស្រាប់តែក្រុមហ៊ុនបានដឹកដីចាក់រំលោភបំពាន ដើម្បីយកទៅលក់ឱ្យអតិថិជនថ្មី ដោយពុំបានជូនដំណឹងបន្តិចសោះឡើយ ហើយពេលសួរនាំតំណាងក្រុមហ៊ុន បែរជាអះអាងថា ឯកសារទិញលក់របស់ពួកគាត់ ក្លែងក្លាយទៅវិញ និងបង្ខំឱ្យទទួលយកសំណងប្រមាណ ៥០០ដុល្លារដើម្បីបញ្ចប់រឿង។

ពលរដ្ឋបន្តថា ដោយកើតទុក្ខមិនសុខចិត្ត ពលរដ្ឋក៏នាំគ្នាដាក់ពាក្យបណ្តឹងទប់ស្កាត់នៅសាលាក្រុងតាខ្មៅ តែគ្មានទទួលបានលទ្ធផល។ ក្រុមហ៊ុននៅតែបន្តចាក់ដី និងធ្វើរបងព័ទ្ធផ្ទះរបស់ពួកគាត់ ទើបនាំគ្នាប្រមូលផ្តុំស្នើសុំលោក គួច ចំរើន អភិបាលខេត្តកណ្តាល មេត្តាជួយដោះស្រាយផង ដោយសុំកាន់កាប់លើដីរបស់ខ្លួនដដែល តែបើក្រុមហ៊ុនចង់បានសូមគិតតាមតម្លៃទីផ្សារជាក់ស្តែង។

ពាក់ព័ន្ធនឹងការស្នើសុំរបស់ពលរដ្ឋ លោក ឃឹម សំភារ អភិបាលក្រុងតាខ្មៅ និងលោកឧកញ៉ា ថោង សារ៉ាត់ ពុំអាចសុំការបំភ្លឺបានឡើយនៅថ្ងៃទី១៩ ខែសីហា ឆ្នាំ២០២៦៕